Romanos 7

Saꞌarinso pochin nininsoꞌ

1Canpitasoꞌ iyaroꞌsaꞌ, pënëntopisoꞌ nitotëramaꞌ. Nanpipisopitaráchin camaitërinsoꞌ natërapi. 2-3Niꞌcoꞌ. Sanapi soꞌyahuachina, soꞌin chinpitacasoꞌ yaꞌhuërin. Soꞌin yaꞌhuëtopirinhuëꞌ, aꞌna quëmapiri sëꞌhuahuachin, monshihuanin. Ina marëꞌ oshahuanarin. Nipirinhuëꞌ, soꞌin chiminpachin, soꞌyaantahuachin, co ina marëꞌ oshahuaninhuëꞌ.

4Inapochachin iyaroꞌsaꞌ, canpoantaꞌ Quisocristorëꞌquënpoaꞌ chiminëhuaso pochin ninëhuaꞌ niꞌton, co huachi iráca pënëntërinsoꞌ huaꞌanëntiinpoasoꞌ yaꞌhuërinhuëꞌ. Quisocristo chinpitacasoꞌ yaꞌhuërin. Inaso chiminaponahuëꞌ, nani nanpiantarin. Ina imamiatohuatëhuaꞌ, noya nicarihuaꞌ aꞌnapitantaꞌ Yosë noya yonquicaiso marëꞌ. 5Iráca, canpoara nipaꞌyatacasoáchin yonquirëhuaꞌ. Co noyahuëꞌ cancantërëhuaꞌ. Pënënpachinënpoara, aquë aquëtëꞌ co noyahuëꞌ yonquiatëhuaꞌ, co noyahuëꞌ ninëhuaꞌ. Ina marëꞌ chiminpatëhuaꞌ, parisitomiatacasoꞌ yaꞌhuërin. 6Iráca nisha nisha pënëntërinsoꞌ yaꞌhuërin natëcasoꞌ, Moisësëri ninshitërinsoꞌ. “Co yaꞌipiya natëhuatëhuahuëꞌ, co onporontaꞌ chaꞌësarëhuahuëꞌ,” topi. Apinaꞌpi tashinan pëiquë yaꞌhuërinso pochin nipirëhuahuëꞌ. Iporasoꞌ co huachi Moisësë pënëntërinsoꞌ yonquiarëhuahuëꞌ. Quisocristorëꞌquënpoaꞌ chiminëhuaso pochin ninëhuaꞌ niꞌton, co huachi huaꞌanëntiinpoasoꞌ yaꞌhuërinhuëꞌ. Ispirito Santo catahuarinpoaꞌ cancanënpoa quëran huarëꞌ Yosë natëcasoꞌ. Nasha cancan quëtërinpoaꞌ. Napoaton noya nisarëhuaꞌ.

Co noyahuëꞌ yonquirëhuasopita yaminsërinpoasoꞌ

7Napoahuarëꞌ, “Moisësë pënëntërinsoꞌ aoshahuaninpoaꞌ niꞌton, co noyahuëꞌ,” ¿tëcarihuaꞌ ti? ¡Co naporinhuëꞌ! Napoaponahuëꞌ, pënëntërin quëran oshahuanëhuasoꞌ nitotërëhuaꞌ. Iso pochin yonquiaꞌahuaꞌ. “Ama aꞌna piyapi maꞌshanënaꞌ noyapatocosohuëꞌ,” tënin iráca pënëntaton. Casoꞌ ina natanato, “Tëhuënchachin aꞌnapita maꞌshanën noyapatato, co noyahuëꞌ yonquirahuë. Ina marëꞌ oshahuanahuë,” tënahuë. 8“Ama maꞌsha noyapatocosohuëꞌ,” itërinco. Ina natanato, aquë aquëtëꞌ aꞌnapita maꞌshanënaꞌ noyapatërahuë. Co noyahuëꞌ cancantërahuësoꞌ canarinco. Iráca oshahuanpirahuëꞌ. Coꞌhuara pënëntërinsoꞌ nitochatërasocohuëꞌ, oshahuanahuësoꞌ co nitotërahuëꞌ. 9Coꞌhuara pënëntërinsoꞌ natayantërasocohuëꞌ, “Casoꞌ noya piyapico,” topirahuëꞌ. Pënëntërinsoꞌ natanpatëra, “Tëhuënchachin oshahuanco. Chiminpato, Yosë anaꞌintarinco,” tënahuë. 10Noya yaꞌhuëcaꞌhuaso marëꞌ pënënpirincohuëꞌ. Co ina natëtorahuëꞌ, oshahuanahuë. Oshahuanato, parisitopiquë pacaꞌhuasoꞌ yaꞌhuërin. 11Pënëntërinsoꞌ natëhuato, noya cancantarahuë, topirahuëꞌ. Co ina natërahuëꞌ niꞌton, oshahuanahuë. Chiminpato, anaꞌintincosoꞌ yaꞌhuërin.

12Yosë chachin pënëninpoaꞌ. Shaꞌhuitërinpoasoꞌ nóya. Noꞌtëquën nonin. 13Napoahuarëꞌ pënëntërinsoꞌ noya nipirinhuëꞌ, ina marëꞌ anaꞌintarinco, ¿topiramahuëꞌ ti? ¡Co pënëntërinso marëꞌ anaꞌintincosoꞌ yaꞌhuërinhuëꞌ! Oshahuanahuë niꞌton, anaꞌintincosoꞌ yaꞌhuërin. Pënëntërinsoꞌ noya nipirinhuëꞌ natanahuë quëran aquë aquëtëꞌ co noyahuëꞌ yonquiato, co noyahuëꞌ ninahuë. Pënëninpoa quëran oshahuanahuësoꞌ nitotërahuë. Paꞌpi co noyahuëꞌ ninahuë, tënahuë.

14Noya yonquicaso marëꞌ pënënpirinpoahuëꞌ. Casoꞌ co noya yonquiatohuëꞌ, oshahuanahuë. Oshahuanahuësoꞌ huaꞌanëntatë pochin nitërinco. Co nanitërahuëꞌ noya nicaꞌhuasoꞌ. 15Noya nisarahuë, topirahuëꞌ, aꞌnaroáchin co noyahuëꞌ yaninahuë. Co yaoshahuanpirahuëꞌ, oshahuanahuë. Onpoatosoꞌ napomaraco, co nitotërahuëꞌ. 16Co nohuantopirahuëꞌ, co noyahuëꞌ ninahuë. Ina marëꞌ co noya cancantërahuëꞌ. Yonquinëhuë quëran nitotërahuë. Tëhuënchachin pënëntërinsoꞌ noya, tënahuë. 17Co nohuantopirahuëꞌ, caora co noyahuëꞌ cancantato, co noyahuëꞌ ninahuë. Co noyahuëꞌ cancantërahuësoꞌ canarinco. 18Caora co noyahuëꞌ cancantërahuë. Co nanitërahuëꞌ noya nicaꞌhuasoꞌ. Inachinco. Yosë yanatëpirahuëꞌ, caora co nanitërahuëꞌ natëcaꞌhuasoꞌ. 19Noya nicaꞌhuasoꞌ nohuantopirahuëꞌ, co noyahuëꞌ ninahuë. Co yaoshahuanpirahuëꞌ, oshahuanahuë. 20Co nohuantopirahuëꞌ, co noyahuëꞌ ninahuë. Co noyahuëꞌ cancantërahuësoꞌ canarinco.

21Noya nicaꞌhuasoꞌ nohuantopirahuëꞌ, co noyahuëꞌ cancantato, co noyahuëꞌ nicaꞌhuasoráchin yonquiconahuë. 22Cancanëhuë quëran Yosë pënëninpoasoꞌ paꞌyatato, yanatëpirahuëꞌ. 23Aꞌna cancan nohuantërin. Aꞌna cancanso nipirinhuëꞌ, co nohuantërinhuëꞌ. Co noyahuëꞌ nicacasoáchin yonquirin. Ina canarinco niꞌton, co noyahuëꞌ ninahuë.

24¡Maꞌhuantacha casoꞌ ninahuë paya! ¿Incha ipora nichaꞌëinco co noyahuëꞌ yonquirahuësoꞌ naniantaꞌhuaso marëꞌ? tënahuë. 25¡Yosëíchin nanitaparin! Sinioro Quisocristo imarahuë niꞌton, ina catahuarinco. Ina marëꞌ: “Yosparinquën Tata Yosë,” itërahuë. Tëhuënchachin cancanëhuë quëran Yosë yanatëpirahuëꞌ, co noyahuëꞌ cancantato, co noyahuëꞌ ninahuë.

Currently Selected:

Romanos 7: cbt

Highlight

Copy

Compare