Efesios 5
5
1Ísï jimbo Diósïni jáma je, eskaksï uájpa xénhchakatecha, 2ka xénhchpera je ísï eskaksïni Krístu na xénhchajka ka chánksïni jimbo tsípekua íntspesti, ima ísïsti eska Diósïri sési jásï p'untsumekua kéjtsïtakata.
3Eskajtsï na jimbo Diósïrika; méntku ásï jamberi uanda je ísku jánhchakua ambe, iámendu nósesi jásï ambe o ambe kánhchakua ambe. 4Ka ásï jáma je ísku ambe ma uandani ch'anach'anameparini, ísku ambe uémuskorheni enga nósesi jaka, jinijtsïsï sánderu sáni diósïmaiamukua arhijpentaaka. 5Ka méntku mítetini ja je eska nónema p'iuaka Krístueri ka Diósïri irechekuani enga ísku jándiuaka o no kaxumbeni, o ima enga jatsikorhenhchakuani ambe k'éri exejka, jimboka ima máteru ambeni k'éri úni jarhasïnga.
T'íntskuarhu irekorheni
6Eskaksïni nónema ísku ambe ma arhiparini tandosï úntaaka, jimboka Diósï no kurhandirechani ikiakuasïnga. 7Ásï jáma je imecha jinguni kúngorheni. 8Jimbokajtsï cha urhetku pájpakandu irekaxapka, ka iásïjtsï Achani jimbo t'íntskuarhu irekaxakaia. Ísï jimbo t'íntskua uájpeni ireka je; 9jimboka t'íntskua kaxumberpesïnga ka úrpeni eska Diósï na uéjka ka ísï jámani eska néka. 10Exe je ambesï Acha jaiapanhentajki. 11Chájtu ásï imani ambe u je enga no marhuajka eskaksï ima engaksï pájpakandu jaka, sánderu sáni xarhatakua je ambeksïsï nósesi úni jaki. 12Nóchka k'uratsekorheski uandani jamberi andi ambe engaksï sïpatekuarhu újka; 13k'óru iámendu ambe enga t'íntskua t'íntskakuajka, ambantkuksï xarharasïndia. 14Jimboka iámendu ambe enga mítekorhejka t'íntskuesïndi. Jimbosï uandanhajti:
“Tsínharhi t'u engari k'uíni jaka,
ka jurajkua uarhirichani ka tsíntsï
ka Krístukini t'íntskaracheati.”
15Ísï jimbo, exekorhe je néna engajtsï irekajka; ásï no míakua jukarini irekorhe je, sánderu sáni míakua jukarini ireka jeia. 16Sési marhuataa je jurhiatechani, jimboka iásï kánekua nósesi jándekorheska. 17Ísï jimbo, ásï no míakua jukarini jáma je, jinijtsïsï jánhaskaaka Acha ambesï uéjki.
18Ásï kaui je, jimboka inde tsîtpiriska; sánderu sáni jinijtsïsï Espiritu Sántuni uinirhekorheaka: 19Iámendu jakajkuticheri pirekuechani ka k'éri ambe arhikuechani pireaparini jáma je. Ka sésimendu andanheantsï je Achani pirekuni ka kústakuni, 20ka méntku iámendu ambe jimbo Diósï Táteni, Acha Jesukristuni jimbo diósïmaiamu arhi je. 21Krístuni janhanharhini, máteruechani janhanharhia je.
Temungurhirichani arhiani
22Uarhiti acheti jémbani sésimendu janhanharhi ísï eskaksï Achani na janhanharhijka. 23Jimboka acheti uarhiti jémbani urhejtsïkusïnga, ísï eska Krístu jakajkuticheri tángorhekuani na éjpueni jakuaka urhejtsïkuani, ka jakajkutichaksï anhanhatakueni jarhasti, ka Krístu jakajkuticheri p'ímutantspiristi. 24Ísï eskaksï jakajkuticha Krístuni na janhanharhijka, uarhitichajtu iámendu ambe jimbo uámbani janhanharhi.
25Tatecha, uarhitichani xénhchakorhea je, ísï eska Krístu jakajkuticheri tángorhekuani na xénhchajka ka imechani jimbo tsípekua jamberi íntspesti. 26Íni ambe ísï ústi imerirakorheni ka imeri uandakua jimbo pímpinhajkuntasti, 27ka sési mereari xarhatakorhentani; eska no nósesi eraakorheaka o uachoni ambe o xásï ambe, sánderu sáni eska pímbinhaxeaka ka sésimendu jáxeni. 28Tatechaksï uarhitichani ísïsï jatsiti xénhchaani, eskaksï jándiojku na xénhchakorhejka. Ima enga uarhiti jémbani xénhchajka, imasï xénhchakorheni jati. 29Jimboka nómeni nema jandiojku jatini ikimchakorheska; jinisï jamberi sési t'irejti ka kánekua xénhchakorheni, ísï eska Krístu jakajkuticheri tángorhekuani na xéani jarhajka, 30jimbokachi juchajtu Krístueri anhanhatakueska. 31Ísï jimbosï ts'iuerati tátjembani ka amambani jurajkuati ka tembuchaati ka uarhiti jémba jingunksï májkuentaati. 32I ambe enga no uánekua mítenhapka kánekua k'éri ambesti: Krístueri ka jakajkuticheri tángorhekueri ambesïni uandani jaka. 33Ka cha sánderu sáni uarhitini xénhchakorhe je, eskajtsï cha na xénhchakorhejka; ka uarhiti uámbani janhanharhi.
Currently Selected:
Efesios 5: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.