Sáni Lúkasï 20

Jesusiri juramukua

(Mt 21.23-27; Mk 11.27-33)

1Ma xanhari, enka jamperi Jesusi k'éri tiósïo jurhentpeni jápka ka ampakiti aiankperakua aiankpent'ani jarhani; tátecheri urhets'ïkuricha ka juramukua jurhentpiricha ka achamasïchaksï niáraspti, 2ka arhisptiksï:

–¿Náki juramukua jimpori inteni ampe úsïni? ¿Inteni juramukuakini ne íntskuski?

3Jesusi arhiaspti:

–Jít'uksïni kurhamarheaka ma ampe, arhits'ïni je: 4Enka Juánu itsï atats'ïkpempka ¿Auantarhu anapu ampespki, o parhakpeni anapu ampespki?

5Ka imaksï uénaspti arhip'erani: “Enkachi arhiska eska auantarhu anapueska, arhiatits'ïni: ‘¿Ka antisïts'ïsï no jakak'ukupkia?’ 6Ka nóchi úaka arhini eska parhakpeni anapu ampeska, jimpokats'ïni k'uiripu tsakapkueraaka uántikuni, jimpoka iámentu inchats'ïnhatixaka eska Juánu Diósïri uantarispka.” 7Ka ísï jimpoksï no míteni uantaspti. 8Jimak'ani Jesusi arhiaspti:

–Jít'uchkaksïni no aiankuakia náki juramukua jimpo íni ampe úsïnki.

Tarheri nóamparhaticheri uantantskua

(Mt 21.33-44; Mk 12.1-11)

9Tátsekua Jesusi uénaspti aiankpeni ka terukutarantskua ma uantant'a'spti: –“Acheti ma uba jatsiatakorhespti, ka tarherichani máru kuanetaaspti ka iauani isï niraspti. 10Enka na jurhiata niárapka, jántspirini ma axaspti tarherichani p'ikuntskata kurhakuantani; ka imaksï ataspti ka nómpemaksï íntskuspti ka ískuksï axantaspti. 11Ka echeri kánti máteru jántspirini axaspti, ka intentuksï nósesi arhispti, atasptiksï ka ískuksï axantaspti. 12Ménteru máteruni axaspti, ka imantuksï ataspti ka petaatant'a'anksï.”

13“Tátsekua ima enka echeri kánkorhempka eratsentaspti uantaparini: ‘¿Néna jámaa? Jucheti uátsïni axaaka imani enkani ji xáni xénhchak'a; nántikaksï inteni kurhantirakuaka.’ 14K'óru enkaksï tarhericha exepka, arhip'erasptiksï: ‘I pakatamenhaati echerini; ju je atani uántikuni, ísï jámanchi echeri jucha jurak'umenhaaka’ 15Ka petaatant'a'sptiksï jima enka uba jukapka ka atasptiksï uántikuni.”

“¿Ampets'ï eranhaskasïnki eska echeri kánkorheri úkuauaka? 16Niántaati ka tarherichani uántikuauati, ka echerini enka uba jukak'a máteruechani íntsauati.”

Ísï kurhanhatini uantanhaspti:

–¡Nómeni ísïuati!

17Ka Jesusi erateaspti ka uantani:

–Ka jimak'ani ¿Ampe arhikuekasïnki? Enka karakata arhik'a:

Tsakapu enkaksï k'umanchekua úricha no jaiapanhentaka

iásï kasïpenharhikurhaxatiia.

18Ne uék'i, enka imani tsakapurhu antats'ïkueraska, kachunturhikorheati; ka néni enka ima tsakapu jatach'akuska, putsïnturhiati.

19Tátecheri urhets'ïkuricha ka juramukua jurhentpirichaksï uékaspti jimak'u jupirkorheni, jimpokaksï jánhaskaspka eska imani uantantskuani jimpo imechanisï arhiani jápka, ka nóksï úspti, jimpokaksï chérhpespka.

Tumina tánakueri kurhamarhperakua

(Mt 22.15-22; Mk 12.13-17)

20Ka máruksï axaaspti eskaksï sïpatapirinka, enkaksï kaxumpiti eratakorheparini úpirinka Jesusini uantarani ampe ma enka marhuakuapirinka Jesusini jupirkorhetarani ka Roma anapu juramutini íntsïnharhitani. 21Imaksï axakatecha kurhamarhespti:

–Jurhentpiri, míteskachi eska sésimentu jarhaska iámentu ampe enkari jurhentpek'a, ka eskari iámentuechani xénhchaasïnka ka sési jimpori Diósïri xanharini jurhentpesïnka. 22Arhits'ïni, ¿Sésiski enkani jucha Roma anapu irechani tumina íntskuk'a?

23Jesusi p'ikuarhenheparini eskaksï nósesi jimposï kurhamarheni jápka, arhiaspti:

24–Taiakata máts'ïni exera. ¿Néski i enka ixu jukanharhika ka néri ampe karanharhiski?

Ka arhisptiksï:

–Irecheristi.

25Jesusi arhiaspti:

–Irechani íntskuntsï je, ampe enka irecherika; ka Diósïni íntsku je, ampe enka Diósïrika.

26Ka ampe uék'i arhip'eni, nóksï xékuntaspti ampe arhiparhatapirini jupirkorheni, ísï jimpo ísku pakareratinksï enka ima isï arhiapka, pínamasptiksï.

Tsíntskueri kurhamarperakua

(Mt 22.23-33; Mk 12.18-27)

27Tátsekuaksï saduseouecha máru niraspti Jesusini uantaxekuni. Saduseouechaksï no jakak'usïnti eskaksï uarhiricha tsíntasïnka; jimpoksïsï arini uantakua pérakupti, 28uantasptiksï:

–Jurhentpiri, Moisesits'ïni karakata jurak'uchesti enka arhik'a: Eka nema uarhiaka ka témpa nóma uáp'a jinkuni pakarani, eska imeri erachi ima jinkuni tempuchant'aaka, ka eska sïrukua jurak'ukuaka. 29Ménichkaksï iúmu tsimani erachicha jarhaspti, ka ima enka urhetipka, tempuchaspti, ka no ma sapini kámatini uarhispti. 30Ka enka imani chúxapempka imat'u tempuntaspti ka imat'u uarhini, 31ka tanintarhut'u isï, uarhitini tempuntaspti ka mák'uenksï jámasti máteruechat'u, ka iúmu tsimanksï uarhisti nóma sapini kámatini. 32Tátsekua uarhitit'u uarhispti. 33Ka ia, enka tsínhantaaka ¿Ima uarhiti néri témpentaa, jimpoka iúmu tsimarhenicheri témpespka?

34Jesusi arhiaspti:

–Íni irekuarhu, nanakecha ka tatakecha tempuchanhasïnti; 35k'óru imechani enka Diósï erakuauaka eskaksï nitatarheska máteru tsípekuarhu tsíntani, tatakeni o nanakeni nóteru tempuchanhasïntia, 36jimpokaksï nóteru uarhiakia, ka jimpoka ánjelini járhanhantaakia, ka Diósï uáp'enhaati ísï tsínhantatini. 37Moisesi jamperits'ïni tsïtuniri uantantskua jimpo tsíntskueri ampe aiankusti. Enka Acha arhipka eska Abraniri ka Isaakiri ka Jakobueri Diósïska. 38¡Ima tsípiticheri Diósïsti, no uarhiricheri, jimpoka Diósïni jimpo iámentuecha tsípiti janhaska!

39Jimak'anksï máru juramukua jurhentpiricha arhispti:

–Acha, sésiri arhiska.

40Ka nóteruksï tekaaspti sánteru ampe kurhamarheni.

¿Diósïri úch'akurakata ne uáp'eski?

(Mt 22.41-46; Mk 12.35-37)

41Ka Jesusi kurhamarheaspti:

–¿Antits'ïsï uantak'i eska Diósïri úch'akurakata Dabiri sïrukueska? 42Nák'ichka Dabit'u pirekua karakatecharhu uantak'i anti:

Acha jucheti Achani arhisti:

T'irerkantanirini uaxata,

43enkakini jamperi chéti ikiatspirichani

jatantukueni péracheaska.

44¿Nénat'u Diósïri úch'akurakata Dabiri sïrukueua, ka Dabit'u Acha arhini?

Jesusi juramukua jurhentpirichani uantakuantaasti

(Mt 23.1-36; Mk 12.38-40; Lk 11.37-54)

45Iámentu kurhanhaxapti ka Jesusi jurhenkorheri jémpechani arhiaspti: 46“Xéparini jáma je juramukua jurhentpirichani jinkuni, jimpokaksï sési jásï ampe jukarini jánhchasïnka, ka uéksïntiksï eskaksï terupekuecharhu k'éri ampeni uantap'anhaaka, jánkorhesïntiksï tánkorhentskuecharhu k'érikuarhu uaxakani ka t'ireni jámanksï uéksïnti sési uaxakakorheni; 47ka uarhiti tsîntichanksï nómpe akua pakatakuasïnti, ka nónentanksï uékantku iórhati uantatsekorhesïnti. Imaksï sánteru kánekua k'amanharhiranhant'aati.”

Currently Selected:

Sáni Lúkasï 20: DKPJ

Highlight

Copy

Compare