Sáni Markusï 13
13
Jesusi aiankpesti eska tiósïo xerenhantapirinka
(Mt 24.1-2; Lk 21.5-6)
1Enka Jesusi tiósïo uéntapka, jurhenkorheri ma arhispti:
–¡Jurhentpiri, exea xáni k'érati tsakapuechani ka xáni k'érati k'umanchekuechani!
2Ka Jesusi arhispti:
–¿K'érastiksï ano k'umanchekuecha? Ka iámentuksï xerenturhinhantaati, méntku nóma erhakua tsakapu máterurhu píts'ïkutini pakaraati.
Parhakpeni k'amakurhikua
(Mt 24.3-28; Lk 21.7-24; 17.22-24)
3Tátsekuaksï Olibusï juátarhu niraspti, enka tiósïo erankurhini jaka. Ka Jesusi uaxakaspti, ka Pédru ka Santiagu ka Juánu ka Andresï sïpatekuarhkuksï kurhamarhespti:
4–Aiankuts'ïni. ¿Anti i ampe na jatini ísï úkorhea? Ka ¿Ampe jimpochi jánhaskaa eska ísï úkorheni jámaakia?
5Ka Jesusi arhiaspti: “Xéparinits'ï jámaaka ásïksïni nema tantoch'e. 6Jimpokaksï uánekua juuaka jucheti jakankurhikua uantaparini ka arhiatiksïni: ‘Jíska’ arhini ka uánekuaksï tantoch'peati.
7Ásï che je enkats'ï míteska eska iápuru k'érati uarhiperata úkorhexaka. Ísï jatsisti eska úkorheaka, k'óru nótki k'amakurhixamti. 8Jimpoka uarhiperanhaaka ka ístuksï jupiperaati k'éri ireta, máteru k'éri iretani jinkuni; ka uápuru isï jencheati, ka kánekua k'arhimakua japoati. Inteni jimpo xarharaati eska uénaskia p'amekua, eska uarhiti na uénak'a k'úparhata p'amerani.”
9“Cha jinkuntku ja je k'óru: Jimpokats'ï tánkorhentskuarhu, ka ístu k'umanchekua tánkorhentskuarhu pánhaaka ka nósesits'ï kánhaaka atanhani. Ka jucheti jimpots'ï juramuti sapirhati ka juramuti k'ératichani jinkuni pánhaaka, ka jimats'ï imechani jucheti ampe aiankuauaka. 10Jimpoka k'uanisïnka eska urheta iámentu iretecharhu uantanhantaaka ampakiti aiankperakua. 11Enkats'ï jupinhaaka, ásï uantanhea je ampets'ïsï uantaa juramutichani japarini. Jimats'ï jánhastanhaaka ampe enkats'ï uantaaka, jimpokats'ï no chásï uantani jauaka, Espiritu Sántusï uantaati. 12Uarhikuarhu páp'eranhaati erachicha ka tátjempat'u uáp'ani uarhikuarhu péraati; ka sapichaksï tátjempani ka amampani anhaxurhikuauati ka atauatiksï uántikuani. 13Jucheti jimpoksïni iápuru ikimchaati, k'óru ima enka no kuatant'a'aka jakak'uni jarhani, p'ímutanhantaati.”
14“Enkats'ï exeaka nósesi jásï kéts'ïtakua jima kéts'ïtanhani janhani enka no kéts'ïtakueka, cha enkats'ï arhintani jaka kurhantira je, ekats'ï Judea jauaka, sóntku sïpakorhe je, juátecharhu karhanharhiku je sïpakorheni; 15enkats'ï k'umanchekuarhu karhakua jámani jauaka, ásï kétsentsï je inchant'ani ampe petakorheni; 16ka ima enka tarheni jauaka, ásï jamperi k'uanhatsente chereparhakua p'íntani. 17¡Kánekuaksï nósesi nitamanchaati uarhiticha enkaksï sapini erokorheni jauaka, o enkaksï charhakuni etsukua íntskuni jauaka! 18Kómarhi je Diósïni eska i ampe no jiák'ani úkorheaka enka iéstani jarhak'a, 19jimpoka kánekua nósesi jánhaskorheaka, enka kueraap'erakuarhu uératintki nómeni jánhaskorheka, ka enka nóteru méni ísï jánhaskorheaka. 20Enka Acha no sóntku nitamatarapirinka xásï ampe, iámentu uarhinhapirinti; enka úka, no ióni xánhaskorheati jimpoka Diósï kuách'akuauaka imechani enka erakuatini jakaia.”
21“Ka enkaksïni nema arhiska: ‘Exe je, ixu jarhasti Krístu’ o ‘Exe je, jimini jarhasti’, ásï jáma je jakak'ukuni. 22Jimpokaksï juuaka Krístu eratakorhecha ka Diósïri uantari eratakorhecha; ka mámaru ampeksï xarhataparini tantoch'peati ka milagruechanksï jimpot'u tantoch'peati, ka jámaatiksï Diósïri erakukatechani jamperi tantoch'aani. 23¡Xéparini jáma je! Aiankuskaksïnia ampe enka jurhani jaka.”
Acheti Uáp'a junkuaati
(Mt 24.29-35,42,44; Lk 21.25-36)
24“Enka na nitamaakia nósesi jásï ampe, tata jurhiata páp'apakanharhiati, ka nana kutsï nóteru t'íntskaati, 25auantarhu uératinksï jóskuecha uekorheati, ka auantarhu anapu uinhapekuechaksï xamatakorheati. 26Jiák'antsï exeaka eska Acha Uáp'a kánekua uinhapekua ka t'íntskua jinkuni xúmurhu kétseaka. 27Ka imeri ánjelichani axauati t'ápuru isï eraparini anapu erakukatechani tánantaani, náni enka jamperi parhakpeni k'amarhuk'a ka nani enka auanta k'amarhuk'a.”
28“Jurhenkorhe je enka igusï jámka: Enka tsikixkurhint'ani jarhak'ia, imani jimpochi jánhaskasïnka eska ementa janonkuaxakaia. 29Ka chát'u enkats'ï exeaka eska inte ampe úkorheni jauakia, inteni jimpo míte je eska Acha Uáp'a chéni anhamukuskia. 30Jíksïni sési jimpo arhisïnka, eskaksï iásï anapuecha irekani jauaka útasï, enka inte ampe úkorheaka. 31Auanta ka echeri k'ámakurhiati, k'óru jucheti uantakuechaksï méntkisïuati.”
32“Enka úka, nónema mítesti káni, ka na jatini, níksï ánjelicha auantarhu míte, nít'u Diósï Uáp'a míte, Tátek'usï míteti.”
33“Cha, ísï jimpo tsínharhitini ja je, jimpokats'ï no míteska na jatini ísï jánhaskorhea. 34Cha mák'ueni jáma je eska nema enka iauani iretarhu nirani jámani jéntak'a imeri jántspirichani, eskaksï k'umanchekua patsakuaka, ka táchani úkua jurak'ukuasïnti, ka mítatini juramukusïnti eska kuáni jauaka. 35Chát'u ísï tsínharhitini ja je, jimpokats'ï no míteska káni junkua k'umanchekuarhu anapu tata, inchatiru isï, teruk'ani chúrekua isï, sïuap'entku isï o xárhentku isï; 36ásï ima antap'atante ka cha k'uíni jarhani. 37Ka inteni ampe enkaksïni chánksïni arhini jaka, iámentuechanisïni arhiani jaka: ¡Tsínharhitini ja je!”
Currently Selected:
Sáni Markusï 13: DKPJ
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
