Amos 1
1
1Nēdi ge mîdi Amosi, ǃās Tekoas di gūǃûi-aogu ǀgui ge ib dide. ǁÎb ge Judab gao-aob Usiab tsî Israeli gao-aob Jerobeammi Joasi ôab tsîkha di ǂgaeǂguis ǁaeb ǃnâ, ǀgam kurikha ǃhūǂgubib nî hâs aiǃâ Israels xa hâ ai-e ge mû.#2Gao. 15:1-7; 2Kro. 26:1-23; 2Gao. 14:23-29
ǃKhūb ge Israeli ǁanǁare-aoǁaede ra ǀgoraǃgâ
2Amosi ge ge mî:
“ǃKhūb ge Sionsa xu ra ǃguru,
dommi âbab ge Jerusalemsa xu ra ǀō kai.
ǃÛi-aogu di ǃû-aidi ge ra ǂnâ,
Karmelǃhommi di ǂaob ge ra ǂnâ.”#Joe. 3:16
Siriab
3Nētib ge ǃKhūba ra mî: “Damaskus ge ǃnākorobe ge ǃûǂam tsî ta ge ǁnās ǃaroma ǁîn di ǁkharaba ǁkhaedawa tide. ǁÎs ge Gileada ǀuridāǃnâ-ūxūdi ǀkha ge dāǂkhū.#Jes. 17:1-3; Jer. 49:23-27; Sax. 9:1 4ǁNā-amaga ta ge gao-aob Hasaeli gao-ommi ai ǀaesa nî sîǁnâ tsîs ge ǁkhui-omgu Benhadadi diga nî khauǃkhū. 5Tita ge ǃnâu-amdi Damaskus dao-amdi dide nî khôaǂkhū. Tsî ta ge Avenǃgoaǃnāb di ǁanǂgāsaben tsî Bet-Edens ǂgaeǂgui-aob tsîna nî hîkākā. Siriaǁîna ta ge ǃkhōsabese Kirǃhūba ǃoa nî ūǃgû”
tib ge ǃKhūba ra mî.
Filistiab
6“Gasas ge ǃnākorobe ge ǃûǂam tsî ta ge ǁnās ǃaroma ǁîn di ǁkharaba ǁkhaedawa tide. ǁÎs ge hoaraga khoena ǃkhōsabese ǃgû-ū tsî ǁîna Edomma ge māǁnâ.#Jes. 14:29-31; Jer. 47:1-7; Ese. 25:15-17; Joe. 3:4-8; Sef. 2:4-7; Sax. 9:5-7 7ǁNā-amaga ta ge ǀaesa Gasas ǂnubiǂgoagu ai nî sîǁnâ tsîs ge ǁîs di ǁkhui-omga nî khauǃkhū. 8Tita ge Asdods tsî Askelons tsîra di ǂgaeǂgui-aokha nî hîkākā. Ti ǃomma ta ge Ekrons ǃoagu nî ūkhâi tsî ǃgau hâ Filisteǁîn ge nî ǁō”
tib ge ǃKhūb Eloba ra mî.
Tirus
9“Tirus ge ǃnākorobe ge ǃûǂam tsî ta ge ǁnās ǃaroma ǁîn di ǁkharaba ǁkhaedawa tide. ǁÎs ge hoaraga khoena Edomma ge māǁnâ tsî ǃgâsan di ǃgaeǀhaos xa ǂâi tama ge i.#Jes. 23:1-18; Ese. 26:1—28:19; Joe. 3:4-8; Sax. 9:1-4; Mat. 11:21-22; Luk. 10:13-14 10ǁNā-amaga ta ge ǀaesa Tirus ǂnubiǂgoagu ai nî sîǁnâ tsîs ge ǁîs di ǁkhui-omga nî khauǃkhū”
tib ge ǃKhūba ra mî.
Edommi
11“Edommi ge ǃnākorobe ge ǃûǂam tsî ta ge ǁnās ǃaroma ǁîn di ǁkharaba ǁkhaedawa tide. ǁÎb ge ǁîb di ǃgâsab Israela gôab ǀkha ǃgôaǃgon tsî ǁîba ǀkhomxa tama i xui-ao. ǁÎb di ǁaib ge ǀûs ose ge aiǃgû tsîb ge ǀkhaoǂgaoxasib âba ǀamǀam tama ge i.#Jes. 34:5-17; 63:1-6; Jer. 49:7-22; Ese. 25:12-14; 35:1-15; Oba. 1-14; Mal. 1:2-5 12ǁNā-amaga ta ge ǀaesa Temanni ai nî sîǁnâ tsîs ge Bosras di ǁkhui-omga nî khauǃkhū”
tib ge ǃKhūba ra mî.
Amonni
13“Amonǁîn ge ǃnākorobe ge ǃûǂam tsî ta ge ǁnās ǃaroma ǁîn di ǁkharaba ǁkhaedawa tide. ǁÎn ge ǀgamǀkhā khoedi Gileadi dide ge ǁaraǁkhowa-am, ǁîn di ǀkhariban nî kaikaise.#Jer. 49:1-6; Ese. 21:28-32; 25:1-7; Sef. 2:8-11 14ǁNā-amaga ta ge ǀaesa Rabas ǂnubiǂgoagu ai nî sîǁnâ tsîs ge ǁîs di ǁkhui-omga nî khauǃkhū. ǁNā tsēs torob dis aib ge ǃauba nî hâ tsîb ge ǃkhamma ǁgaoǂoas khami nî khâi. 15ǁÎn di gao-aob tsî ǁîb di ǂamkhoegu tsîgu ge ǃkhōsis ǃnâ nî ǃgû-ūhe”
tib ge ǃKhūba ra mî.
Currently Selected:
Amos 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.