2 Timoteub 2
2
ǂGomǂgomsa ǃkhamaob Xristub* Jesub dib khami
1Ti ǀnamsa ǀgôa, Timoteutse, Elob Xristub Jesub ǃnâ-u ra mā tsi ǀkhommi ǃnâ ǀgai re. 2ǂGui ǂgomǃgâhe hâ ǀhûǀguitimî-aon ge ǃkhō-am ǁkhāǁkhādi tidets ge ge ǁnâu. O nē ama ǁkhāǁkhāde ǂgomǂgomsa khoena ǁkhāǁkhā, în ǁîna nauna ǃaruǀî ǁkhāǁkhā re.
3ǂGomǂgomsa ǃkhamaob Xristub Jesub dib khami sida tsâb ǃnâ taniǀnamxase amǃnâxa. 4Toroǃnans ǃnâ ra ǃoaban hoan ge tsēkorobe ûib ǀkha ǁaeǁaesen tama hâ, ǁnās ka, on ǁîn di ǃkhōdana-aoba ǂkhîǂkhî tide xui-ao. 5ǂGamǂgamsenǀhurun di ǀnûgu-ao-i ge ǁguihe hâ ǁgaragu ǃoa i ga ǀnûgu tama io, dansa a hō ǁoa. 6ǀGaisase sîsen hâ ǃhanaǂgā-ao-i ǀgui-i ge ǂguro ǃgaos di ǂûn xa ǃgâiaǂgaob ǀkha a ǃorabasen ǁkhā. 7Nē ta ra mî xūn xa ǂâiǃgâ, ǃKhūb ǁîna ǁnâuǃās ǃaroma ǁnâuǃāba nî mā tsi xuige.
8Tātsēs tsîna tā ǀuru, Jesub Xristub, gao-aob Davidi ǃhaosa xu ǃnae tsî Elob xa ǁōba xu ge a ǂkhaiǂkhaiheba. Nēs ge ǃGâiǂhôas aoǁnâ ta rasa. 9Tsî nē ǃGâiǂhôasa aoǁnâs ǃaromas ge tsâ tsî ta khedegu ǀkha ǃgamao-i khami ǃgaeǃnonhe hâsa. Xawe Elob di mîs ge tātsēs tsîna ǃgaeǃnonhe ǁkhā tide. 10ǃGâiǃōsib tsî ǀamo ǂkhaisib Xristub Jesub ǃnâ hâba Elob ǃkhōǂui hâ khoena īǁkhā kaibas ǃaroma ta ge ra māsen, mâ ǀgau-i ǀgui-i ai tsâ hâhâsa. 11Ama ǂgomǂgomsa mîs ge nēsa:
“Xristub ǀkha da ga ǁō,
o da ge ǁkhāti ǁîb ǀkha nî ûi.
12Tsâb ǃnâ da ga hâhâ,#Mat. 10:33; Luk. 12:9
o da ge ǀguipa ǁîb ǀkha nî gao.
ǁÎba da ga ǀūxū,
ob ge ǁîb tsîna nî ǀūxū da.
13ǂGomoǃnâ da ga,
xaweb ge ǁîba hoaǁae a ǂgomǂgomsa,
Xristub ǁî-aitsama a ǀūxūsen ǁoa xui-ao.”
ǃOaba-ao-i nî ǃoabas ǃnâ ǂgomǂgomsa ǀgaus
14Mâ khoe-i hoa-e nē xūn hoana ǂâiǂâiǃnâ, î-i tā Elob mûǁae ǁau ǃhoa-ain ǃaroma ǂnoagu. Nēti ī ǂnoagu-ain a harebeoǃnâ tsî ǁnâu ka khoen hoana hîkākā ǁkhā xuige. 15ǀGaisase sîsen, îb Eloba sats ǃnâ ǂgomǃgâba ūhâ ǁkhā. ǀGaisa sîsenao kai, îts tao tamase tsî ǂhanuse amab di mîs ǀguisa ǁkhāǁkhā. 16ǁAu tsî gâre ǃhoa-ain, eloxoresasib ǀguiba nî ǃaruǀî ǀgaiǀgaina xu ǂgae-oasen. 17Nēti ī ǃhoa-ain ge ǂuru ǁoa ǀhapis, ūxaǃnâs khami ī. ǁÎn ǁaegu kha ge Himeneub tsî Filetub tsîkha ge hâ i. 18ǁÎkha ge ǁnā ǀgaus ai amab di daoba sā tsî ǂhumiba gere aoǁnâ, ǁō hân di khâis ge ǀnai a hâ ǃkhaisa; tsî ǀnî ǂgomsaben di ǂgomde ge ǂgaeǂhapu. 19#Num. 16:5Xawe ǀnaib ge Eloba amab ai ǁgui ǃgaoǃgaob ge khoe-i xare-i xa ǁnobeǁnobehe tide tsî sao rase i ge nēti xoahe hâ: “ǃKhūb ge ǁîb di khoena a ǂan” tsî “Mâ-i hoa-i ǃKhūb di ǀonsa ra ǂgai-i ge ǂkhababa xu nî ǂgae-oasen.”
20Kai om-i ǃnân ge ǃhuniǀuri xapan tsî ǀhaiǀuri xapana hâ, ǀnîn hain tsî ǂgoab tsîna xu a kurusa hîa. ǃHuniǀurib tsî ǀhaiǀurib tsîna xu hân ge ǀō-aisa ǁaeb ai ǀgui ra sîsenūhe, hain tsî ǂgoab tsîna xu hân mâǁaeb hoaba ra sîsenūhe hîa. 21ǁNā khoen hîa ǀurixa ûiba xu ra ǃanuǃanusenn ge Elob xa ǀō-aisase nî sîsenūhe. ǁNāti ī khoen ge ǀHonkhoeb xa hoa ǃgâi sîsengu ǃaroma a sîsenūhe ǁkhā. 22ǂKham khoesis di tura-ain hoana ǁhâxū, î hoaǁae ǂhanu-aisiba ôa. ǂGoms, ǀnammi tsî ǂkhîb tsîna ǁgūba, î ǃanu ǂgaogu ǀkha ǃKhūba ra ǂgaiǀî khoen hoan ǀkha ǁîba ǃoaba. 23Xawe tā harebeoǃnâ tsî ǃgôaoǃnâ ǂnoagu-ain, ǂkhabab ǀguiba ra ǃaroman ǃnâ amǃnâxa. 24ǃKhūb di ǃgā-i ge ǂkhabaxa tide, xawe mâ khoe-i hoa-i ǃoagu nî khoexaǃnâ. ǃGâi tsî ǃnūǃnâxa ǁkhāǁkhā-ao-i ge nî. 25ǁÎ-i di mâǃoa-ao-e-i ge ǃgamǃgamsens ǃnâ nî ǁkhāǁkhā. Elob ǁnāti ī mâǃoa-ao-i di ǂgaoba amab ǃnâ dabaǃkhuni ǁkhā xui-ao. 26Tsîn ge dīsādi âna nî ǂanǃgâ tsî ǁgâuab* di ǃnuis, ǁîs ǃnân ge ǁîb ǂâisan nî dīse ǃkhōhesa xu nî ǃnora.
Currently Selected:
2 Timoteub 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.