Sáni Markusï 14

3. K'amechantskua, uarhikua ka tsíntskua

(14.1—16.20)

Jirinhakuntaxaptiksï néna Jesusini jupikani

(Mt 26.1-5; Lk 22.1-2; Jn 11.45-53)

1Páskueri k'uínchekua antamutani, enka tsimani jurhiaterku kueratani jápka, enka k'urhinta no xarhipiti jukari anhak'a. Tátecheri juramuticha ka juramukua jurhentpirichaksï jirinhakuntaxapti nénaksï jupikapirini Jesusini ka sési arhiparinksï atani uántikuni. 2Ka máruksï uantasïrempti:

–K'uínchekuarhu nómpe, jimpoka ireta nósesi jámaaka uantakorheni.

Uarhiti ma Jesusini p'untsumekua atarhesti

(Mt 26.6-13; Jn 12.1-8)

3Jesusi Betania niraspti, Simonio, enka xúta jukarikua jimpo mítenhapka. Ka enka t'irekua p'íts'ïtakuarhu uaxakapka, uarhiti ma niáraspti, tsúntsurhu ma p'untsumekua uiniratini enka kánekua jukaparhakuepka. Kakaspti tsúntsuni ka p'untsumekua Jesusini atats'ïkuspti. 4Ka máru enka jima janhapka ikiasptiksï ka ísïksï arhip'eraspti:

–¿Antisï p'untsumekua ísku ampentarheia? 5Sáno ma uéxurhini ánchekorhekata jimini nirasti, sánteru sésipirinti enka ataranhantapirinka ka tumina no jatsikorherichani íntsaani.

Ka uarhitinksï arhintikperaparini arhinhchaxapti.

6Ka Jesusi arhiaspti:

–Jurak'u je. ¿Nóts'ï exesïni eskarini sési ampesï úcheka? 7No jatsikorherichantsï úaka jarhuatani jarhani, jimpokats'ï méntkisï chánksïni jinkuni jatsiauaka, ka na enkats'ï jatini uékaaka úakats'ï jarhuataani; ka jíntentsïni no méntkisï chánksïni jinkuni jámani jauaka. 8I uarhiti jarhop'estia enka xántku inte úka: P'untsumekuarini atarhentastia enkani jatsinhantani jámani atarhenhantapirinka. 9Sési jimpoksïni arhixaka eska iápuru ísï enka ampakiti aiankperakua aiankperanhani janhaaka eska jima míanhantaaka enka inte uarhiti jámaka.

Júdasï pakatperasti juramutichani jinkuni

(Mt 26.14-16; Lk 22.3-6)

10Ka Júdasï Iskarioti, enka témpeni tsimani jurhenkorhericha jinkuni miiukorhempka, uékaspti Jesusini sïpatani, ka niraspti tátecheri urhets'ïkurichani uantaxekuani. 11Ka imaksï kánekua tsípespti ísï kurhach'atini ka tuminaksï aiakuspti. Ka Júdasï jirinhakuntaxapti néna ch'anakupirini Jesusini ka intsïnharhitpentani.

Páskueri chúrekua anapu t'irekua

(Mt 26.17-29; Lk 22.7-23; Jn 13.21-30; 1~Ko 11.23-26)

12Ka ima jurhiatekua enka k'uínchekua Páskueri uénakorhek'a, enka k'urhinta no xarhipiti jukari anhak'a, ka enka karichi uántikunhak'a. Jesusinksï jurhenkorheri jémpecha kurhamarhespti:

–¿Naniri uéksïni eskaksïni Páskueri t'irekuani úchent'aaka?

13Ka tsimani jurhenkorheri jémpechani axaaspti ka arhiaspti:

Ni je Jerusaleni, ka ekats'ï achetini ma kúmaska enka k'amukua jimpo itsï páni jauaka; chúxapa je, 14Ka nani enka inchantka, arhi je jima imani k'umanchekuarhu anapuni eska jurhentpiri kurhankorhexaka: ¿Nani ampanteski enkani ji jucheti jurhenkorherichani jinkuni Páskueri t'ireaka? 15Ka imaksïni páati k'umanchekuarhu miiurani, iótakuarhu enka sési tatsuntskakata ka ampantskakata jaka. Jimats'ï úntaaka juchari t'irekua.

16Ka jurhenkorherichaksï, niraspti iretarhu ka iámentu ampeksï kúntaspti, eska Jesusi na arhiapka, ka jimaksï úntaspti Páskueri t'irekua.

17Ka Jesusi témpeni tsimani jurhenkorherichani jinkuniksï chúrekua niraspti jima. 18Ka enka t'irenhani jápka, Jesusi arhiaspti:

–Sési jimpoksïnisï arhixaka eska jínteni jinkuni t'irexaka, ima enkarini sïpataaka.

19Ka imaksï kómu p'ikuarheraspti enka ima ísï arhiapka ka mántani arhisptiksï kurhamarheni:

–¿Jíski?

20Ka Jesusi arhiaspti:

–Cha ma ísïskats'ï, ima enka jínteni jinkuni atarhutani jaka kurhinta. 21Acheti Uáp'a jatsisti xanharini antarani eska karakata na jaka; ¡Násï úkorhenchaa ima enka Acheti Uáp'ani íntsïnnharhitpeaka! Sánteru sésipirinti eska no kánkorhenhapirinka.

22Enkaksï t'ireni jápka, Jesusi kurhinta jupikaspti ka úch'akuraspti ka k'epekuspti, ka íntsaaspti ka arhiaspti:

–Jupika je, ka a je, i jucheti anhanhatakuesti.

23Tátsekua itsïmatarakuani p'íkuspti, ka Diósïni diósïmaiamukua arhispti ka íntsaani, ka iámentu itsïmanhaspti. 24Ka arhiaspti:

–I jucheti iurhiristi, ka íni iurhiri jimpo pakatap'eranhaati enka uánekuecheri jimpo sésiuaka. 25Ka sési jimpoksïni arhixaka eskani nóteruni méni itsïmaakia úberi itsïrhukua, Diósïri juramukuarhia ménteru, imani jurhia enkani úberi itsïrhukua jimpanhe itsïmaaka.

Jesusi aiankpespti eska Pédru no míteni uantapirinka

(Mt 26.30-35; Lk 22.31-34; Jn 13.36-38)

26Ka tátsekua enkaksï na jakak'uticheri pirekuechani máru pireapkia, juátarhuksï nirasptia, imani juátarhu enka Olibusï arhinhak'a. 27Ka Jesusi arhiaspti:

–Cháts'ïni iásï chúrekua iámeduecha, nóteruts'ïni jakak'ucheaka. Jimpoka ísï karakata jarhaska: Karichichaksï etsapakurhiati ekani ataska karichi erankutini. 28Tátsekua ekani na tsíntaakia, jíksïni urhechepantaaka Galilea.

29Ka Pédru arhispti:

–Jíkini nómeni jurak'uaka, náuek'iksïni iámentuecha jurarkuni.

30Ka Jesusi mókukuspti:

–Sési jimpokini arhixaka, eska t'arhechu nótki tsimani xanhari uerani jauaka, ka t'úrini t'uíni tanimu xanhari no míteni uantaakia.

31Ka Pédru sánteru arhisïrempti:

–No ménikini no míteni uantaaka, náuek'ini t'únkeni jinkuni uarhini.

Ka máteruechat'uksï mák'ueni arhisïrempti.

Jesusi Jetsemani kómarhaspti

(Mt 26.36-46; Lk 22.39-46)

32Tátsekuaksï niraspti jima enka Jetsemani arhinhak'a. Ka Jesusi arhiaspti imeri jurhenkorherichani:

–Ji nirasïnka uantamukukorheni, ixuk'uts'ïni erontsï je uaxakatini.

33Ka Pédruni ka Santiaguni ka Juánuni pát'aaspti, ka uénaspti kómu p'ikuarherani ka uantanheani. 34Ka arhiaspti:

–Uarhintaxaka kómu p'ikuarhenheni, enak'irini uarhikua janocheni jakiia; ixu pakara je ka ásï jáma je k'uíni.

35Jima sántku urhepani kápatsetini kómarhispti Diósïni eska, enka úpirinka, kéntitakupirinka imani ampe enka jurhani jápka. 36Ka arhisïrempti Diósïni: “¡Abba, Táte! Úsïnkari iámentu ampe úni, kéntitacherini ini nósesi jámarha ampe, k'óru ásï ima úkorhee enkani ji uék'a, ima úkorhe eskari na t'u uék'a.”

37Tátsekua enka k'uanhatsentapka, jurhenkorherichaksï t'uíni k'uíxaptia. Ka Pédruni arhispti:

–Simoni, ¿K'uixakiri? ¿Nórini úski sónti pámpetani? 38Ásï k'uíni ja je, ka uantamukukorheni ja je, nóksïni terunkutpiri antani. Jimpoka chári espíritu uékani jarhasïnka, enka úka cháts'ï sóntku jurak'utakorhesïnka.

39Ka Jesusi niraspti ménteru ka mák'ueni uantamukukorheni. 40Ka enka ménteru k'uanhatsentapka, ménteruksï t'uíni k'uíxaptia, jimpokaksï uarhixapka k'uínchani. Ka nóksï jánhaskasïrempti ampe arhini Jesusini. 41Tanimu xanhari k'uanhatsentatini arhiaspti:

–¿Anti útasteruts'ï k'uíxaki? ¿Anti útasteruts'ï mintsikorhexaki? ¡Sésku jarhastia! Iásïsï Acheti Uáp'a k'amanharhintsticheri ják'i jimpo íntspenhantaatia. 42Jauara je, iáchka je; janoxatiia inte enkarini íntspeaka.

Enka Jesusi jupinhapka

(Mt 26.47-56; Lk 22.47-53; Jn 18.2-11)

43Jesusi útasï ísï uantaxaptiteru enka Júdasï uánekuecha jinkuni niárapka, ima Judasï enka imeri jurhenkorheripka, chkári ka atap'etarakuechanksï anhak'utini. Ka imat'uksï niraspti enkaksï tátecheri urhets'ïkuricha axaapka ka ístu enkaksï juramukua jurhentpiricha axaapka ka enkaksï achamasïcha axaapka. 44Júdasï arhiarixaptia: “Imeuati enkani ji putinharhikuaka, sési jupikatini pa je.” 45Ka enka Judasï niárapka, antarheraspti Jesusini ka arhispti:

–¡Jurhentpiri! Arhini.

Ka putinharhikuspti. 46Ka sáp'arherasptiksïa Jesusini jupikani.

47K'óru nema tiámu atap'etarakua p'ip'aarhaspti ka kachup'antikuspti k'éri táteri jántspirini. 48Ka Jesusi arhiaspti:

–¿Antits'ïnisï ísï juki jupikani, enak'ini ampe ji sïpak'urhe, chkári ka tiámu atap'etarakua jupikatini? 49Pauanipauani cha jinkuni jamaxapka tiósïo jurhentpeni, ka nóts'ïni jupikaska. Enka úka i ampe ísï úkorhexati jimpoka ísï karakata jarhaska.

50Ka iámentu jurhenkorherichaksï sïpakorhespti, ka Jesusiniksï jantiok'u jurarkuni. 51Ka jimaksï jupikaspti tumpini ma, enka Jesusi jinkuni jámani jápka ka enka takusï ts'irimpiti mák'u p'amantkukorhetini jápka. 52Ka ima tumpi takusï ts'irimpiti jurarkuspti ka nómpe ma jukarini uiriaspti sïpakorheni.

Jesusi k'éri tánkorhentskuarhu

(Mt 26.57-68; Lk 22.54-55,63-71; Jn 18.12-14,19-24)

53Tátsekuaksï Jesusini k'éri tátani pérakuspti, ka jimaksï tánkorhent'aspti iámentu tátecheri juramuticha, ka achamasïcha, ka juramukua jurhentpiricha. 54Pédru jima jamperi chúxapaspti, k'éri táteri k'umanchekuarhu ekuarhu jamperi, ka uaxakaspti ka tiósïo anapu kuárichani jinkuni jurhentani pakareraspti.

55Ka táteri urhets'ïkurichaksï, ka iámentu enkaksï tánkorhent'apka, jirinhakuntaxaptiksï ampe arhimetaparinksï Jesusini uántikupirini, ka nóksï ampe ma xékuntaspti. 56Uánekuaksï arhiparhatasïrempti chkuántiraparini, enka úpka nómpema terukuntasïrempti. 57Máruksï anhaxurhispti ka chkuántiraparinksï Jesusini arhip'ekuspti:

58–Jucha ísï kurhach'aska: “Ji íni tiósïoni xerent'aaka enkaksï parhakpeni anapuecha úka, ka tanimu jurhia jimpo úntaaka máteru enka no parhakpeni anapu úaka.”

59Ka náuek'i ísï, nóksï úsïrempti uantakuechani terukutaani. 60Ka k'éri táta jauaraspti, ka kurhamarhespti Jesusini:

–¿Nóri ampe ma uantaa? ¿Ampeski i ampe enkaksïni xáni arhini jaka?

61Ka Jesusi nómpe ma mókukuspti, pínasku jarhaspti. Ka k'éri táta ménteru uéntaspti kurhamarheni:

–¿T'úsï Krístue? ¿T'úsï Diósïri úch'akurakata Uáp'e?

62Ka Jesusi arhispti:

–Jo Jíska. Ka Acheti Uáp'anitsï Diósïri uinhapekuarhu jurhik'antani xéaka enka uaxakatini jauaka, ka enka janikuarhu junkuani jauaka.

63K'éri táta xáni ikiani tsapanturhispti takusïni enka xukuntatini jámani jápka, ka arhiaspti:

–¿Ampeteruchisï úraia sántenteru uantantstichani? 64Kurhach'akorheskats'ïa eska Diósïni uéksïnka táp'anharhikuni. ¿Nénats'ï xésïni?

Ka iámentuechaksï uantaspti eska ísï uantarini uarhikua antakorhespka.

65Máruksï t'uánharhikuspti, ka ónharhikusptiksï ka p'iaranksï kanharhikua atakuni, arhipariniksï:

–¿Arhitki nékini ataia?

Ka tiósïo kuárichat'uksï ataspti.

Pédru Jesusini no míteni uantaspti

(Mt 26.69-75; Lk 22.56-62; Jn 18.15-18,25-29)

66Enka Pédru ekuarhu kétsekua jápka, uarhiti ma nitamaxapti, k'éri táteri jántspiri ma; 67ka enka na exepka Pédruni eska imat'u jima jurhentaxapka, eratespti ka arhini:

–T'út'uri Jesusi Nasareti anapu jinkuni jarhaspka.

68Ka Pédru arhispti:

–Ji no míteska, nít'uni kurhankuk'i amperisï uantani jaki.

Ka enka uéntapka jamukutini, t'arhechu ma ueraspti. 69Ka ima uarhiti ménteru exespti Pédruni ka máteruechani arhiaspti:

–Intet'u imani jinkuni jámaxapti.

70Ka Pédru ménteru no míteni uantaspti. Sáni tátsekua, máteruechaksï ménteru arhispti Pédruni:

–Sési jimpo t'út'uri imecha jinkuni jámka, jimpokari Galilea anapueska.

71Ka Pédru uénaspti uinhamu ka ikiatintku uantani:

–¡No míteska inteni achetini enkats'ïni arhini jaka!

72Ka ménteru t'arhechu ueraspti ka Pédru miántaspti eska Jesusi arhispka: “T'arhechu nótki tsimani xanhari uerani jauati enkarini t'u t'uini tanimu xanhari no míteni uantaakia.” Ka jurak'utakorhent'aspti uerani.

Currently Selected:

Sáni Markusï 14: DKPJ

Highlight

Copy

Compare