2 Timoteo 2
2
Tekantskua kánekua marhoasïndi
1Jucheti uátsïti uinhapentsï Jesukristueri kóntperata jimbo, 2ka indeni ambe engakini uánekuechani japarini jurhendaka, máteruechani ísï míndaa, eskaksï uánekuechani jurhendantauaka.
3P'íkukorhentsï chéti nósesi nitamanhchakuechani eska Jesukristueri ambakiti p'urhejkuti ma. 4Nóma p'urhejkuti enga íntskukorhentajka, ísku ambe ma míani jarhasïndi, imeri urhejtsïkurinkusï míani jarhajti sési marhuakuni. 5Ístu ch'anari ma íntskukorhentasïndi sési ch'anani ka tátsekua andakua intsïnhasïndi. 6Ka tarheri májtu enga echerini ánchetaaka, k'uanisïndi eska ima urheta intsïnhaaka p'ikuntskata. 7Sési eratsentsï íni ambe engakini arhini jaka ka Achakini iámendu ambe jánhastaati.
8Míantsï Jesukristuni enga tsíntaka, enga Dabiri sïrukuepka, ísï eska na arhijka ambakiti aiangperakuarhu engani ji arhijtsïkpejka. 9Ka ambakiti aiangperakuani jimbosïni xáni nósesi nitamakorhenchani jaka ka tiámu tepekukata jimbo jotakata jaka, eska nosési úri ma, k'óru Diósïri uandakuani no néma úati jótani ka p'ínguni. 10Diósïri erakukatecha jimbosïni tekaantka kómu nitamakorhekuechani ka ísïksï indejtu p'ímutanhantati ka Jesukristuni jinguniksï irentaati.
11I ísïsti:
Ekachi Krístuni jimbo uarhiaaka, ístuchi Krístuni jínguni irekaaka;
12ekachi tekantaska nósesi nitamakorhekuechani, Krístuni jingunchi juramuaka;
Ka ekachi no míteni uandaaka, imajtutsïni no míteni uandaati;
13Na uéjkichi jucha Krístuni no kurhandirakuni, imajtsïni k'óru miáni jarhasïndi jimboka ima,
ma ambejkusï uandajka.
Ima no mómuntasïndi imeri aiatsperakuani.
Ambe enga Timoteu úaka
14Míatantaa íni ambe ka Diósï japarini jurhendaa ka eskaksï no arhirperani jauaka. Arhirperata nómbema marhoasïndi, jinijkusï nósesi p'ikuastpejti ne enga kurhauaka. 15Jángorhentsï Diósïni sési p'ikuastani. Ísï eska Diósïni ánchekorhekuni enga no k'uratsekuejka imeri uandakua etsakuni. 16Ísku k'urha ísku jarhati uandakuechani, jimboka ne enga imani ambe uandaparini jámka sánderu arhisïndi no janhanharhini Diósïni, 17ka xárhati uandakua pamenchakueni etsakurhipasïndi. Ísï jámaspti Imeneo ka Filetu, 18támu ísïksï uandaparini jámasïrempti eskanha tsíntskua nitamaskia, ka ménderuenksï jakajkutpeni jakajkukuani. 19K'óru Diósï sésimendu úskusti ambe enga karakata jaka: “Acha mítetixati nésï ima jínguni” ka “Ne enga kómu arhijka Achani, jarhare nósesi jásï ambeni.”
20K'éri k'umanchekuarhu ma, mámaru jásï t'irekua atarakuechaksï jarhasïndi, máruksï tiámu tiripitiristi ka máruksï chkáriristi ka máruksï k'uerekueristi: Máruksï k'uinchekuarhu úranhasïndi ka máteruksï mándani pauani úrakuesti. 21Eka nema p'íngukorheska ka no k'amanharintani, ísïuati Diósïni jinguni eskaksï sési jásï atarakuecha tiripitiri, ka pímpinhaxeati ka sési marhuakuati Achani iámendu ambe jimbo.
22Ásï ísku ambema eratseni ja eska tumbi ma na eratseni jarhajka, jángorhe kaxumbeni ka jakajku, ka xénhchpe ka sési jásï mintsita jinguni uandajpa Achani. 23Ísku kurha arhirperatechani, mítetixakari eska uarhiperata k'amarhusïnga. 24Ka Diósïri jántspiri ma no jindesti eska uarhiperatarhu ísï jámaaka, jima ménderueni sési arhijpe ka jurhentpe ka tekaantsï. 25Ka iatsitakuarhu ka sési arhiparini xukaani no kurhandirechani, mintsikaparini eska Diósï sési jájkuantauaka ka eskaksï míteaka ambakiti aiangperakuani. 26Ka imaksï jiáni exekorheati néna uérakuni no ambakitini enga katsijkuatini jápka.
Currently Selected:
2 Timoteo 2: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.