Rut 1
1
Moapoquë paꞌpisoꞌ
1-2Huaꞌanoꞌsa Israiro parti huaꞌanëntasoiꞌ, yaꞌipi ina parti tanarotopi. Napohuachinara, aꞌnaso Cota huënton quëmapi Pirin ninanoquë yaꞌhuërinsoꞌ, pipirin. Pipiton moaporoꞌsa noꞌpanën parti paꞌnin yacapatapon. Inasoꞌ quëmapi Irimiri itopi. Saꞌin, cato huiꞌninpita, inapitarë chachin paꞌnin. Saꞌinsoꞌ, Noimi itopi. Huiꞌninpitantaꞌ, aꞌnaso Quirion, aꞌnantaꞌ, Maaron itopi. Yaꞌipi inapita Pirinquë yaꞌhuëpi niꞌton, iporataroꞌsa itopi. Inapitasoꞌ Moapoquë canconahuatonaꞌ, inaquë yaꞌhuëantapi.
3Inaquë yaꞌhuëapirinahuëꞌ, Irimiriso chiminin. Soꞌin chiminpachina Noimisoꞌ, cato huaꞌhuinpitarëáchin quëparitërin. 4-5Huaꞌquimiachin quëran huaꞌhuinpitasoꞌ, inaquëranchin saꞌapi. Moapo sanapiꞌsa mapi. Aꞌnasoꞌ, Orpa itopi. Aꞌnantaꞌ, Rota itopi. Shonca piꞌipi pochin Moapoquë yaꞌhuëasoiꞌ, Maaron, Quirion, inapitanta chiminpi. Inapoaton Noimisoꞌ soꞌin, huaꞌhuinpita, inapitari taquinanpirin. Napohuachinara, inaora paya quëparitërin.
Noimi Rotarë chachin Pirinꞌpaꞌ paantarinsoꞌ
6Aꞌna tahuëri Noimisoꞌ, yacapatërinquë nanan natantërin: “Siniorori israiroꞌsa nosoroantarin. Ina nohuanton cosharo noyataantarin,” topi. 7Napohuachinara, yacapatërin quëran pipirin. Pipirahuaton Cota huënton israiroꞌsa noꞌpanën parti paantarin. Cato notainpitarë chachin paꞌnin. 8-9Inapitarëꞌ pacaponahuëꞌ, iraquë itapon:
—Paꞌmantatoma canpitasoꞌ, mamama nimaco topirahuëꞌ. Canpitaso naꞌcon nosororamaco. Huaꞌhuahuëpitantaꞌ, napotëramaꞌ. Ina marëꞌ Sinioro canpitanta nosoroꞌinquëmaꞌ. Ina nohuanton chachin noya soꞌyaantatomaꞌ, pëinëmaquë noya yaꞌhuëcoꞌ, itërin. Itahuaton, pacacaiso marëꞌ apinoraꞌpiarin. Inahuaso napoaponahuëꞌ, naꞌnëconpi. 10Naꞌnëtona itaponaꞌ:
—¡Ama aꞌshacha aꞌpacoisohuëꞌ! Quëmarëꞌcoi chachin yaꞌhuëranꞌpaꞌ paꞌsarai, itopi. 11Napotopirinahuëꞌ, Noimiri itaantapon:
—Panantaco huaꞌhuataꞌhuaroꞌsaꞌ. ¡Imapatamaco, topinan quëran imasaramaco! Co huachi caso huaꞌhuaantapohuëꞌ. Huaꞌhuanahuë naporini, inapita chachin maantaꞌitënquëmahuëꞌ. 12-13Paatoma yaꞌhuëramaquë paantacoꞌ. Nani caso paiyaco. Co huachi onpo soꞌyaantaꞌhuasohuëꞌ niconahuë. Ipora tashi soꞌyaantato huaꞌhuanahuë nicaipo tërantaꞌ, co apípora soꞌsoitonahuëꞌ. ¡Inapita huiꞌnapitai huarëꞌ macaimasoꞌ, co canpitaso ninacamaso yaꞌhuërinhuëꞌ! ¡Canpitanta inapita soꞌsocaisoꞌ ninatomaꞌ, co topinan nipayatamasoꞌ nohuantërahuëꞌ! Co carëꞌquëma pacacamaso yaꞌhuërinhuëꞌ. Tëhuënchachin Sinioro nohuanton chiníquën parisitërahuë. Napoaponahuëꞌ, canpitanta parisitëramasoꞌ niꞌpato, naꞌcon naꞌcon parisitarahuë, itërin. 14Napotohuachina, inahuaso naquëranchin naꞌnëantapi. Napoin quëran Orpasoꞌ, aꞌshatën yapataton apinorin huachi. Apinorahuaton panantarin. Rotaso napoaponahuëꞌ, inarë quëparitërin. 15Naporoꞌ Noimiri itapon:
—Niꞌquë huaꞌhua. Caishasoꞌ, yaꞌhuëramaso noꞌpaquë paantarin. Mamanshinën moshacaso marëꞌ paantarin. Quëmanta inarëꞌquën paquëꞌ, itërin.
16Napotopirinhuëꞌ, Rotarisoꞌ itaantapon:
—¡Ama aꞌshacha pataꞌhuanquënso shaꞌhuitocosohuëꞌ! Intohuaso paꞌpatan, inaquë canta paꞌsarahuë. Intohuaso yaꞌhuëhuatan, inaquë canta yaꞌhuëarahuë. Cantaꞌ, Israiro sanapi pochin nisarahuë. Quëma Sinioro chinotëransoꞌ, canta chinotarahuë. 17Intohuasoꞌ chiminpatan, inaquë canta chiminpato paꞌpichinaco. Coꞌhuara chiminyátërapohuëꞌ patohuatënquënsoꞌ, Sinioro chiníquën anaꞌinchinco, itërin. 18Naporinso natanaton, Noimiso co huachi aquëtë yaꞌhuërinquë paantacaso shaꞌhuitërinhuëꞌ.
19Ina pochin cato chachin paꞌsápatona Pirinꞌpaꞌ canconpi huachi. Ninanoquë yaꞌconpachinara, naní quëran paꞌyatopi. Paꞌyatatona napopi:
—¡Niꞌcochi. Noimi canquirin! topi. 20Napopirinahuëꞌ, inariso itapon:
—Ama Noimi itocosohuëꞌ. Mara itoco. Sinioro Yaꞌipi nanitaparinsoꞌ chiníquën aparisitërinco niꞌton, ina pochin nohuitoco. 21Naporoꞌ pacapo, naꞌcon quëparëso pochin ninahuë. Iporaso nipirinhuëꞌ co huachi manta quëntarësohuë pochin ninahuë. Sinioro ina pochin nohuantërin niꞌton, naporahuë. ¡Napoaton ama huachi Noimi itocosohuëꞌ! Siniorosoꞌ yaꞌipi nanitaparin. Ina anaꞌintatonco aparisitërinco. 22Ina pochin Noimisoꞌ, Moapo noꞌpa quëran huënantarin. Huaꞌhuatën Rota itopisorëꞌ huënantarin. Sipata macacaisoꞌ caniaritapaso canquipi.
Currently Selected:
Rut 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.