Miqueas 2
2
Maꞌhuanoꞌsa co noyahuëꞌ nipisoꞌ
1-2Aꞌnaquëmasoꞌ, huëꞌëramaquëpita co noyahuëꞌ nicacamaso yonquiramaꞌ.
Chiníquën nanantërama niꞌton, tahuërihuachina ina inachachin ninamaꞌ.
Noꞌpahuë nipon noyahuatamara, machinaramaꞌ.
Pëihuë nipon noyahuatamara, ihuatëramaꞌ.
Quëmopinënapitarë chachin piyapiꞌsa aparisitëramaꞌ.
Shimashonënapitari noꞌpaꞌ ayananpipisoꞌ,
shinpitari huaꞌanëntapirinahuëꞌ, inapita ihuaramaꞌ.
Inaporamasopita, ¡maꞌhuántacha canpitaso nisarama paya!
3Napoaton Sinioro napotërinquëmaꞌ:
“Naporamaso marëꞌ carimantaꞌ,
nani yonquirahuë maꞌsha onpotaꞌhuanquëmasoꞌ.
Paꞌpi chiníquën maꞌsha onpoarama niꞌton,
co chaꞌësaramahuëꞌ.
Inapotohuatënquëmaꞌ, co huachi nocantamasoꞌ yonquiaramahuëꞌ.
Paꞌpi co noyahuëꞌ tahuëriꞌsa nisarin niꞌton, napoaramaꞌ.
4Ina tahuëri nanihuachin,
sëtatona oshaapiso pochin
tëhuacaiso marëꞌ cantarapiaponënquëmaꞌ:
‘Noyá ataꞌhuantërinënpoachi paya.
Sinioro piyapinënpitanpoa nipirëhuahuëꞌ,
iporasoꞌ aꞌnapita huaꞌanëntërinënpoaꞌ.
Inapotiinënpoaso marëꞌ co incari tëranta yaꞌcopirinhuëꞌ.
Noꞌpanënpoapitantaꞌ, canarinënpoasopitari nipatomatatonaꞌ,
huaꞌanëntopi huachi,’ itaponëmaꞌ,” tënin Sinioro.
5Siniorosoꞌ catahuainpoaso marëꞌ iráca canpoarë anoyataponahuëꞌ,
iporasoꞌ co huachi catahuarinpoahuëꞌ.
Nonpi nanan pënëntonaꞌpiroꞌsa co noyahuëꞌ nipisoꞌ
6Maꞌhuanoꞌsasoꞌ, nonpi nanan pënëntonaꞌpiroꞌsa taranatonaꞌ,
pënëntërahuësoꞌ acopitiinacoso marëꞌ napotërinaco:
“Co manta maꞌsha onpoarihuahuëꞌ.
Napoaton Sinioro anitotërinquënsoꞌ,
co shaꞌhuitápancoiso yaꞌhuërinhuëꞌ.
7Canpoasoꞌ noya piyapinpoa ninëhuaꞌ. Co Yosë noꞌhuiarinpoahuëꞌ.
Nosorinpoa niꞌton, co anaꞌintiinpoaso yaꞌhuërinhuëꞌ.
Tëhuënchachin naporaiso pochin Yosëso ninin.
Noꞌtëquënáchin ina imapatëhuaꞌ,
shaꞌhuitërinpoasopita noya catahuarinpoaꞌ,” itërinaco.
8Sinioroso nipirinhuëꞌ, inapita pënënaton:
“Inapo pënëntatoma canpitasoꞌ, piyapinëhuëpita tapiramaꞌ.
Inapitasoꞌ co natantochináchinhuëꞌ, cancantatonaꞌ,
co huachi yanatërinacohuëꞌ.
Naporahuatoma piyapinëhuëpita ihuaramaꞌ.
Ahuëtopi quëran huënantahuachinara:
‘Nani huachi inimiconënpoapita quëran chaꞌërëhuaꞌ.
Noya yaꞌhuëarihua huachi,’ itëramaꞌ.
Napotahuatomaꞌ, aꞌmopisopita
naꞌcon naꞌcon paꞌtërinsoꞌ, osërëtëramaꞌ.
9Quëyoronoꞌsanta pëinënaquë noya yaꞌhuëpirinahuëꞌ,
canpitarisoꞌ pëinënapita osërëtëramaꞌ.
Huaꞌhuinapitantaꞌ, noya yaꞌhuëcaiso marëꞌ nani maꞌsha quëtopirahuëꞌ,
inapitanta matatomaꞌ, aparisitëramaꞌ.
10¡Co isëquëranchin yaꞌhuëápamaso yaꞌhuërinhuëꞌ!
¡Paco huachi!
Co canpita iso noꞌpaquë noya chinotápamaso yaꞌhuërinhuëꞌ.
Canpitari iso noꞌpaꞌ tapirama niꞌton, ataꞌhuantaꞌhuaso yaꞌhuërin.
11Nonpi nanan shaꞌhuitonaꞌ: ‘Naꞌcon huino yaꞌhuëapon.
Nisha nisha oꞌoi yaꞌhuëhuachin, oꞌotoma noꞌpirápomaꞌ,’
topisopita tëhuënchinsoꞌ, canpitaso paꞌyatëramaꞌ,” itërin.
Piyapinënpita noya acoantacasoꞌ yonquirinsoꞌ
12Ina quëran Sinioro taantarin:
“Piyapinëhuëpita yaꞌhuëpiso noꞌpa quëran, inimiconënapitari quëpaponaꞌ.
Quëpapirinahuëꞌ, cari chachin yaꞌipi inapita ayontoantarahuë.
Inapitasoꞌ caraya pochin quëparitopirinahuëꞌ,
ohuicaroꞌsa huëꞌërinquë ayontonëso pochin nitarahuë.
Ohuica huënton pastonënquë quëparëso pochin nitarahuë.
Panca huënton ohuica noncaropiso pochin
israiroꞌsa noncaroponaꞌ.
13Cari chachin quëchitato inapita quëpararahuë.
Inapitasoꞌ natëponaco huachi.
Paꞌpachinaꞌ, ninano yaꞌcoanataquëchin pipiponaꞌ.
Caso huaꞌanënaco niꞌto, Yosënënaco,” tënin.
Currently Selected:
Miqueas 2: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
