1 S 3
3
Li Qaawa' kixb'oq laj Samuel
1Laj Samuel, li ch'ina'al, nak'anjelak chiru li Qaawa' cho'q aj tenq' re laj Elí. Sa'eb' li kutan a'an li Qaawa' ink'a' naraatinaheb' li tenamit chi junelik, chi moko k'iheb' ta li neke'ilok moy u.
2Sa' jun li q'oqyink yokyo laj Elí sa' li xna'aj. Ak yo chi moyk xsa' li ru ut ink'a' chik sa na'ilok. 3Laj Samuel ajwi' yo chi wark sa' rochoch li Qaawa' b'arwi' wank li xLoq'laj Kaax li Yos. Naq toj maji' nachupk li xsaqenk li Yos, 4li Qaawa' kixb'oq laj Samuel ut a'an kichaq'ok: “We'kin”, chan.
5Tikto koho rik'in laj Elí ut kixye re: “Wankin arin. K'a' aj e naq xinaab'oq?”. “Ink'a' xatinb'oq -chan laj Elí-, ayu wi' chik chi wark”. Ut a'an koho wi' chik chi wark.
6Kib'oqe'k wi' chik laj Samuel xb'aan li Qaawa'. Ut li ch'ina'al kiwakliik, koho rik'in laj Elí ut kixye re: “Wankin arin. K'a' aj e naq xinaab'oq?”. Kichaq'ok laj Elí: “Ink'a' yookin chab'oqb'al, at walal. Ayu wi' chik chi wark”, chan.
7Laj Samuel toj maji' naxnaw ru li Qaawa', xb'aan naq toj maji' k'utb'il chiru li raatin li Qaawa'. 8Sa' rox sut li Qaawa' kixb'oq laj Samuel, ut a'in kiwakliik, koho rik'in laj Elí ut kixye re: “Wankin arin. K'a' aj e naq xinaab'oq?”. Toja' naq laj Elí kixtaw ru naq li Qaawa' yo chi b'oqok re li ch'ina'al, 9ut kixye re laj Samuel: “Ayu chi wark, ut wi tatb'oqe'q wi' chik, taaye: «Aatinan, at Qaawa', laj k'anjel chawu yo chawab'inkil», cha'qat re”.
Koho wi' chik laj Samuel sa' li xwarib'. 10Chirix chik a'an kichalk li Qaawa', kixaqliik ut kib'oqok wi' chik jo'eb' li xb'ensut: “Samuel, Samuel!”, chan. Kichaq'ok laj Samuel ut kixye: “Aatinan, laj k'anjel chawu yo chawab'inkil”.
11Ut li Qaawa' kixye re laj Samuel: “K'e reetal, ok we chi xb'aanunkil jun li na'leb' reheb' laj Israel, toj reetal taaraho'q sa' xxikeb' li te'ab'inq re. 12Sa' li kutan a'an tinb'aanu re laj Elí chixjunil linyehom sa' xb'een li xjunkab'al, chalen chaq sa' xtiklajik toj sa' xraqik. 13Ak inyehom naq tinraq aatin chi junajwa sa' xb'een li xjunkab'al, xb'aan naq naxnaw naq eb' li ralal xk'ajol xine'xmajewa ut ink'a' xq'useb'. 14Jo'kan naq xinye li waatin naq li xmaa'usilal li xjunkab'al laj Elí maajoq'e truuq taakuymanq rik'in mayejak chi moko rik'in yeechi'ink”, chan li Yos.
15Laj Samuel kikanaak sa' xwarib' toj kisaqewk; chirix chik a'an kixteheb' li rokeb'aal li rochoch li Yos, ab'anan yo xxiw chi xseeraq'inkil li moy u re laj Elí. 16Toja' naq laj Elí kixb'oq ut kixye re: “Samuel, at walal!”. Ut a'in kixye: “We'kin”, chan. 17Laj Elí kixpatz' re: “K'aru xye aawe li Qaawa'? Mik'a' aamuq chiwu. A' taxaq li Yos chik'ehoq aawe chi xtojb'al laamaak chi q'axal ra, wi taamuq chiwu junaq reheb' li aatin xye aawe”. 18Toja' naq laj Samuel kixseeraq'i re chixjunil chi maak'a' kixmuq, ut laj Elí kixye: “A'an li Qaawa'. Chixb'aanuuq li k'aru us chiru”.
19Laj Samuel kinimank, ut li Qaawa' wank rik'in. Jo'ch'inal jo'nimal kiyeemank xb'aan laj Samuel, kitz'aqlok ru. 20Ut chixjunileb' laj Israel, chalen chaq Dan toj Berseba, ke'xk'e reetal naq laj Samuel tz'aqal xpropeet li Yos. 21Li Qaawa' kixk'utb'esi wi' chik rib' aran Siló, xb'aan naq aran na'aatinak rik'in laj Samuel.
Currently Selected:
1 S 3: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
