1 Ti 6

Eb' laj loq'b'il k'anjel

1Chixjunileb' li yookeb' chi k'anjelak cho'q aj loq'b'il k'anjel che'roxloq'i chi us laj eechal reheb' jo' chanru xk'ulub', re naq ink'a' chimajewaaq xk'ab'a' li Yos jo'wi' li qachaab'il tzolb'al. 2Li wankeb' aj eechal re aj paab'aneleb' me'xtz'eqtaanaheb', sa' xk'ab'a' naq ras riitz'ineb' rib', che'k'anjelaq b'an chi numtajenaq chik chiruheb', xb'aan naq eb' li neke'k'uluk rusil li xk'anjeleleb' a'aneb' aj paab'anel ut ramiiweb' li Yos.

Li tz'aqal aj tij ut laj b'alaq'

A'in tento taatzoleb' ut taachaq'rab'iheb' wi': 3Wi wank junaq jalan chik yo chi xk'utb'al ut ink'a' naxpaab' li xchaab'il aatin li Qaawa' Jesukriist jo'wi' li qatzolb'al sa' li qapaab'aal, 4a'an xmutz'o'k xb'aan li xq'etq'etil ut maak'a' naxnaw; junes patz'ink ut xwech'inkil rixeb' li aatin nawulak chiru. A'an li xyajel. Aran nachalk li kaqalink, li raaxiik', li majewank, li ink'a' usil k'a'uxl 5ut k'iila wech'ink: eb' li neke'b'aanunk re a'in, a'aneb' li po'jenaqeb' xk'a'uxl, ut maak'a' li yaal rik'ineb'; neke'xk'oxla naq rik'in li paab'ank te'xtaw xtumineb'.

6Relik chi yaal naq q'axal loq' li paab'ank cho'q reheb' li k'ojk'ookeb' xch'ool chirix li k'aru wank reheb'. 7Xb'aan naq laa'o maak'a' k'aru xqak'am chaq arin sa' ruuchich'och' ut maak'a' ajwi' k'aru tqak'am chiqix. 8Wi wank qatzekemq ut qab'aatal, k'ojk'ooq qach'ool rik'in a'an.

9A'ut eb' li neke'raj b'ihomo'k, neke'xk'e rib' chi aaleek ut te't'ane'q sa' li ra'al, sa' k'iila paay chi kaqalik q'axal yib'eb' ru ut maak'a' na'ok wi': eb' a'an neke'k'amok reheb' li winq sa' li sachleb'aal ut sa' li lajk-oso'k. 10Xb'aan naq li xxe' chixjunil li maa'usilal a'an li xrahinkil ru li tumin. Wankeb' xkoheb' xch'ool chirix a'an; jo'kan naq xe'elk sa' li paab'aal, ut xiikil li rahilal xe'tawasiik wi'.

Xchaq'rab'inkil laj Timoteo

11A'ut laa'at aj raholat re li Yos, maab'aanu a'in; chayal b'an aaq'e chi xsik'b'al li tiikilal ut li roxloq'inkil li Yos; chasik' li paab'ank, li rahok, li kuyuk ut li tuulanil. 12K'e aach'ool chi kaw sa' laapaab'aal, chaweechani li junelik yu'am li katb'oqe'k wi' ut li kach'olob' chi chaab'il xyaalal chiruheb' li k'iila testiiw.

13Nintz'aama usilal chiru li Yos li nak'ehok xyu'am chixjunil li k'a'aq re ru ut chiru li Jesukriist li kixch'olob' chi us xyaalal chiru laj Poncio Pilaat:#6,13 A'an kik'ulmank naq li Jesus kixch'olob' naq a'an tz'aqal Rey (cf. Jn 19,36-37). 14ye laawaatin naq chak'uula sa' laach'ool li chaq'rab' xak'ul, chi maak'a'aq aamuxul ut maak'a'aq aaq'usb'al, toj reetal tolxk'ut rib' li Qaawa' Jesukriist. 15A'an taak'utb'esiiq sa' xq'ehil xb'aan li Yos Awab'ej, q'axal loq' ut jun chirib'il, a' li Rey sa' xb'eeneb' li rey ut Qaawa' sa' xb'eeneb' li Qaawa', 16li jun chirib'il li ink'a' nakamk, li wank sa' jun saqenk li maa'ani nawulak aran; maajun junaq winq x'ilok ru chi moko taaril ru. Rehaq taxaq li loq'oniik ut li nimajwal wankilal chi junelik. Jo'kan taxaq.#6,16 Cf. 1 Ti 3,16b.

Li b'ihom aj paab'anel

17Chatz'aama chiruheb' li b'ihom sa' li ruuchich'och' a'in naq me'xq'etq'eti rib' chi moko te'xk'ojob' xch'ool rik'in li b'ihomal li taa'oso'q, te'xk'ojob' b'an xch'ool rik'in li Yos li nak'ehok qe chi yo'oon chixjunil li k'a'aq re ru, re tqayal xsahil. 18Chatz'aama naq usilal che'xb'aanu, jo' ajwi' naq che'b'ihomo'q rik'in li chaab'il b'aanuhom ut che'wotzoq chi anchaleb' xch'ool. 19Chi jo'kan yooqeb' chi xtamresinkil jun xnimal b'ihomal cho'q re li kutan chaalel li te'reechani wi' li tz'aqal yu'am.

Xraqik li hu

20At Timoteo, chawil chi us li k'aru q'axtesinb'il aawe.#6,20 A'an li paab'aal, a'an li xChaab'il Esil li Jesus (cf. 2 Ti 1,12.14). Mat-okenk rik'in li seeraq' maak'a' na'ok wi' jo'wi' rik'in wech'ij ib' nachalk sa' b'alaq'il na'leb'. 21Wankeb' xe'xyeechi'i a'an, ab'an moqon chik xe'elk sa' li paab'aal.

Li rusilal li Yos chiwanq taxaq eerik'in.

Currently Selected:

1 Ti 6: QQC

Highlight

Copy

Compare