Sáni Markusï 1

Uénakua

(1.1-15)

Juánu itsï atats'ïkpiri, jimesï enka nónema irekaka

(Mt 3.1-12; Lk 3.1-9,15-17; Jn 1.19-28)

1Jesukristueri ampakiti aiankperakua ísï uénasïnti, [ima enka Diósï uáp'eka.]

2Isaiasï, Diósïri uantari ísï karasti:

“Jucheti uantakua párinikini

urhetatachepaxaka

enkakini xanharini

ampantskachent'apaaka.

3Nema uinhachaparini, ísï uantaxati

jimesïsï enka nónema irekaka:

Ampantskarakuntsï je Diósïni

ka jurhimpitku jásï ma

xanhari mítaku je.”

4Ísï jimpo, Juánu itsï atats'ïkpiri jimesï jámaspti enka nónema irekaka, ka arhits'ïkpesïrempti eska uétarhesïrempka Diósïni antarhentani, ka itsï atats'ïni, ka eska ísï jámani Diósï púakuantauaka. 5Judea ka Jerusaleni isï anapuechaksï nirasïrempti kurhach'ani. Ka p'amonkorhent'asïremptiksï, ka Juánu itsï atats'ïkuasïrempti iurhekuarhu enka Jordani arhinhak'a. 6Juánueri xukuparhakua kameiueri jauiri jimpo úkatespti, sïkuiri jóankorhesïrempti; chóchuechani ka juátarhu anapu tékua t'iresïrempti. 7Ka ísï arhits'ïkpesïrempti: “Jurhaxati máteru Acheti sánteru k'éri ampe, ima enkani ji no jamperi nitatarheka kuarhachichani kuerantukuani. 8Jíksïni itsïk'usï atats'ïkuni jaka; ka imaksïni k'óru Espiritu Sántuni jimpo atats'ïkuati.”

Jesusiri itsï atats'ïkua

(Mt 3.13-17; Lk 3.21-22)

9Imani jurhiatekuechani, Jesusi uéakuspti Nasareti enka Galilea isï jaka. Ka niraspti iurhekuarhu enka Jordani arhinhak'a ka Juánu jima itsï atats'ïkuspti. 10Uémentani jámani, Jesusi exespti eska auanta mítakorhexapka ka eska Espiritu kétsexapka imani antats'ïkuerani, jipunhini jáxespti. 11Ka auantarhu anapu uantakua ma kurhakorhespti, enka ísï uantani jápka: “T'úri jucheti uátsïtiska, enkani ji xáni xénhchak'a, ka ji t'únkeni jimpo kánekua tsípesïnka.”

Jesusiri ts'ék'ukua

(Mt 4.1-11; Lk 4.1-13)

12Ka tátsekua, Espiritu Jesusini jimesï páspti enka nónema irekaka. 13Ka tsimani ekuatse jurhia jarhaspti jima enkaksï púkicha ka jiuatsïcha ka akuitsecha irekak'a ka Nóampakiti Jesusini ts'ék'usïrempti, ka ánjelichaksï marhuakusïrempti.

Jesusiri aiankpekua

(Mt 4.12-17; Lk 4.14-15)

14Ísï tátsekua, enka Juánu k'ataperakuarhu ónhanhapka, Jesusi Galilea isï niraspti Diósïri ampakiti aiankperakuani uantant'a'ni. 15Ka ísï arhip'esïrempti: “Janoxati jurhiatekua, Diósïri juramukua janoxatiia. K'uanhatsentsï je Diósïri xanharirhu, ka imeri ampakiti aiankpekuani mintsita jinkuni jakak'u je.”

I. JESUSI UANTANT'ASTI NÉSKI IMA

(1.16—8.30)

1. Jarhamekua jinkuni uantant'asti

(1.16—3.12)

Jesusi ióarhiasti t'ámu uarhurichani

(Mt 4.18-22; Lk 5.1-11)

16Enka Jesusi Galilea anapu japuntarhu uanamukutini nitamani jápka, Simonini ka erachi jémpa Andresïni exeaspti. Imaksï kurucha p'itamani jámaxapti, jimpokaksï kurucha p'itamatispka. 17Ka Jesusi arhiaspti:

–Chúxaputs'ïni je, nóteruts'ï kurucha p'itamatiuakia, iásïts'ï k'uiripuni tánani jámaakia.

18Imaksï jurarkuaspti kurucha p'itamatarakuechani ka chúxapasptiksï.

19Sántku urhepatini, máteru k'éri icharhutarhu, Jesusi Sebedeo uáp'echani exeaspti, Santiaguni ka Juánuni, cheremakuechanksï sïriantaani jarhani, 20ióarhiaspti ka imat'uksï chúxapaspti, ka tátjempa Sebedeoni ka imeri jarhop'irichanksï icharhutarhu jurarkuaspti.

Jesusi nósesi jásïni xukaspti

(Lk 4.31-37)

21Tátsekuaksï Kafarnaumi niraspti, ka sábadu jurhiatekua Jesusi k'umanchekua tánkorhentskuarhu inchaspti, ka jurhentpeni uénaspti. 22Ka imeri jurhentperakuani kurharini ísku pakareranhasïrempti, jimpoka jarhamekua jinkuni uantasïrempka, no ísï eskaksï máteru juramukua jurhentpiricha. 23Ka acheti ma enka nósesi jásï incharhetini jápka ima k'umanchekua tánkorhentskuarhu jarhaspti, ka ima nósesi jásï Jesusini uinhamu arhispti:

24–Jesusi Nasareti anapu ¿Antits'ïnisï inchaakuchek'i? ¿K'amak'untsïni jurhaski? Jíkini míteska eskari Diósïri Sántueska.

25Ka Jesusi nósesi jásïni xukaspti, ísï arhiparini:

–¡Pínasku ja! ¡Uérhentsï inteni achetini!

26Ka nósesi jásï, jiuakorheparini uérhentaspti achetini; matsïmatsïtant'a'spti nóna uérhentani. 27Ka chérakorhenhaspti, ka kurhamarhperasïremptiksï:

–¿Ampeski i ampe? ¡Jimpanhe ampe ka juramukua jinkuni jurhentpesïnti! ¡Ka nósesi jásï espirituechantu juramukuasïnti, ka kurhach'asïntiksï!

28Ka sóntku mítekorhespti Jesusiri ampe, Galilea uanontani isï.

Jesusi ampakerantaspti Simoniri tarhampirini

(Mt 8.14-15; Lk 4.38-39)

29Enkaksï k'umanchekua tánkorhentskuarhu uéntapka, Jesusiksï Simoni ka Andresïri k'umanchekuarhu niraspti; Santiagu ka Juánu jinkuni. 30Ka Simoniri tarhampiri apontikuspti jimpoka kánekua tinharaxapka. Eka Jesusi aiankunhapka, 31antarheraspti ka jupik'uspti ka jauatani, ka ima tinharakua jupinapaspti, ka sóntku marhuakuaxaptia.

Jesusi p'amenchatichani ampakerantaasti

(Mt 8.16-17; Lk 4.40-41)

32Tirimarhantuksï Jesusini pérakuaspti uánekua p'amenchatichani ka nóampakiti jukaratichani, 33ka imani k'umanchekuarhu jamukutini uánekua tánkorhenhantaspti. 34Ka Jesusi uánekua ka mámaru jásï p'amenchatichani ampakerantaaspti, ka nósesi jásï jukaratichani petarhetant'a'aspti; ka no jiáretaasïrempti eskaksï nóampakiticha uantapirinka, jimpokaksï mítespka ima néspki.

Jesusi Diósïri ampakiti aiankperakuani aiankpesti

(Lk 4.42-44)

35Ka k'éri xarheni, sïuapentku, Jesusi jauaraspti, ka niraspti jantiok'u uéramani isï uantamukukorheni. 36Simoni ka imeri pámpirichaksï niraspti Jesusini jirinhantani, 37enkaksï na xéntapka arhisptiksï:

“Iámentuechaksïni jirinhantani jámaxati.”

38Ka ima arhiaspti:

“Ju je máteru iretecharhu enkaksï ixuk'u isï jaka uantakua arhits'ïkpeni, jimpokani inteni únisïni juka.”

39Iámu Galilea isï, Jesusi nirasïrempti iámentu iretecharhu anapu k'umanchekua tánkorhentskuecharhu, uantakua arhits'ïkpeparini ka ístu nóampakitichani petarhpeantaparini.

Jesusi xúta jukarhekorhetini ma ampakerantasti

(Mt 8.1-4; Lk 5.12-16)

40Acheti xúta jukarhekorheti ma, Jesusini antarheraspti, ka tinkuixurhikutini arhispti:

“Enkari uékaaka, úakarini p'ikurhentani jucheti p'amenchakuani.”

41Jesusi p'amok'uspti, ka p'árheni ka arhispti:

“Uéksïnka. ¡Ampakentsïa!”

42Ka p'amenchati xúta jimak'u iámu uauarhekorhent'aspti, ka ampakentaspti. 43Ka Jesusi axantani jámani arhispti:

44“Kurha, ásï nemani aianku; tátantku ni antarherani, jurak'ukini exekorheni eskari ampakentaskia, eskaksï míteaka eska ísïska, ka pa kéts'ïtakua eska Moisesiri juramukua na arhik'a.”

45Enka úpka, ima acheti sóntku iámu ampe uantant'a'spti eska xáni ampe úkorhepka. Ka ísï jimpo Jesusi nóteru úsïrempti iretecharhu inchaakuni, uéramani ísku niárasïrempti, jimak'u isï enka nónema jámempka; ka náuek'i ísï, jimaksï nirasïrempti iápuru anapuecha exeni.

Currently Selected:

Sáni Markusï 1: DKPJ

Highlight

Copy

Compare