2 Pedro 3
3
Acha ménderu junguati
1Jucheti pámpiricha, tsimani xanharistia engaksïni karacheni jámkia; íni tsimani karakatecharhuksïni uékaska míakua jatsikuni. 2Mia je ambe engaksï Diósïri uandaricha ióntki uandapka, ka mia je juchari Acha p'ímutantspiriri juramukuani engaksïni imeri uandakua páricha jurhendaka.
3Ka méntku míani ja je eska jiájkani enga jurhiatekua k'amakurhiaka, máruksï juuati engaksïni teresmarhuaka, ka tsitiatiksï néna uéjkinini irekani. 4Ka teresmarhuparinksïni kurhamarheati: “¿Nani jarhaskia Krístu enga aiakorhepka junguani? Juchari tátechaksï uarhistia, ka parhakpeni jimajkantki uératini enga kueranhaaka útasï méntkueni jánhaskorhesti.” 5Uékantkuksï no uékasïndi jiókorheni eska Diósï imeri uandakua jimbo auandani úska, ka eska echerini uémaska, ka itsï jimbo mámaru jántskarani. 6Ka jimbosï ióntki iurhentpepti. 7Ka imani uandakua jimbo iásï anapu auanda ka echeri, chpíri jimboksï k'amajkunhaati. Jiájkani enga Diósï arhinharhikpeaka, jiájkani engaksï k'amajkunhaaka iámendu ima engaksï no ambarhaka.
8Pámpiricha, mia je eska Achani jimbo ma jurhiatekua ísïska eska ambe míli uéxurhinicha, ka eska míli uéxurhinicha ísïska eska ma jurhiatekua. 9Acha no ióndasïndi íntspeni ambe enga aiatspejka, no ísïsti eskaksï máru na uandajka eska ióndasïnga, Diósïksïni jinisï tekaachentajti, jimboka ima uékasïnga eska nónema uarhiaka, sánderu sáni jinisï uéjti eskaksï iámenduecha Diósïni andarhentaaka.
10Ima jurhia enga Acha junguaka, sïpajkurheni janonguati; ima jurhiatekua k'éri ma charancheati ka auanda nóneuati; ka chpíri iámendu ambe kurhiraati ka parhakpeni méntku k'amajpeati.
11Enga iámendu ambe ísï k'amajpanhaaka, eratsentsï je néna enga k'uanijka Diósïni jinguni irekani, kaxumbe je. 12Jinguntku ja je erokorheni imani jurhia enga Diósï arhinharhikpeaka, ima jurhiatekua auanda ka iámendu ambe k'amajpeati. 13K'óruchi jucha jimbanhe auandani ka jimbanhe echerini erokorhexaka engajtsïni Diósï aiacheka, jima enga iámendu ambe sésiuaka.
14Ísï jimbo, pámpiricha, engajtsï jamberi íni ambe erokorheni jauaka, jángorhentsï je Diósï jinguni sési jarhani, ka eskajtsï nómbe ma arhikua jukaaka. 15Eka Acha tekaantani jaka, ísï exe je eskajtsïni iámenduechani uékaxaka p'ímutantani. Ísï eskaksïni juchari erachi Páblu na karacheka, imani mímixekua jimbo enga Diósï íntskuka. 16Páblujtu imeri karakatecharhu íri ambe uandaxati. Nájkiruka jaka máru ambe enga úkua jukaka kurhanguni, engaksï no jánhaskaticha ka ima engaksï tsimanitsimaneajka támisï kurhanguntajka, ísï eskaksï máteru Diósïri karakatechantu na támisï kurhanguntaka, indeni jimboksï tsînchekorheati.
Maiatperakua
17Chájtsï pámpiricha, íni ambe aiangunhaskia, ísï jimbo jinguntku ja je, ka ásï jurajkutakorhe je eskaksïni no ambarhati k'uiripuecha támisï páaka, ka Diósïntsï nóteru mintsikani. 18Acha p'ímutantspiri Jesukristuni jángorhe je sánderu míteni, imeri kóntperakua ka mímixekua jimbo. Jesukristunchi k'éri ambe arhiaka iásï ka méntkisï. Ka ísï.
Currently Selected:
2 Pedro 3: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.