1 Ti 5

Chaq'useb' sa' xyaalal

1Maaq'useb' chi kaw eb' li cheekel winq, chach'olob' b'an xna'leb'eb' jo' yuwa'b'ej. Chawaatinaheb' li saaj winq jo'eb' laawiitz'in; 2eb' li cheekel ixq chawaatinaheb' jo' na'b'ej, ut eb' li tuq'ixq jo' anab'ej, rik'in xsaqal ru ch'oolej.

Eb' li xmalka'an

3Chawoxloq'iheb' li xmalka'an, a'eb' li tz'aqal wankeb' xjuneseb'. 4Wi junaq xmalka'an wank ralal xk'ajol malaj ri xmam, eb' a'in che'xtzolaq xb'enwa xraab'al li xkomoneb' ut xq'ajkamunkil li xna' xyuwa', xb'aan naq a'in q'axal nawulak chiru li Yos.

5Li tz'aqal xmalka'an ut junaatal, wank xsahil oyb'enihom rik'in li Yos ut junelik natijok natz'aamank chi q'eq ut chi kutan. 6Ab'an li xmalka'an li jo'maajo' naq wank, a'an kamenaq us ta yo'yo. 7Chayehaq ajwi' chixjunil a'in reheb', re naq maak'a'aq xq'usb'aleb'. 8Li ink'a' naxk'oxlaheb' li xkomon, ut xb'een xb'een eb' li wankeb' sa' li xjunkab'al, a'an xtz'eqtaana li xpaab'aal ut yib'ru li xna'leb' chiru li ink'a' napaab'ank.

9Li xmalka'an k'eeb'ilaq sa' ajl, a'an li numenaqaq oxk'aal chihab', jun sut ajwi' sumsuuq, 10ut nawnooq ru rik'in li chaab'il k'anjel ak xb'aanuhom: naraj naxye, xtijeb' chi chaab'il eb' li ralal xk'ajol, xk'ehok ochochnaal, xch'ajom roqeb' laj santil paab'anel, xtenq'aheb' li wankeb' sa' rahilal ut xb'aanuhom yalaq k'a' chi chaab'il k'anjelil.

11Maak'eheb' sa' ajl li xmalka'an toj saajeb' xb'aan naq, wi te'aaleeq, te'xkanab' li Kriist ut te'raj sumlaak; 12chi jo'kan te'xk'e rib' sa' tojb'amaak xb'aan xq'etb'al li aatin xsumehomeb' chaq xb'enwa.#5,12 A'an li aatin xe'xye naq xe'xq'axtesi rib' re li Qaawa'. 13Jo'wi' anchal, neke'k'ayk chi sub'uk kutan ut neke'xtzol rib' chi xik chirehatq kab'lal; ut moko ka'aj ta wi' sub'uk kutan neke'xb'aanu, neke'molok aj b'an wi' aatin, neke'xch'ik rib' yalaq b'ar ut neke'xye li moko yehe'k ta naraj.

14Jo'kan utan nawaj naq eb' li xmalka'an toj saajeb' che'sumlaaq, che'wanq ralal xk'ajol, che'xjolomi li xjunkab'aleb' re naq maak'a' toohob'e'q wi' xb'aaneb' li xik' neke'ilok qe. 15Xb'aan naq ak wankeb' li xmalka'an xe'sachk ut xkoheb' chirix laj tza.

16Wi junaq ixq aj paab'anel wanqeb' xmalka'an sa' rochoch, chixtenq'aheb' ut ink'a' chixk'e riiq li Iklees, re naq A'in chixtenq'aheb' li tz'aqal xmalka'aneb'.

Eb' li cheekel winq sa' Iklees

17Eb' li cheekel winq li neke'xjolomi chi us li Iklees, xk'ulub'eb' naq te'xk'ul xq'ajkamunkileb' ka' sut, xb'een xb'een eb' li neke'xk'e xch'ool chi xpuktesinkil ut xch'olob'ankil li Aatin, 18xb'aan naq naxye li Santil Hu: “Maatz'ap ru'uj li b'ooyx naq yo chi k'anjelak”,#5,18a Dt 25,4. Cf. 1 Ko 9,9. ut naxye ajwi': “Xk'ulub' naq laj k'anjel tixk'ul xtojb'al”.#5,18b Cf. Lk 10,7; 1 Ko 9,14.

19Maak'ulub'a xjitb'al junaq cheekel winq wi maak'a' wib' oxib'aqeb' testiiw.#5,19 Dt 19,15.

20Eb' li yookeb' chi maakob'k, chaq'useb' chiruheb' chixjunil re naq chi'okaq xxiweb' li xkomon. 21Nintz'aama chawu sa' xk'ab'a' li Yos, sa' xk'ab'a' li Kristo Jesus ut eb' li ánjel sik'b'ileb' ru, naq taapaab' chixjunil a'in sa' tiikilal, chi ink'a' tiitooq ru anihaq aab'aan. 22Maaseeb'a aawib' chi xk'eeb'al laawuq'#5,22 Cf. 1 Ti 4,14. sa' xb'een anihaq. Mattz'aqonk rik'in xmaak anihaq ut wanqat chi saq ru laach'ool.

23Mat-uk'uk chik yal junes ha', uk'an b'an kach'inaq b'iin xb'aan xrahil aasa' ut xb'aan li yajel kok'aq xsa' nachalk chab'een.

24Wankeb' winq ak k'utk'u li xmaakeb', us ta toj maji' naraqmank aatin chirixeb'; ab'an wankeb' ajwi' li toj moqon chik toxk'utunq k'aru li xmaakeb'. 25Jo'kan ajwi' eb' li chaab'il b'aanuhom k'utk'uukeb' chiruheb' chixjunil; ut eb' li moko k'utk'uukeb' ta, moko te'kanaaq ta junelik chi muqmu.

Currently Selected:

1 Ti 5: QQC

Highlight

Copy

Compare