Joel 3
3
ǃKhūb ge ǁaede ra ǀgoraǃgâ
1“ǁNā tsēdi ǃnâ tsî ǁnā ǁaeb ai,
Judab tsî Jerusalems tsîra
mâsiba ta ga dī-unuo,
2o ta ge ǁaede nî ǀhaoǀhao
tsî ta ge ǁîde Josafatǃgoaǃnāb ǃnâ nî sī-ū.
ǁNāpa ta ge ǁîde nî ǀgoraǃgâ,
ti ǁaes Israels ǀkhan ge dīn ǃaroma.
ǁÎn ge ti ǁaesa ǃhao ǃhūgu ǃnâ ǀgaruǀgaru
tsî ti ǃhūba ge ǀgoraǃā.
3Tsîn ge ti ǁaes ǂama ǀkhūsa ge ao.
Aore ǀgôaban ge ǀai-aos ama ge māxū
tsî tareǀgôasa ǂauxûi-i ama ge ǁamaxū,
āb ǃaroma ǀgui.
4“Tare-e du tita ǃoagu ūhâ, sadu Tirus tsî Sidons tsî Filisteǁîn ǀkharib hoaragab dido? Tita du xū-i ǂama ra dīdawa-am ǂgao? Tita du ga ǀkhao, o ta ge tita sadu dība ǃhaese sadu danas ai nî ǁgôaxa kai.#Jes. 14:29-31; 23:1-18; Jer. 47:1-7; Ese. 25:1—28:26; Amo. 1:6-10; Sef. 2:4-7; Sax. 9:1-7; Mat. 11:21-22; Luk. 10:13-14 5Sadu ge ti ǀhaiǀurib tsî ti ǃhuniǀurib tsîkha ge ū, tsî du ge ti ǃgomǀgausa ǁuiba sadu tempelgu ǃnâ ge taniǂgā. 6Tsî du ge Judab tsî Jerusalems tsîra di ǁanǂgāsabena Grikeǁîn ai ge ǁamaxū; ǁîna du ge ǁîn di ǃhūba xu ǃnūse ge ūbē. 7Xawe ta ge tita ǁîna ǁnā ǃkhais ǁîna du ge ǁamaxūsa xu nî ǂoaxa kai, tsî ta ge sadu dīga nî dīdawa-am du. 8Tita ge sadu ôagu tsî sadu ôadi tsîna Judab khoen ai nî ǁamaxū, tsîn ge ǁîna sadu ôana ǃnūse hâ Sabeanǁîn ai nî ǁamaxū. ǃKhūb ge ǁnāsa go mî.
9“Nēsa ǁaedi ǃnâ ǂanǂan:
‘Torob ǃaroma ǂhomisen,
sadu ǁē-aoga ǂgaikhâi,
sadu toroǃkhamaoga ǀhaoǀhao, î gu ǃgûǂoaxa.
10ǃHūǃgao-ūdāde xu gôaga kuru,
î ǁara-ūdade xu ǁhâigôaga kuru.
Ab ǂkhabusab tsîna “ǁKhoa toro-aota” ti mî.#Jes. 2:4; Mix. 4:3
11ǃHae, î du hā,
ǂnamipe hâ ǁaedu hoado,
î du ǃgoaǃnāb ǃnâ ǀhaoǀhaosen.’ ”
ǃKhūtse sa toroǂnubisa ǁnāǀî sîǁgôa re.
12A di ǁaede ǂhomisen
tsî Josafatǃgoaǃnāb ǃoa hā.
ǁNāpa ǂnû tsî ta ge
ǂnamipeb di ǁaedi hoade nî ǀgoraǃgâ.
13ǃGao-ūgôaba sîsenūtsoatsoa,
ǃgaos ǁan hâ xuige.
ǂGâ, î du dāǃnâ,
ǀāǃnâǃkhaib ǀoa hâ xuige.
ǀĀǃnâxapagu ge go ǀoaǃnā,
ǁîn di ǁoreb a kai xui-ao.
14Kaise ǂgui ǂnubidi ge
mîǁguib ǃgoaǃnāb ǃnâ hâ.
ǃKhūb di tsēs a ǀgū xui-ao,
mîǁguib ǃgoaǃnāb ǃnâ.
15Sores tsî ǁkhâb tsîra ge go ǃkhae
ǀgamirodi tsîn ge go ǃnâǀû.
16 ǃKhūb ge Sionsa xu ra ǃguru,
dommi âbab ge Jerusalemsa xu ra ǀō kai,
ǀhommi tsî ǃhūbaib tsîkha ge ra ǀkhū.#Amo. 1:2
Xawe ǃKhūb ge ǁîb ǁaesa ǁhaiǁhâǃkhaise ība,
Israelsa ǀgaisa hâǃkhaise.
ǃKhūb ge ǁaes âba ra ǀkhae
17“O du ge tita ǃKhūta
a sadu Elo ǃkhaisa nî ǂan.
Tita ge ti ǃanu ǃhommi, Sionni ai ǁan hâ.
Jerusalems ge nî ǃanu ǃā,
ǃhaokhoen ge ǁkhawa ǁîs ǃnâ-u ǃkharu tide.
18“ǁNā tsēs ai gu ge ǃhomga
draibeǃhanagu xa nî ǀoa
tsî ǃnâugu hoaga goman xa.
Judab ǃāgu hoagu ge ǀoasa ǁgam-e nî ūhâ.
ǀAu-i ge ǃKhūb di omma xu dâuǂoa
tsî-i Sitimǃgoaǃnāba nî ǂnâ.
19“Egipteb ge nî ǃū-aisa ǃkhai kai
tsî Edommi ge nî ǀkhaiǃnâ ǃgaroǃhū kai,
Judab ǃhūban ge ǁnāǂam
tsî ǀhapio khoena ǃgam ǃkhais ǃaroma.
20Xawe Judab ge ǀamose nî ǁanǃnâhe
tsî Jerusalemsa ǃhaosa xu ǃhaos kōse.
21Tita ge ǁîn di ǀaoǂnâxūsa nî ǀkhao
tsî ǀhapixana ǀhapiose ūhâ tide.
Tita ǃKhūta ge Sionǃhommi ai nî ǁan.”
Currently Selected:
Joel 3: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.