Josua 3
3
Israelǁîn ge Jordanna ra ǃgâu
1Sao ra tsēs ain ge Josuab tsî hoaraga Israelǁîn tsîna ǃnauǁgoaga khâi, Sitims hâǃkhaiba xu ǃgû, Jordanni tawa sī tsî ǁnāpa ǃāban nî ǃgâu ǁaeba ge ǃâu. 2ǃNona tsēdi khaoǃgâ gu ge ǂgaeǂgui-aoga hâǃkhaiba ǃgûǃnâǃganu, 3tsî khoena ge mîmā: “Pristergu ǃGaeǀhaos ǂGaes ǃKhūb, sadu Elob disa tani hâ ǃkhaisa du ga mûo, hâǃkhaiba khôakhâi, î ǁîga sao. 4Sadu ge noxopa nēpa ge hâ tama hâ i tsî ǁnā-amaga gu ge ǁîga ǃgû du nî daob ai nî ǂgaeǂgui du. Xawe tā ǃGaeǀhaos ǂGaes tawa ǀgū; ǁaubexa ǀgui kilometeri ǃnūsiba ǁîsa xu hâse sao.”
5Tsîb ge Josuaba khoen ǁga ge mî: “ǃAnuǃanusen du re, ǁarib ǃKhūba buruxa dīna sadu ǁaegu nî dī xuige.” 6ǁNās khaoǃgâb ge pristerga ge mîba, î gu ǃGaeǀhaos ǂGaesa ūkhâi tsî khoena ǂgaeǂgui, o gu ge ǁîb ge mî khami ge dī.
7Ob ge ǃKhūba Josuab ǃoa ge mî: “Nētsē ta ge nî dī, Israelǁîn hoan kai ǃgôasiba nî mā tsi ǃkhaisa, tsîn ge ǁîna nî mûǂan, Moseb ǀkha ta ge hâ is ǁkhās khami ta sats on ǀkha hâ ǃkhaisa. 8ǃGaeǀhaos ǂGaesa ra tani pristerga mîba, î gu ǃāb tawa gu ga sīo xanuǂgâ tsî ǃgarib ǀgūse mâ.”
9ǁNās khaoǃgâb ge Josuaba ǁaes ǃoa ge mî: “Nēpa hā, î du tare-eb ǃKhūb, sadu Eloba ra mîsa ǃgâ. 10ǁÎb ge ǀgū du ra khami Kanaanǁîn, Hetǁîn, Hivǁîn, Perisǁîn, Girgasǁîn, Amorǁîn tsî Jebusǁîna nî ǁgariǂui. Ûitsama Elob sadu ǁaegu hâ ǃkhaisa du ge nî ǂan, 11ǃGaeǀhaos ǂGaes, hoaraga ǃhūbaib di ǃKhūb dis ga Jordanna sadu aiǃâ ǃgâuo. 12Disiǀgamǀa khoega nēsi ǁhûi, ǀguiba mâ ǃhaos Israels dis hoasa xu. 13ǃGaeǀhaos ǂGaes hoaraga ǃhūbaib di ǃKhūb disa ra tani pristergu ga ǁgammi ǃnâ a dā, ob ge Jordanna nî dâuǀû, tsîb ge dâuǁgôaxa ra ǁgamma ǁkhaemâisase nî mâ.”
14ǁAes ge Jordanǃāban nî ǃgâuse hâǃkhaiba xu ǂoa, o gu ge pristerga ǃGaeǀhaos ǂGaes ǀkha ǁîn ais ai ge ǃgû. 15ǃGaos di ǁaeb ge ge i, ǁîb aib Jordanǃāba ǁnaetisase ǃgarib âba ra dâu-īǀkhāba. Pristergu ǃāb ǃnâ ra ǂgâ 16hîab ge ǁgamma dâuǀû tsî ǁkhaemâisase ge mâ, Saretans xōǀkhā ǂnôa ǃās Adams kōse. ǂŌxahurib ǁga dâugaru ǁgammi ge hoaragase ge ǁkhae-oahe tsîn ge khoena Jerixos ǀgūse ge ǃgâu ǁkhā. 17ǁAes ǃāba ǂnâsa ǃhūb ai ra ǃgâu hîa gu ge ǃKhūb di ǃGaeǀhaos ǂgaesa ra tani pristerga ǂnâsa ǃhūb ai, ǃāb ǁaegu ge mâ i, hoaraga ǁaes ge ǃgâutoas kōse.
Currently Selected:
Josua 3: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.