Sáni Mateo 28

Jesusi tsíntasti

(Mk 16.1-8; Lk 24.1-12; Jn 20.1-10)

1Dominku jimpo, erantetintku jiáni enka semana uénak'a, Maria Magdalena máteru Maria jinkunksï niraspti nani enka Jesusi pénhantapka. 2Ka mátirku k'éri ma jenchespti, jimpoka Acheri ánjeli ma auantarhu uératini kétsespka, ka kéntitaspti tsakapuni ka tsakapurhu uaxats'ïkuspti. 3Piritakueni jáxespti ka xukuparhakua iéstakueni t'uput'upuxespti. 4P'urhek'utichaksï manarantaspti xáni chéni ka chánchanhasïksï pakaraspti. 5Ka ánjeli uarhitichani arhiaspti: “Ásï jáma je chéni, ji mítetixaka eskats'ï Jesusini jirinhantaxaka, imani enka cháparhatanhaka. 6Nóteru ixu jarhastia, tsíntastia eska na uantaka. Jútkiru je exeni nani enka Acha pénhantapka. 7Ka ni je kókuani ka arhia je jurhenkorheri jémpechani eska Jesusi tsíntaskiia, ka eska Galilea urhekupauaka, jimaksï exeati. Arhiskaksïnia.”

Jesusi uarhitichani xarhakuantaasti

8Imaksï manaraparini ka tsípeparini uéntaspti jima enka Jesusi pénhantapka, ka uiriasptiksï Jesusiri jurhenkorherichani aiankuantaani, ka enkaksï nirani jápka, 9Jesusi xarhakuaspti ka arhiaspti: “Jénti”, ka imaksï antarheratini, kamap'antukuspti ka k'éri ampeksï arhispti. 10Ka Jesusi arhiaspti: “Ásï che je, ni je jucheti erachichani aiankuantaani eskaksï Galilea niuaka ka jimats'ïni xéntaati.”

P'urhek'utichaksï chkuántirataranhaspti

11Ka enkaksï ima nirani jápka, p'urhek'utichaksï iretarhu niraspti ka aiankuantaasptiksï tátecheri urhets'ïkurichani ampe enka xáni úkorhepka. 12Ka achamasïcha jinkunksï tánkorhent'aspti ka enkaksï na pakatperapka, p'urhek'utichanksï kánekua tumina íntsaaspti 13ka arhiasptiksï: “Cháts'ï uantant'a'aka: ‘Jurhenkorheri jémpechaksï chúrekua niárasti ka Jesusinksï pántasti enkani jucha k'uíni jápka.’ 14Ka eka juramuti íni ampe míteska, jucha míteskia néna enkachi arhiaka, ka chánksïni no inchap'eraaka.” 15Ka imaksï tumina euaspti ka úsptiksï eskaksï na arhinhapka. Iásï jamperiksï judiuecha íni ampe uantaxatiteru.

Jurhenkorherichaksï ampakiti aiankperakuani míntanhasti uantant'a'ni

(Mk 16.14-18; Lk 24.36-49; Jn 20.19-23)

16Ka témpeni ma jurhenkorherichaksï Galilea niraspti, imani juáta jimpo enka Jesusi arhiapka. 17Ka k'éri ampeksï arhispti exerini, nák'irukaksï máru tsimantsimanearhani jápka. 18Jesusi antarheraaspti ka arhiaspti: “Iámentu jásï juramukua auantarhu ka echerintu intsïnhaska. 19Ísï jimpo, ni je ka iámentu iretechani jurhenkorheri ua je, itsï atats'ïkpe je Táteri ka Uáp'eri ka Espiritu Sántueri jakankurhikua jimpo. 20Ka jurhentaa je eskaksï úraaka iámentu ampe enkaksïni ji jurhentaka. Ka ji, parhakpeni k'amakurhikuarhu jamperi mántani pauani chánksïni jinkuni jauaka.”

Currently Selected:

Sáni Mateo 28: DKPJ

Highlight

Copy