Marcos 4
4
Paꞌsarayarin quëran aꞌchininsoꞌ
(Mateo 13.1-9; Lucas 8.4-8)
1Naquëranchin sonoꞌ yonsanquë Quisoso aꞌchiantararin. Inaquë notohuaroꞌ piyapiꞌsaꞌ niyontonpi natanacaiso marëꞌ. Huaꞌhuayatërahuëꞌ tancapitohuachinara, potiquë yaꞌconahuaton, huënsëmarin. Inaquë yanponapirarin. Yaꞌhuërëꞌ piyapiꞌsasoꞌ iiꞌ yonsanquë yamorapi. 2Nisha nisha pënënto nanan aꞌchintarin. Ma pochinsona Yosë nanamën nininsoꞌ ayonquicaso marëꞌ aꞌchintarin.
3Aꞌchintaton, itapon: “Natanco aꞌchinchinquëmaꞌ. Aꞌna quëmapi shaꞌtapon paꞌsarin. 4Naꞌa trico paꞌsarayarin papotacaso marëꞌ. Paꞌsarayahuachina, aꞌnaquën yaꞌpirin iraquë huarëꞌ anotërin niꞌton, inairaroꞌsari huëcapairahuatonaꞌ, pëꞌyaquipi. 5Aꞌnaquën yaꞌpirin naꞌpiroquë paꞌsarayarin, piꞌpian piꞌpian noꞌpaꞌ yaꞌhuërinquë. Inaquë, shiarahuaton, papotopirinhuëꞌ. 6Piꞌiri chiníquën picahuachina, yaahuirin. Piꞌpisharaꞌhuaya itëhuanin niꞌton, ahuirin huachi. 7Aꞌnaquën yaꞌpiriontaꞌ nahuanoquë paꞌsarayarin. Inaquë papotopirinhuëꞌ, nahuanoꞌsantaꞌ papotërin. Shia aꞌshinahuatonaꞌ, imotërin. Napoaton co nitërinhuëꞌ. 8Aꞌnaquënso nipirinhuëꞌ noyaroꞌpaquë paꞌsarayarin. Inaquë noya papotërin. Aꞌshinpachina, shaꞌnin quëran naꞌcon naꞌcon nitërin. Aꞌnaquën yaꞌpirin cara shonca, cara shonca nitërin. Aꞌnaquëontaꞌ saota shonca, saota shonca nitërin. Aꞌnaquënsoꞌ pasa, pasa nitochanin,” itërin.
9Itahuaton: “Huëratëhuanpatamaꞌ, noya natanatomaco, yonquicoꞌ,” itaantarin.
Pënënto nananquë aꞌchininsoꞌ
(Mateo 13.10-17; Lucas 8.9-10)
10Niyontonpisopita paꞌpachinara, aꞌnaquën imapisopita co paꞌpihuëꞌ. Shonca catoꞌ caꞌtanoꞌsanënpitarë chachin co paꞌpihuëꞌ. “Apira aꞌchintërancoisoꞌ co noya nitotëraihuëꞌ. ¿Maꞌtaꞌ tapon naporan?” itopi. 11Itohuachinara, Quisosori itapon: “Onpopinsona Yosë huaꞌanëntërinsoꞌ co aꞌnapita nitotopihuëꞌ. Co imarinacohuëꞌ niꞌton, co nitotopirinahuëꞌ, canpitasoꞌ carinquëmaꞌ aꞌchinchinquëmaꞌ. Yosë nanamën noꞌtëquën nitotacamaso marëꞌ aꞌchinchinquëmaꞌ. Aꞌnapitaso nipirinhuëꞌ pënënto nanan quëransáchin aꞌchintarahuë. 12Inapitasoꞌ co yanatërinacohuëꞌ niꞌton, natanaponaraihuëꞌ, co natëtapihuëꞌ. Maꞌsona ninahuësontaꞌ nicaponaraihuëꞌ, co yonquiapihuëꞌ. Imarinaco naporini, oshanënaꞌ inquitahuato anoyacancanchitohuëꞌ,” itërin.
Tricoraya tapon naporinsoꞌ
(Mateo 13.18-23; Lucas 8.11-15)
13Naquëranchin Quisosori caꞌtanoꞌsanënpita itantapon: “Achin shaꞌhuitëranquëmasoꞌ ¿co nitotëramahuëꞌ ti? Co inaya tërantaꞌ nitotohuatamahuëꞌ, ¿onporahuatomacha yaꞌipiya nitotërëꞌpënquëmaya? Carinquëmaꞌ nipachin anitochinquëmaꞌ. 14Tricoraya paꞌsarayarëso pochin Yosë nanamën yaꞌipi parti aꞌchinëꞌ. 15Aꞌnaquën piyapiꞌsaꞌ iraquë huarëꞌ paꞌsarayarinso pochin nipi. Yosë nanamën natanpirinahuëꞌ, aꞌnaroáchin Satanasë huëꞌnin. Yosë nanamën natanpisoꞌ osërëtiirin. Ama natëcaiso marëhuëꞌ ananiantërin. 16Aꞌnaquën piyapiꞌsantaꞌ naꞌpiroquë paꞌsarayarinso pochin nipi. Yosë nanamën natanahuatonaꞌ, aꞌnaroáchin paꞌyatatonaꞌ, natëpirinahuëꞌ, 17co cancanëna quëran huarëꞌ natëpihuëꞌ. Co chiníquën cancantatonahuëꞌ, co natëmiatopihuëꞌ. Yosë nanamën yaimapi niꞌton, aꞌnapitari tëhuapi, noꞌhuipi, napotopi. Napohuachinara, Yosë nanamën yaaꞌpopi. Maꞌsha onpohuachinara, aꞌnaroáchin nanamën aꞌpopi. 18Aꞌnaquën piyapiꞌsantaꞌ nahuanoquë paꞌsarayarinso pochin nipi. Yosë nanamën natanpirinahuëꞌ, 19maꞌsharáchin yonquipi. ‘Naꞌa coriqui, maꞌsha, inapita yaꞌhuëtohuachincoi, noya cancantarai,’ topi. Napoaton nahuanoꞌsari imotërinso pochin, nani maꞌsha nohuantatonaꞌ, Yosë nanamën naniantopi. Co imamiatopihuëꞌ. 20Aꞌnaquënso nipirinhuëꞌ noyaroꞌpaquë paꞌsarayarinso pochin nipi. Yosë nanamën noya natanpi. Natanahuatonaꞌ, cancanëna quëran natëpi. Sharoꞌsaꞌ nisha nisha nitërinso pochin natëtopi. Aꞌnaquën yaꞌpirin cara shonca, cara shonca nitërinso pochin noyamiachin imapi. Aꞌnaquëontaꞌ saota shonca, saota shonca nitërinso pochin noya imapi. Aꞌnaquënsoꞌ pasa, pasa nitërinso pochin yaꞌipi cancanëna quëran imatonaꞌ, noya noya imapi huachi,” itërin.
Nanparin pochin nininsoꞌ
(Lucas 8.16-18)
21Naquëranchin Quisosori itaantarin: “Niꞌcoꞌ iyaroꞌsaꞌ. Nanparin iꞌchinpihuatëra, ¿co iꞌmëanaquë poꞌmorëhuëꞌ paꞌ? Co pëꞌsaraanaquë tërantaꞌ acorëhuëꞌ. Nanparin aconanquë acorëꞌ noya aꞌpinacaso marëꞌ. 22Iporasoꞌ maꞌsha noyá poꞌopinan pochin niꞌton, co insontaꞌ nitotërinhuëꞌ. Aꞌna tahuëriso nipirinhuëꞌ yaꞌipiya nitotapi. 23Huëratëhuanpatamaꞌ, noya natanatomaco, yonquicoꞌ,” itërin.
24Ina quëran napotaantarin: “Natanpatamaꞌ, noya yonquicoꞌ. Onpopinsona aꞌnapita nitohuatamaꞌ, inapochachin Yosëntaꞌ nitarinquëmaꞌ. Aquë aquëtë chachinhuë nipon quëtarinquëmaꞌ. 25Noya natëhuatamaꞌ, naꞌcon naꞌcon nitotaramaꞌ. Aꞌnaquënso nipirinhuëꞌ, ‘Nani nitotërahuë,’ topirinahuëꞌ, co yanatëpihuëꞌ. Napoaton Yosëri tananpitarin. Inapotohuachina, piꞌpian tërantaꞌ nitotopisoꞌ, yaꞌipiya naniantapi,” itërin.
Yaꞌpirin papotërin quëran aꞌchininsoꞌ
26Ina quëran napotaantarin:
“Yosë huaꞌanëntërinsoꞌ aꞌchinchinquëmaꞌ. Iminquë shaꞌtërëso pochin ninin. 27Shaꞌtërinso piquëran tashihuachina, huaꞌanën huëꞌërin. Tahuërihuachina, huënsëantarin. Nani tahuëri naporárin. Oshaquëran shaꞌninsoꞌ pichopitahuaton, papotërin. Onporohuatonsoꞌ papotërinsoꞌ co nitotërinhuëꞌ. 28Shaꞌpachina, inaora nohuanton, noꞌpa quëran papotërin. Nani aꞌshinpachina, huënsharatërin. Nani huënsharatahuaton, nitërin. 29Yaꞌpirin cayahuachina, nani noya macacasoꞌ niꞌton, manin huachi,” tënin. (Inapochachin Yosë nanamën shaꞌhuitohuatëhuaꞌ, ina nohuanton, oshaquëran aꞌnaquën natëtapi.)
Mostasaraya pochin nininsoꞌ
(Mateo 13.31-32; Lucas 13.18-19)
30Ina quëran shaꞌhuitantarin:
“¿Maꞌpochintaꞌ Yosë huaꞌanëntërinpoasoꞌ ninin? ¿Ma quërantaꞌ nanitërëꞌ ina yonquicasoꞌ? 31Mostasaraya noꞌpaquë shaꞌnëso pochin ninin. Mostasarayasoꞌ huaꞌhuishin. Aꞌnapita yaꞌpirin quëran piꞌpi piꞌpisharaꞌhuaya. 32Piꞌpiraꞌhuaya niponahuëꞌ, shaꞌpatëra, panca panca papotërin. Aꞌnapita sharoꞌsa quëran panca panca taꞌan ninin. Panca sëꞌpatohuachina, inairaroꞌsaꞌ naꞌiyatonaꞌ, inaquë pëipi,” itërin.
Maꞌpochinsona nininsoꞌ
(Mateo 13.34-35)
33Ina pochin Quisosori piyapiꞌsaꞌ aꞌchintarin. Naꞌa pënënto nananoꞌsa quëran ayonquiarin. Natantiinpichin aꞌchintarin. 34Napoaponahuëꞌ, pënënto nanan quëransáchin aꞌchintërin. Ina quëran caꞌtanoꞌsanënpitaráchin yaꞌhuëhuachinara, oshaquëran aꞌchintantarin noꞌtëquën yonquicaiso marëꞌ.
Ihuan aꞌparinsoꞌ
(Mateo 8.23-27; Lucas 8.22-25)
35Naporoꞌ tahuëri chachin nani tashirarapasoꞌ, caꞌtanoꞌsanënpita itapon:
—Sono aquëtëran paꞌahuaꞌ, itërin.
36Nani piyapiꞌsa nontahuaton, Quisoso potiquë yaꞌcomarin. Napohuachina, caꞌtanoꞌsanënpitarë chachin paꞌpi. Naporoꞌ aꞌnapitantaꞌ nisha potiroꞌsaquë paꞌpi. 37Paaquëyaꞌ, panca ihuani manin. Coꞌsacairi poti opoto opototahuaton, nani yamëntairapirinhuëꞌ. 38Yaꞌhuërë Quisososoꞌ, huanconënquë motonan motoantahuaton, huëꞌë́rarin. Caꞌtanoꞌsanënpitari ochinanpi:
—¡Catahuacoi Maistro chimiitarihuaꞌ! ¿Co ina yonquiranhuëꞌ ti? itopi.
39Huanintarahuaton, ihuan aꞌparin. Sonontaꞌ camaiton:
—¡Sanoquëꞌ! ¡Copi tëquë huachi! itërin. Itohuachina, ihuan copitënin. Aꞌnaroáchin sanoirin.
40—¿Onpoatomataꞌ tëꞌhuataramasoꞌ? ¿Co Yosë natëyatëraramahuëꞌ ti? itërin.
41Paꞌpi paꞌyanahuatonaꞌ, ninontopi:
—¿Ma quëmapicha isosoꞌ niꞌton, ihuan aꞌparin nicaya? Sonontaꞌ aꞌnaroáchin asanoirin, nitopi.
Currently Selected:
Marcos 4: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
