Sáni Lúkasï 19

Jesusi ka Sakeo

1Jesusi Jeriko niáraspti ka iretarhu inchaakuspti. 2Jima irekaspti acheti jatsikorheri ma enka Sakeo arhinhempka, ima tumina tánaticheri urhets'ïkurispti. 3Ka uéksïrempti Jesusini míteni, ka no úsïrempti antarherani jimpoka uánekua jánhasïrempka ka Sakeo no iót'arhaspti 4Jimposï uiriapti urhepani, ka p'ukutapurhu ma karharaspti Jesusini exekuekani, enka jimesï nitamapirinka. 5Enka Jesusi nitamani jápkia, erarhutaspti ka arhini:

–Sakeo, sóntku kétsentsï, jimpokani iásï chéni ják'orheaka.

6Sakeo sóntku kétsentaspti ka Jesusini tsípekua jinkuni chénjempo paspti. 7Ísïksï exerini, iámentuecha uénaspti Jesusini arhinhchani, uantaparini eska Jesusi k'amanharhint'atio ma niraspka ják'orheni. 8Sakeo jauaraspti ka Achani arhispti:

–Acha exe, no jatsikorherichani íntsauaka jima teruk'ani eskani xáni ampe jatsikorheka; ka ekani nemani méni isï euakorheka, jima t'ámu xanhari k'uanhaskukuntaaka.

9Jesusi uantaspti:

–Íni k'umanchekuarhu p'ímutantskua iásï janosti, jimpoka i achetit'u Abraniri sïrukueska. 10Jimpoka acheti Uáp'a imanisï juka jirinhantani ka p'ímutant'a'ni enka tsînchetini jápka.

Tumineri uantantskua

11Kurhanhaxapti ampe enka Jesusi uantani jápka, ka uantantskua terukutarantskua ma aiankuaspti, jimpokaksï niáraxapkia Jerusaleni ka ima enkaksï kurhani jápka eratsepaxaptiksï eska Diósïri irechekua xarharapirinkia.

12Arhiaspti: “Jarhaspti acheti ma enka irechecheri sïrukuepka, enka iauani nípka máteru k'éri iretarhu irechekua p'irani, ka eska irecha úkata k'uanhatsentapirinka. 13Uérani jámani, témpeni imeri ánchekorherichani uantap'aaspti, mántani arhispti uánhachani tumina íntsaani ka arhiani: ‘Kánera je íni tuminani enkani jamperi junkuaska’ 14Enka úpka, imeri iretarhu anapuechaksï no xénhchasïrempti, ka chúnkutaramasptiksï axaani máru eskaksï uantapirinka: ‘Nóchi uéksïnka eskats'ïni inte juramucheaka.’”

15“Ka náuek'i ísï, ima irecha únhaspti, ka imeri iretarhu k'uanhatsentaspti. Enka na niántapka, ánchekorherichani uantap'atarkorheaspti, imechani enka tumina íntsaapka, mítekuekani tuminaksï náxannhachani antaraspi. 16Ma uénaspti niárani ka uantani: ‘Tata, chéti tumina témpeni xanhari jukari antasti.’ 17Irecha arhispti: ‘Kánekua sési, ampakiti ánchekorheriskari; ka jimpokari sapichu ampe no sïpaska, juramutikini úxaka témpeni iretecharhu.’ 18Máteru janospti ka uantani: ‘Tata, chéti tumina iúmu xanhari sánteru antasti.’ 19Imantu arhispti: ‘T'úri iúmu iretecheri juramutiuaka.’”

20“Ka máteru junkuaspti uantaparini: ‘Tata, inteia chéti tumina. Sési jatsiakutini patsaska; 21chérheskakini, jimpokari uinhamarhetspesïnka, ka jukari jamperiri euap'entasïga, ka jimari p'ikuntasïnka enkari no t'u ánchekorhek'a.’ 22Jimak'ani irecha arhispti: ‘Ánchekorheri nómpemaru, chéti uantakuechani jimpok'ukini útacheaka. Enkari mítepka eskani uinhamarhetspesïnka, ka eskani jukari euap'entasïnka ka eskani jima p'ikuntasïnka enkani no ánchekorhek'a, 23¿Antirisï no jima patsapi tuminani enka antani japirinka, ka antakua jinkunirini íntskuntani enkani janonkuapirinka?’ 24Ka arhiaspti imechani enkaksï jima jápka: ‘Euantsï je tumina ka imani íntsku je enka témpeni xanhari sánteru antaka.’ 25Imaksï arhispti: ‘Tata, ¡Inte témpeni tumina kámaxatia!’ 26Irecha arhiaspti: ‘Arhixakachkaksïni, eska ima enka jatsika, sánteru intsïnhaaka; ka ima enka no jatsika, imani jamperi euanhantaati enka sánisï jatsika. 27Ka imechani enkats'ïni ikiachek'a, enkats'ïni no jiókorhempka eskani imecheri irechepirinka, axu júaa je ka uántikuani je.’ ”

V. JERUSALENI

(19.28—24.53)

1. Jerusaleni anapu úkua

(19.28—21.38)

Jesusi Jerusaleni inchaakusti

(Mt 21.1-11; Mk 11.1-11; Jn 12.12-19)

28Ísï uantarini, xanhari jatant'a'spti Jerusaleni nirani. 29Enka Betfage ka Betania niárani jápkia, juátarhu ísï enka Olibu arhinhak'a, tsimani jurhenkorherichani axaaspti, 30arhiaparini:

–Ni je imani ireta sapichurhu enka ixu jurhimpitku jaka, niáratinku, jima jauati ch'anchaki ma jótakata, enka nótki nema jatani jaka, kuerata je ka jua je. 31Ka ekaksïni nema kurhamarheska ¿Antits'ïsï kueratani jaki? Arhi je eska Acha úrakuekaxaka.

32Jurhenkorherichaksï niraspti ka iámu ampe ísï jarhaspti eska Jesusi na arhiapka 33Enkaksï ch'anchakini kueratani jápka, kurhamarheasptiksï ima enkaksï ch'anchakini kánkorhempka:

–¿Antits'ïsï kueratani jaki?

34Imaksï uantaspti:

–Jimpoka Acha úrakuekaxaka.

35Ka pákusptiksï, ka imecheri chereparhakuechanksï tatsuparhakutini Jesusini jatsiraspti. 36Eska na Jesusi xanharapempka, ísïksï imecheri xukuparhakua xanhari jimpo tatsuntskakupasïrempti. 37Ka enka na úntapka Olibu juátani sáni kétsentani, iámentu imeri chúnkumatichaksï uénaspti jiuakorheni xáni tsípeni ka Diósïnksï k'éri ampe arhini iámentu milagruechani exearini. 38Ka uantasïremptiksï:

–¡Úch'akurakate irecha enka Achani jimpo jurhani jaka! ¡Sési jarhasti iámentu ampe auantarhu ka auantarhu k'éri arhinhasïnti!

39Jimak'anksï máru fariseouecha enkaksï jima jápka arhisptiksï:

–Jurhentpiri, xukaa chéti chúnkumatichani.

40Enka úpka Jesusi arhiaspti:

–Arhixakaksïni, enkaksï i pínasku jauaka tsakapuechaksï uinhachaati.

41Enka Jerusaleni niárani jápka, ka k'éri iretani exeni, Jesusi iretani uekuspti 42uantaparini: “¡Ekari iásï íni jurhiatekua t'út'u sési jakuani kurhankupirinka! Enka úka imaniri iásï no sésekua intsïnhaska kurhankuni. 43Jimpokaksïni nósesi járhati jurhiatekuecha janocheaka, enkaksïni chéti ikiatspiricha ópantaaka, ka uirhipkurhaatiksïni ka iápuru ísïksïni k'uaniraati, 44ka xerentskantaatiksïni. Iámentu jimini anapuechanksïni uántikucheati, ka nóksï ma tsakapu tsïntsikata jurak'uati, jimpokari no kurhankuska imani jurhiatekuani enkari juka p'urhempenhani.”

Jesusi tiósïo ampantskantasti

(Mt 21.12-17; Mk 11.15-19; Jn 2.13-22)

45Ka jimak'u Jesusi k'éri tiósïo inchaspti, ka petant'a'ani uénaspti imechani enkaksï ampe atarantani jápka, 46ka arhiaspti:

–“Karakatarhu arhisïnti: ‘Jucheti k'umanchekua uantamukukorhetarakueuati’, ka cháts'ï sïpak'urhecheri jirikorhekua úntaska.”

47Jesusi k'éri tiósïo mántani pauani jurhentpesïrempti, ka tátecheri urhets'ïkuricha ka juramukua jurhentpiricha ka ireteri achechat'uksï jirinhakuntaxapti nénaksï uántikuni. 48Ka nóksï ampe ma xékuntasïrempti jimpoka iámentu jinkuntku janhaspka kurhanhani enka ima uantempka.

Currently Selected:

Sáni Lúkasï 19: DKPJ

Highlight

Copy

Compare