1 S 2
2
Li xtij lix Ana
1Lix Ana kitijok chiru li Yos ut kixye chi jo'ka'in:
“K'ajo' naq nasaho'k linch'ool rik'in li Qaawa',#2,1-10 Sal 113,5-9; Lk 1,46-55.
nintaqsi linjolom sa' xk'ab'a' linYos,
sa nekeb'inse'e li xik' neke'ilok we.
Laa'at xinaakol: k'ajo' xsahil li waanm!
2Maak'a' junaq sant jo' li Qaawa',
chi moko junaq saqoonak jo' li qaYos.
Maa'ani chik junaq jo' A'an.
3Meenaab'alob'resi leeq'etq'etil aatin,
mi'elk chi xtz'uumal eere li xnimankil eerib',
xb'aan naq li Qaawa' a'an jun Yos li naxnaw chixjunil,
a'an naraqok aatin sa' xb'een li junjunq.
4Li xna' simaj eb' li kaweb' rib' xe'toqje'k chiruheb',
ut eb' li neke'parpotk xe'chalk xkawilaleb'.
5Li xe'xb'ut xsa'eb' yookeb' chi k'anjelak anaqwan chirix li xwaheb',
ut eb' li te'tz'okaaq ink'a' chik neke'xtawasi rib'eb'.
Li xma'al ixq wuqub' sut x'alank,
ut li naab'aleb' xkok'al yo chi tixk anaqwan.
6Li Qaawa' nak'ehok yu'am ut li kamk;
nataqlank sa' xna'ajeb' li kamenaq ut na'isink chaq.
7Li Qaawa' nab'ihomob'resink ut namaq'ok,
najuk'uk ut nawaklesink wi' chik.
8Naxwaklesi sa' pojtz' li kub'enaq xwankil
ut narisi li neb'a' sa' xna'aj li mul,
re xk'eeb'al chi k'ojlaak chi xk'atqeb' li ninqeb' xwankil,
re xk'eeb'al sa' jun li na'ajej q'axal loq'.
Xb'aan naq li Qaawa' a'an laj eechal re
eb' li roqechal li ruuchich'och':
sa' xb'eeneb' a'an k'ojob'anb'il li choxach'och'.
9A'an nab'eresink reheb' li neke'paab'ank re,
a'ut li ink'a' useb' xna'leb' te'oso'q sa' li aak'ab',
xb'aan naq maa'ani naq'axok u yal rik'in li xmetz'ew.
10Li Qaawa' naxjuk' xwankil eb' li xik' neke'ilok re,
li Nimajwal Yos namoqk chaq xyaab' toj sa' choxa.
Li Qaawa' naraqok chaq aatin toj sa' xmaril li ruuchich'och',
naxk'e xwankil li na'awab'ejink re li xtenamit
ut naxnima xwankil li sik'b'il ru xb'aan”.
11Chirix chik a'an laj Elkaná kisutq'iik sa' rochoch aran Ramá, ab'an li ch'ina'al kikanaak chi k'anjelak chiru li Qaawa', rub'el xtaql laj Elí laj tij.
Li xmaa'usilaleb' li ralal laj Elí
12Eb' li ralal laj Elí ink'a' useb' xna'leb' ut ink'a' neke'xk'e xloq'al li Qaawa', 13chi moko neke'xpaab' li teneb'anb'il sa' xb'eeneb' laj tij rik'in li tenamit. Naq junaq poyanam naxyeechi'i xmayej, nachalk laj k'anjel chiru laj tij naq yo chi chaq'ak li tib'; naxk'am chaq li xokleb' tib' oxib' ru'uj, 14naxch'ik sa' li uk'al malaj sa' li sek', ut li jo'k'ihal narisi chaq chiru li xokleb' nakanaak cho'q re laj tij. Ut junes jo'kan neke'xb'aanu rik'ineb' chixjunileb' laj Israel li neke'wulak aran Siló. 15Jo'kan ajwi', naq toj maji' nak'atmank li xeeb', nachalk laj k'anjel chiru laj tij ut naxye re li yo chi mayejak: “K'e kach'inaq xtib' laj tij re naq tinpom. Tento naq a'anaq rax tib'; moko tink'ul ta chawu wi chiqb'ilaq”. 16Ut wi li winq naxye re: “Xb'enwa taak'atmanq li xeeb'; tojo' naq taak'am jo'k'ihal li taawaj”, chan, li jun chik naxsume: “Ink'a', taak'e we anaqwan. Wi ut ink'a', tinmin aawu chi xk'eeb'al”. 17Jo'kan naq q'axal nim chiru li Qaawa' li xmaakeb' li wiib' chi aj k'anjel a'an, xb'aan naq ink'a' neke'roxloq'i li k'aru mayejanb'il chiru li Qaawa'.
18Laj Samuel li ch'ina'al wan chaq chi k'anjelak chiru li Qaawa', tiqto rik'in efod yiib'anb'il rik'in liin. 19Ut rajlal chihab' li xna' nayiib'ank re jun xch'ina raq' ut naxq'axtesi chaq re, naq naxik rochb'een li xb'eelom chi mayejak. 20Toja' naq laj Elí narosob'tesi laj Elkaná ut li rixaqil, ut naxye: “A' taxaq li Qaawa' tixk'e naab'al aawalal aak'ajol rik'in li ixq a'in. A'anaqeb' reeqaj laj Samuel li xeq'axtesi chi k'anjelak chiru li Qaawa'”. Ut chirix chik a'an neke'sutq'iik sa' rochocheb'. 21Relik chi yaal naq li Qaawa' kirula'ani lix Ana: a'an kisiyank ut kirala oxib' teelom ut wiib' ixqa'al. Ut laj Samuel li ch'ina'al yo chi k'iik chiru li Qaawa'.
22Ak tiix chi us laj Elí. Ab'anan naq kirab'i chixjunil li neke'xb'aanu eb' li ralal rik'ineb' laj Israel ut chanru neke'wark rik'ineb' li ixq li neke'k'anjelak chire li rokeb'aal li Loq'laj Muheb'aal, 23kixye reheb': “Chixjunileb' li tenamit neke'xye we naq ink'a' us yookex. K'a' naq jo'ka'in nekeb'aanu? 24Yib'ru li yookeb' chi xyeeb'al cherix, ex walal. Yookex chi xluktesinkil xch'ooleb' li xtenamit li Yos. 25Wi junaq poyanam namaakob'k chiru li ras riitz'in, li Yos truuq taa'okenq chirix. Ab'anan wi namaakob'k chiru li Qaawa', ani taa'okenq chirix?”. A'ut eb' a'an ink'a' ke'ab'ink chiru li xyuwa'eb', xb'aan naq ak wank sa' xch'ool li Qaawa' naq tento te'kamq.
26Naq yo chi k'ulmank a'in, laj Samuel li ch'ina'al yo chi k'iik, raaro xb'aan li Qaawa' ut xb'aaneb' li tenamit.
27Sa'eb' li kutan a'an kichalk jun propeet rik'in laj Elí ut kixye re: “Jo'ka'in xye li Qaawa': «Naq eb' laaxe'toonil yuwa' wankeb' chaq Ejiipt chi k'anjelak chiru laj Parahón, laa'in kink'utb'esi wib' chiruheb'. 28Sa' xyanqeb' chixjunileb' li xteepal laj Israel kinsik' ru laajunkab'al, re naq a'anaqeb' aj tij chiwu, re te'mayejaq sa' xb'een lin'artal, jo'wi' te'k'atoq pom ut te'xk'am li efod chiwu.#2,28 Ex 28,1-4. Kink'e ajwi' reheb' laaxe'toonil yuwa' naq te'tz'aq sa' chixjunileb' li xmayejeb' laj Israel.#2,28 Lv 7,35-36. 29K'a' naq xetz'eqtaana lin'artal ut li mayej li xinye eere naq teeq'axtesi sa' linloq'laj Muheb'aal? K'a' naq q'axal chik xaraheb' laawalal aak'ajol chiwu laa'in ut xach'oolaniheb' rik'in xchaab'ilal chixjunil li xmayejeb' lintenamit Israel?». 30Jo'kan naq li Qaawa', xYos laj Israel, naxye chi jo'ka'in: «Us ta ak xinye naq laajunkab'al ut li xjunkab'al laayuwa' junelik raj wanqeb' chiwu, ab'an anaqwan moko jo'kan ta chik tinb'aanu. Jo'k'ihaleb' li neke'oxloq'ink we, twoxloq'iheb', a'ut li neke'tz'eqtaanank we, tz'eqtaananb'ilaqeb' inb'aan. 31K'e reetal, chalk re xkutankil naq tinsach laawankil jo'wi' xwankil li xjunkab'al laayuwa', ut maajun re laajunkab'al toxtixq. 32Taaraho'q aach'ool naq taawil chixjunil li us tinb'aanu reheb' laj Israel, ut maajaruj te'cheeko'q li xwinqilaleb' laajunkab'al. 33Ut wi wanqeb' sa' xyanqeb' laawech'alal li teb'inkanab' chi k'anjelak sa' lin'artal, a'an taak'ulmanq yal re naq te'raho'q xch'ool ut timil timil te'oso'q. A'ut li xk'ihaleb' laawalal te'kamq chi ch'iich'. 34A'anaq reetalil cho'q aawe li k'aru te'xk'ul xkab'ichaleb' laawalal, laj Jofní ut laj Pinjás: jun ajwi' chi kutan te'kamq wi' xkab'ichaleb'. 35Chirix chik a'an laa'in tinsik' ru jun aj tij tiik ru li xyu'am, li tixb'aanu jo' naraj linch'ool ut li wajom. Tink'e jun xjunkab'al li ink'a' taa'oso'q, ut eb' li ralal xk'ajol te'k'anjelaq junelik chiru li awab'ej yulb'il inb'aan. 36Toja' naq eb' laawech'alal li ink'a' te'kamq, te'chalq chi wiq'laak chiru a'an re xtz'aamankil b'ayaq xtumineb' malaj xwaheb', ut te'xye: B'aanu usilal, k'e junaq qak'anjel sa' xyanqeb' laj tij, re naq wanq b'ayaq qawa quk'a', cha'qeb'»”.
Currently Selected:
1 S 2: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
