Dt 6
6
“Ab'i, Israel”
1“A'aneb' a'in li chaq'rab', li aatin ut chixjunil li taqlahom kixye li Qaawa' leeYos naq tink'ut cheru, re naq teepaab' sa' li ch'och' toxeereechani. 2Chi jo'kan teeroxloq'i ru li Qaawa' leeYos chiru chixjunil leeyu'am, ut teepaab' chixjunileb' li chaq'rab' ut li aatin nink'e eere anaqwan, jo'wi' reheb' leeralal eek'ajol ut leeri eemam, re naq taanajto'q roq leeyu'am. 3Ab'i, Israel, ut yal aaq'e chi xyu'aminkil, re naq sa tatwanq ut tatk'ihanq sa' li xq'emal na'ajej, jo' kixyeechi'i aawe li Qaawa', li xYos eb' laana' laayuwa'.
4“Ab'i, Israel: li Qaawa', li qaYos, a'an jun ajwi' chi Qaawa'.#6,4 Mk 12,29.
5“Taara li Qaawa' laaYos chi anchal laach'ool, chi anchal laawaanm ut chi anchal laametz'ew.#6,5 Mt 22,37; Mk 12,30; Lk 10,27.
6“Chiwanq sa' laach'ool junelik eb' li aatin a'in xinq'axtesi aawe anaqwan. 7Ch'ik sa' xk'a'uxeb' laawalal aak'ajol, seeraq'i reheb' sa' laawochoch jo' ajwi' naq wanqat chiru aab'e, naq yokyooqat malaj naq tatwakliiq. 8Taab'ak'eb' chawuq' jo' junaq eetalil ut letz chapeekem re naq jultikaq aawe. 9Taatz'iib'aheb' sa'eb' li roqechal laawochoch jo' ajwi' sa' rokeb'aal li tenamit.#6,6-9 Dt 11,18-20.
10“Naq akaq xatroksi li Qaawa' laaYos sa' li ch'och' kixyeechi'i reheb' laaxe'toonil yuwa', a' laj Abrahán,#6,10 Gn 12,7. laj Isahak#6,10 Gn 26,3. ut laj Jakob,#6,10 Gn 28,13. misachk sa' aach'ool li Qaawa'. A'an tixk'e aawe xninqal ut xsahilal ru tenamit ink'a' k'ojob'anb'ileb' aab'aan; 11tixk'e xk'ihaleb' li ochoch nujenaqeb' chi b'ihomal li moko aasik'om ta laa'at, xiikileb' uub' ut oliiw li ink'a' aawawom. 12Naq akaq xatwa'ak ut xk'ojlaak laach'ool, misachk sa' laach'ool li Qaawa' li ki'isink chaq aawe sa' li tenamit Ejiipt, b'arwi' katwank chaq chi munil. 13A' li Qaawa' laaYos taaxiwa ru, ut chiru A'an tatk'anjelaq.#6,13 Mt 4,10; Lk 4,8. Ka'ajwi' sa' xk'ab'a' A'an taaye jurament. 14Maataaqe eb' li jalanil yos, eb' li xyoseb' li tenamit wankeb' chasutam, 15xb'aan naq li Qaawa' laaYos, li wank aawik'in, a'an jun Yos aj sowen. Wi taab'aanu chi jo'kan, taachalq li xjosq'il li Qaawa' laaYos sa' aab'een ut tatxsach chi junajwa.
16“Meeyal rix li Qaawa' leeYos#6,16 Mt 4,7; Lk 4,12. jo' keb'aanu aran Masá.#6,16 Ex 17,1-7. 17Paab'omaq chi chaab'il li xchaq'rab' li Qaawa' laaYos, a' li xtaqlahom ut eb' li raatin li xk'e chepaab'. 18B'aanuhomaq li tiikilal ut li us chiru li Qaawa' re naq sahaq sa' leech'ool ut toxeereechani li chaab'il ch'och' li kixyeechi'i li Qaawa' reheb' leena' leeyuwa', 19xb'aan naq traanilasiheb' cheru chixjunileb' li xik' neke'ilok eere, jo' xyehom li Qaawa'.
20“Sa' jun kutan tixpatz' aawe laawalal: «K'aruheb' li chaq'rab', li taqlahom ut eb' li aatin a'in li xk'e chepaab' li Qaawa' li qaYos?», cha'aq. 21Ut laa'at taaye re laawalal: «Laa'o koowank chaq rub'el xwankil laj Parahón aran Ejiipt, ut li Qaawa' koorisi chaq aran rik'in xkawilal li ruq'. 22Kiqil chi xb'aanunkil xninqal sachb'ach'oolej ut xiwajel b'aanuhom aran Ejiipt, re xrahob'tesinkil laj Parahón ut chixjunileb' li wankeb' sa' xjunkab'al. 23A'ut laa'o koorisi chaq aran re qak'amb'al sa' li ch'och' xyeechi'om reheb' li qana' qayuwa'. 24Chirix chik a'an li Qaawa' kooxchaq'rab'i chi xyu'aminkil chixjunileb' li chaq'rab' a'in ut roxloq'inkil ru li qaYos. Chi jo'kan sa toowanq ut yo'yooqo, jo' wanko toj sa' li kutan a'in. 25Ut tqataw xtiikilal qach'ool wi tqapaab' ut tqak'anjela ru chixjunileb' li chaq'rab' a'in, jo' kixye qe li Qaawa' li qaYos».
Currently Selected:
Dt 6: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
