2 Pedro 2
2
Jurhentpiri eratakorhericha
1Ka iretarhuksï ióntki uánekua diósïri uandari eratakorhericha jámaxapti, chánksïntuksïni uánekua jurhentpiri eratakorhericha niáracheati engaksïni no Diósïri ambe jurhendaaka, ka nósesi ambeksïni jurhendaati. Ka Achanksï jamberi, enga imechani euajpeantaaka nóksï jiókorheati, ka ísï jámanksï sóntku k'amajkukorheati. 2Uánekuaksï chúxapauati ka ísï jámaatiksï eskaksï ima námendu jánhchajka, ka ambakiti xanharinksï nósesi ambe arhiati. 3Ka tuminaksïni euarhenhchani, jándirachentaatiksïni ka úraatiksïni; k'óru jarhastia nénaksïsï arhinharhikunhaa, ka nóksï úati uéjkuni imani enga arhinharhikuauaka.
4Diósï imani ánjelichani jamberi no púakuantaasti engaksï k'amanharhintapka, sánderu jamberi iauani kénhekua uekanhaaspti ka pájpakandu mínhaani, jima jatsiani imani jurhiatekua jamberi enga arhinharhikperanhaaka. 5Tua anapuechantu no p'amojkuaspti, ka Noéntku ka máteru iúmu tsimani k'uiripuechani tsípiti jurajkuaspti, jimboka Noe arhijpesïrempka eska kaxumbenhantapiringa, jiájkani engaksï no ambarhati k'uiripuechani iurhentpekua páapka; 6Diósï Sodomani ka Gomorrani t'upuri jáputerku jurajkuasti, ka no ambarhati k'uiripuechani exeraasti ambe engaksï úkorhenchapiringa; 7ka Lótini enga kaxumbitipka, p'ímutantaspti jimboka ima no ambarhati k'uiripuechani uandanheakuasïrempka engaksï ísku jánhchempka. 8Inde achamasï kaxumbiti enga no ambarhati k'uiripuechani exeani járhempka, mándani pauani kánekua uandanheasïrempti nósesi ambe exerini ka kurharini.
9Íni jimbo, Diósï xarhataxati eska ima p'amojkpitichani p'íjpantaasïnga engaksï ts'éjkunhaaka, ka imani jurhiatekua enga Diósï arhinharhikpeaka no ambarhati k'uiripuechani maiampetarauati. 10Ka sánderia imechani engaksï ísku jánhchakua ambe tsitijka, ka Achantuksï no kurhandirakunhchani.
Imaksï jurhentpiri k'éramakorhericha, no k'uratsekua jukaricha, sési jásï uiuinharhatichaksï no chésïndi útakuani. 11K'óruksï Diósïri ánjelicha engaksï sánderu uinhapekua ka juramukua jatsika, imaksï Diósïni japarini no tekaasïndi indechani nósesi arhiani. 12Ka íchkaksï k'ória, manakorherinksï jámasïndi engaksï no kurhangujka, engaksï míndakata jaka andangunhani uándikunhani, engaksï nósesi arhijka imani ambe engaksï no míteka, ka manakorherinksï k'amandeati.
13Imaksï májkueni nósesi kánhantaati eskaksï na kámpejka. Sésiksï p'ikuarherasïndi ísku ambe niátani náuejkiksï xénhani jarhani; k'uratsekua ambesti engaksïni pámbetajka t'ireni, jimbokaksïni pájtamasïnga nósesi xarharani. 14Nóksï úsïndi uarhitini ma no atamarheni, ka nóksï niáchasïndia k'amanharhintani, ka atamarhetaasïndiksï imechani engaksï nótki újka p'íngukorheni, sésimenduksï mítekusti néna ambe euakorhpeni. Indeni jimboksï ikimenhaati. 15Ambakiti xanharinksï jurajkusti, ka támu ísïksï nirastia, Balami, Bosori uájperi xanhari jimbo, ima tsípesïrempti enga maiamunhempka nósesi ambe úrini, 16k'óru imeri no kurhandirakua jimbo xukanhasti. Ch'anchaki ma uandajpaspti ka arhini eska nóteru nósesi ambe úni japiringa.
17Indeksï jurhentpiri eratakorhecha, ísïsti eskaksï itsarhuecha engaksï k'arhingukia, ka eskaksï janikuecha enga akuitse janikua pájka, indeksï sánderu kánekua pájpakandekua patsamenhaxati. 18Útantasïndiksï ka ísku ambeksï uémuskorhesïndi, ka ménderuksï nósesi jánhchataasïndi imechani engaksï k'amanharhintskuani nóna jarhareani jaka. 19Arhiasïndiksï eskaksï nóteru katsijkunhatini jauakia, ka jiniksï ima sánderu katsijkukata jarhani; jimboka néma, ambe enga inchajtsïmantatini jauaka, ima ambe katsijkutixati. 20Enga jurajkunhajkia íni parhakpeni anapu nósesi jángua ambe, jimbokaksï Acha ka P'ímutantspiri Jesukristuni míteskia, ka ménderu nósesi ambe únhani, inde ambe andajpesïndi ka sánderu nósesi pakatpeni. 21Sánderu sésipirindi eskaksï ambakiti xanharini no mítepiringa, eska indeni pímbinhasï juramukuani engaksï jurhendanhaka, tátsekua mítetini jurajkuni. 22Imaksï ísï jámasti eska na uandanhajka: “Uíchu jiuasïndi ka jimajku ántskantani.” Ka ístu: “Eka kúchi ma jikuaranhapiringa sóntku atsïmurhu inchamentapirindi.”
Currently Selected:
2 Pedro 2: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.