Josua 2
2
Josuab ge ǃkhē-aokha Jerixos ǃnâ ra sîǂgā
1Josuab ge ǀgam ǃkhē-aokha, ǀhôagao ǀgaub ai kha Kanaanǃhūb tsî Jerixos xa sī nî ǂanǂuise Sitimsa xu ge sî. ǁÎkha ge ǃās ǃnâ kha ge sī, o tsuxuba Raxab, ti ǀon hâ ǀai-aos oms tawa sī ge ǁom.#Heb. 11:31; Jak. 2:25 2Jerixos gao-aob ge Israelǁîna xu kha ge khoekha tsuxuba ǃhūb xa nî ǂanǂuise a hā ǃkhaisab ge ǁnâuo, 3Raxabsa ge haisiba: “Sa oms ǃnâ hâ khoekha ge hoaraga ǃhūba kha nî ǂanǂuiǃnâse go hā, xuige ǁîkha ǂoaxa-ū.”
4-6Os ge ǁîsa ge ǃeream: “ǀGam khoekha ge ti oms tawa go hā, xawe ta ge mâpa xu kha go hā ǃkhaisa a ǀū. ǁÎkha ge soresǂgâb ǀkha, ǃās di dao-ams nî ǂganamhes aiǃâ go ǃgû. Tita ge mâpa kha ra īsa a ǀū, xawe ǃhaese go ga ǁîkha a sauru, o go ge ǁîkha nî saoǁae.” (Raxabs ge ǁnā ǀgam ǃkhē-aokha oms ǂamǃnâ ǂoa kai tsî oms ǂamǃnâs ge ǁgui hâ i ǃapihain ǃgaeǀkhādi ǃnaka ǁîkha ge sâu.) 7Gao-aob khoegu ge ǃāsa xu ge ǂoa tsîs ge ǃās di dao-amsa ge ǂganamhe. ǁÎgu ge ǁnā ǃkhē-aokha Jordanni ǃgâunas kōse ge ôa.
8ǁNā ǃuis ge Raxabsa ǃkhē-aokha nî ǁgoes aiǃâ oms ǂamǃnâ ǁîkha ǁga ǂoa 9tsî ge mî: “ǃKhūb ge nē ǃhūba sado a mā ǃkhaisa ta ge ǂan; ǃhūb di khoen hoan ge sadu xa kaise ra ǃao. 10Mâtib ge ǃKhūba Egipteba xu du ge doeǂoao, ǃgâu ǁkhā du nîga ǀApahuriba ǂnâǂnâ ǃkhaisa da ge ge ǁnâu. Mâti du ge Amorǁîn gao-aokha, Sihonni tsî Ogi tsîkha Jordanni nauǃani ǃgam ǃkhais tsîna da ge ge ǁnâu.#Eks. 14:21; Num. 21:21-35 11ǁNāsa da ge ǁnâu, o da ge kaise ge ǃao. Sida hoada ge sadu xa kaise ge ǂkhabuǂâi. ǃKhūb sadu Elob ge ǀgapise ǀhommi ǃnâ tsî nēpa ǃhūbaib ai a Elo. 12Nēsi ǃKhūb ǀons ǃnâ nūba te re, sakho ta ge ǀkhomxaǃnâ khami kho ti surib tsîna nî ǀkhomxaǃnâsa, ǁgauǁgau-e mā te re, ǁî-i ai ta nî ǂgomǃgâ kho-e. 13Mîmâiba te re, ti îb tsî ti îs, ti ǃgâsagu tsî ǃgâsadi tsî ti surib hoaragaba kho nî sâuǂui ǃkhaisa. A da tā ǃgamhe re.”
14O kha ge khoekha ǁîsa ge mîba: “Mî khom go khami khom ga dī tama io, ab Eloba sikhom ûiba ū. Khoe-i xare-e du ga tare-e khom goro dī ǃkhaisa mîba tama i, o khom ge ra mîmâiba si, ǃKhūb ga nē ǃhūba mā da, o khom nî ǀkhomxaǃnâ si ǃkhaisa.”
15Raxabs ge ǃās ǂnubiǂgoab ǃnâ a omǂgāsa oms ǃnâ ge ǁan hâ i, tsîs ge khoekha mûǂuidaosa-u tsurib ǀkha ǁgôa kai, 16tsî ge mî: “ǃNâuxa ǀkharib ǃnâ-u ǃgû, î kho tā gao-aob khoegu xa ǀhao-ūhe. ǃNona tsēde ǁnāpa gaugausen, ǁîgu nî oaǀkhīs kōse; ǁnās khaoǃgâ kho ge sakho daoba a ǃgû ǁkhā.”
17O kha ge khoekha ǁîs ǃoa ge mî: “Sikhom ge sas go mîmâi kai khom mîmâisa nî dī, 18xuige sasa nēti dī re. Sadu ǃhūba da ga ǁnāǂam, o nē ǀapa tsuriba sikhomas go ǁîs ǃnâ-u ǁgôa kai mûǂuidaos ai ǃgaemâi, î sa îb tsî sa îs, sa ǃgâsagu tsî sa hoaraga surib tsîna sa oms ǃnâ ǀguipa ūhâ. 19Omsa xu ga ǂoa khoe-i hoa-i ge ǁî-i ǁōba aitsama ra ôa, ǁnās ge sikhom ǀhapi tidesa; xawe sas ǀkha oms ǃnâ hâ khoe-i ga ǂkhôahe, os ge ǁnāsa a sikhom ǀhapi. 20Khoe-es ga tare-e khom go sikhoma nēpa dīǃgûǀkhī ǃkhaisa mîba, o khom ge sas go dī khom nîse mîmâi kai khom mîmâisa xu a ǃnorasa.” 21Nēs ǃnâs ge ǁîkha ǀkha ge ǀhûǀgui, tsî ǁîkha ge ǃgû kai. Tsîs ge ǁîkha ge ǃgûo, ǀapa tsuriba mûǂuidaos ai ge ǃgaemâi.
22O kha ge ǃkhē-aokha ǃhomgu ǃnâ sī tsî ǁnāpa ge gaugausen. Gao-aob di khoegu ge ǃnona tsēdi ǁaeba gu ge ǁîkha hoaraga ǀkharib ǃnâ ôa tsî hō tama io, Jerixos ǁga ge oa. 23ǁNās khaoǃgâ kha ge ǃkhē-aokha ǃhomga xu ǂoaxa tsî ǃāba ǃgâu tsî Josuab ǁga ge oa. ǁÎkha ge ī ge xūn hoana mîba bi 24tsî ge mî: “ǃKhūb ge amase nē ǃhūb hoaragaba sada go mā. Hoaraga khoen ge kaise sada xa ra ǃao.”
Currently Selected:
Josua 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.