Rut 2
2
Pooso iminënquë Rota naporinsoꞌ
1Noimisoꞌ, soꞌinco quëran aꞌnara imoroën maꞌhuan yaꞌhuëtërin. Inasoꞌ, Pooso itopi. Naní quëran noya niꞌpi. 2Aꞌna tahuëri Rotari Noimi itapon:
—Iminoꞌsaquë paꞌi topirahuë. Tapona inso sipata yaquinaꞌpi tërantaꞌ, patërinsopita macaꞌhuasoꞌ nohuantërin, itërin.
—Paquë nipachin huaꞌhua, itërin aꞌshatëni. 3Napotohuachina iminquë paꞌnin. Yaquinaꞌpiroꞌsa otayapisoꞌ, masárin. Co nitotopirinhuëꞌ, ina iminso Poosonquën.
4Inapoaton maꞌpatasoꞌ, imin huaꞌanën Pirin quëran canquirin. Canquirahuaton yaquinaꞌpiroꞌsa noya nontërin: “Sinioro chachin catahuainquëmaꞌ,” itërin. Napotohuachina piyapinënpitantaꞌ, “Quëmanta Sinioro catahuainquën,” itopi. 5-6Ina quëran Poososoꞌ sacatoroꞌsa huaꞌan natanin:
—¿Inta huiꞌnin pasoꞌ sanapi? itërin.
—Inasoꞌ, Moapo sanapi. Inatohua quëran Noimi imaquirinsoꞌ. 7Yaquinaꞌpiroꞌsa imaton, otayapiso macacaso marëꞌ nani nataninco. Tashiramiachin quëran huarëꞌ sacatápirinhuëꞌ, apira huëꞌsahuaton piꞌpian chinotarin, itërin. 8Napohuachina paaparahuaton itapon:
—Natanquë imoya piꞌpian shaꞌhuichinquën. Ama aꞌna iminoꞌsaquë otayapisoꞌ macapon paquësohuëꞌ. Piyapinëhuëpita sanapiꞌsa nipisopitarëꞌquën, isëquëranchin maquëꞌ. 9Yaquinaꞌpiroꞌsa insëquësona yaquiantahuachinaꞌ, inatohua inahuanta paꞌsapi. Naporoꞌ quëmanta inapita imaquëꞌ. Ama insonta apiinquënso marëhuëꞌ, nani piyapinëhuëpita shaꞌhuitërahuë. Yamorohuatan, yonsharoꞌsaquë iꞌsha yaꞌhuëarin. Insosona sëꞌhuapisoꞌ oꞌocontaquëꞌ, itërin. 10Napotohuachina, inaso Pooso noya nicaton isonin quëran noꞌpaquë huarëꞌ monshomarin. Ina quëran itapon:
—¿Onpoatonta ina pochin niꞌnanco? Caso nisha sanapico nipirahuëꞌ, noyasha nontëranco, itërin.
11—Soꞌyan chiminin quëran huarëꞌ, aꞌshacha nosororansoꞌ, nani nitotërahuë. Tataparin, mamaparin, noꞌpanën, inapita huëshiran. Co nohuitopirancoihuëꞌ, yacapaancoiso marëꞌ huëꞌnansontaꞌ, nitotërahuë. 12Inapohuatana, quëmaso Yosë chachin yoniton naporan. Inaso Sinioro, israiroꞌsacoi chinotërai. Ina paꞌpoyainquënso marëꞌ inaporan. Inasoꞌ, atari huaꞌhuinpita toꞌcohuëtërinso pochin paꞌpoyarinpoaꞌ. ¡Napoaton inari chachin naporanso marëꞌ acanainquën taꞌto, ina nontërahuë! itërin. 13Napotohuachina, Rotariso itapon:
—Quëmaso noyasha nontëranco. Ina pochin nontatonco achinicancananco. Caso co piyapinënpita sanapiꞌsa pochin tëranta nipirahuëꞌ, noyasha nontëranco, itërin.
14Capacaiso marëꞌ ora nanihuachina, Poosorisoꞌ, Rota përaton itapon:
—Huëquë imoya pan macaton, nocaroya tërantaꞌ, iꞌshiiquëꞌ. Iso nocarosoꞌ, huino áin ninin quëran nipi, itërin. Napotohuachina, paꞌsahuaton yaquinaꞌpiroꞌsarëꞌ, huënsëconin. Naporahuaton sipatanta iyanapisoꞌ, Poosori quëtohuachina caꞌnin. Natëaquë huarëꞌ coshatahuaton pëꞌsotopitërarin.
15Ina piquëran paantarahuaton otapisopita maantararin. Naporoꞌ Poosori, piyapinënpita iso pochin camairin:
—Sipata tonporamasoꞌ quëraontaꞌ, aꞌnaya aꞌnaya main. Ama apiracosohuëꞌ. 16Tonpoasëmantaꞌ, aꞌnaya aꞌnaya atatocoꞌ. Inari macacaso marëꞌ inapotocoꞌ. Naporahuaton ama insoquëma tëranta apicosohuëꞌ, itërin. 17Ina pochin Rotasoꞌ, Pooso iminënquë sipata otapisoꞌ manin. Tashiaquë huarëꞌ manin. Naporo tahuëri yontoninso toꞌnorarahuaton, pëꞌtënpachina, cato shonca quiro naꞌcon icanin.
18Ina quëran maꞌpatërinso pëꞌpërahuaton, ninanoquë paꞌmantarin. Aꞌshatën cantonahuaton, maꞌpatërinso aꞌnotërin. Cosharo pëꞌsotërinsontaꞌ, quëtërin. 19Aꞌshatëni itapon:
—¿Inta iminënquë ipora tahuëri maꞌpatëran? ¿Insëquëta inanapo manan? insosona ina pochin catahuarinquënsoꞌ, Siniorori catahuain, itërin. Napotohuachina shaꞌhuitërin:
—Pooso itopisoꞌ iminënquë ipora tahuëri maꞌpatërahuë, itërin Rotari.
20—Siniorori ina catahuain tënahuë. Iráca chimipicoroꞌsa nosororinso pochachin, canpoanta ipora nosororinpoaꞌ. Inasoꞌ quëmopinpoaꞌ. Napoaton inantaꞌ, nanitërin nichaꞌëinpoasoꞌ, tënin Noimi. 21Ina quëran Rota taantapon:
—Napotomantarinco aꞌshacha: “Piyapinëhuëpita sanapi nipisopitarëꞌquën paaton otayapisoꞌ maquëꞌ. Yaꞌipi shaꞌtërahuësoꞌ nanquiai huarëꞌ inapitarëꞌquën paquëꞌ,” itërinco, itërin.
22—Tëhuënchachin noꞌtëquën napotërinquën: Piyapinënpita sanapi nipisopitarëꞌquën paquëꞌ. Ama aꞌna iminquë paquësohuëꞌ, apichinën, itërin aꞌshatënintaꞌ. 23Napotopiso chachin Rotasoꞌ Pooso piyapinënpita sanapi nipisopitarëꞌ paꞌnin. Otayapisopita maꞌpatárin. Sipata nanquirahuatonaꞌ, trico yaꞌhuërëꞌ nanquiyai huarëꞌ inapitarëꞌ paꞌnin. Ina pochin Rotasoꞌ, aꞌshatën yacaparin.
Currently Selected:
Rut 2: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.