Miqueas 1
1
Samariaquë yaꞌhuëpisopita Yosëri anaꞌintacaso yonquirinsoꞌ
1Caso Miquiasëco. Morisito ninanoquë huaꞌhuatërahuë. Inasoꞌ ninanoꞌ, Cota huënton israiroꞌsa noꞌpanënquë yaꞌhuërin. Sinioro huaꞌnarëso pochin aꞌnotatonco anitotërincosopita iso quiricaquë ninshitaranquëmaꞌ. Samaria, Quirosarin, inapita ninanoroꞌsa maꞌsona onpotacasoꞌ yonquirinsoꞌ, ninshitarahuë. Cotamo copirno Cota huëntonquë huaꞌanëntasoꞌ, anitotërinco. Ina piquëran Acasonta huaꞌanëntasoꞌ, anitotaantarinco. Ina piquëran Isiquiasënta huaꞌanëntaso anitotërincosopita, ninshitaranquëmaꞌ.
2Yaꞌipi piyapinquëma nontaranquëmaso natancoꞌ.
Yaꞌipi isoroꞌpaquë yaꞌhuëramasopita noya natancoꞌ:
Sinioro chachin chinotërëhuaso pëinën quëran,
co noyahuëꞌ ninamasopita nicaton, shaꞌhuirapiarinquëmaꞌ.
3Inaso yaꞌhuërin quëran pipirahuaton,
motopiroꞌsa aipi huëcapon.
4Huëcasoꞌ, motopiroꞌsa soquiapon.
Paꞌnan pëni apoirinso pochin nitapon.
Pama paquiitahuaton casharinso pochin
motopianaroꞌsa nochataponaꞌ.
5Israiroꞌsa Sinioro co yanatëpiso marëhuëꞌ napoarin.
Inapoatona naꞌcon oshahuanpi niꞌton, napoarin.
¡Samaria ninanoquë chachin
israiroꞌsa co natantochináchinhuëꞌ cancantopi!
¡Quirosarin ninanoquë chachin
Cota huënton israiroꞌsantaꞌ, inahuara nohuanton artaroroꞌsa acopi!
6Napoaton Sinioro naporin:
“Ca nohuanton Samaria ninano taꞌhuantohuachin,
naꞌpiroꞌsaraꞌ yamorápon.
Inaquë chachin opa shacatona oparotaponaꞌ.
Naꞌpinënpitantaꞌ, motopianaquë paꞌsa paꞌsatapo.
Ninanonëna pairapicaiso marëꞌ simintonën acopisontaꞌ, ayaꞌnoarahuë.
7Yaꞌipi mamanshinënapita paꞌquiaponaꞌ.
Chinotacaiso marëꞌ nararoꞌsanta acopisoꞌ, ahuiquitaponaꞌ.
Soꞌyahuan niponahuëꞌ, soꞌin tëhuananpitërinso pochin cancantatonaꞌ,
ina mamanshiroꞌsaꞌ, nararoꞌsaꞌ, inapita moshacaiso marëꞌ acopi.
Napoaton yaꞌipi inapita ataꞌhuantarahuëꞌ,” tënin.
Miquiasë sëtaton oshaarinsoꞌ
8Sinioro napoarin niꞌton, co napion ancantato naꞌnërápo.
Sapatë ocoirahuato, iꞌnanpinantë paꞌsápo.
Aꞌmorahuësontaꞌ, paꞌcoirahuato iꞌnanpirapi paꞌsápo.
Asaniꞌ naꞌnëton, “huaoo,” tárinso pochin cantaꞌ, naꞌnërápo.
Huacopi sëtërinso pochin, nisápo.
9Samariaquë yaꞌhuëpisopita Siniorori anaꞌintaton,
co noyatochináchinhuëꞌ acoarin.
Cota huënton israiroꞌsantaꞌ, parisitacaiso canquiarin.
Quirosarin ninanoquë naꞌcon naꞌcon israiroꞌsa yaꞌhuëpirinahuëꞌ,
inapitanta parisitacaiso canquiarin niꞌton, napoarahuë.
10Inaporëhuasoꞌ, ama Cato ninanoquë yaꞌhuëpisopita shaꞌhuitocosohuëꞌ.
Ama naꞌnëcamasoꞌ nohuantocosohuëꞌ.
Co napion ancantatomaꞌ,
Piti-ri-apra ninano amocantërinquë, nianapitocoꞌ.
11Sahuiri ninanoquë yaꞌhuëramasopitantaꞌ,
aꞌna noꞌpaꞌpaꞌ quëpainëmaso yaꞌhuërin.
Iꞌnanpirashitëꞌ quëpaponëma niꞌton,
paꞌpi taparo nicapomaꞌ.
Saanan ninanoquë yaꞌhuëramasopitasoꞌ, tancapitaponënquëmaꞌ.
Napoaton co pipiamasoꞌ, nanitaramahuëꞌ.
Piti-siri ninanoquë yaꞌhuëpisopitantaꞌ, naꞌnëmiataponaꞌ.
Co huachi inso Cota huënton Israiro tërantaꞌ,
ina ninano quihuiponhuëꞌ.
Inimiconënapitari ataꞌhuantërin niꞌton,
co huachi ina quihuiponahuëꞌ.
12Quirosarinquë yaꞌhuëpisopita ahuëcaiso marëꞌ
Sinioro nohuanton inimiconënpitari cantiarin.
Napoaton Marotoquë yaꞌhuëpisopitantaꞌ,
aꞌnapitari catahuacaiso marëꞌ co napion cancantapi:
“Catahuainacoiso ninapiraihuëꞌ,
co aꞌna catahuaponacoihuëꞌ nimara,” taponaꞌ.
13Naquisi ninanoquë yaꞌhuëramasopita,
canpita aꞌchinama quëran israiroꞌsa nisha cancantopi.
Quirosarinquë yaꞌhuëpisopitantaꞌ, anishacancantëramaꞌ.
Ina marëꞌ canpitantaꞌ, inimico taꞌananpiamaso marëꞌ
toronanoꞌsa cahuarioroꞌsaquë aꞌsontocoꞌ.
14Morisito-cato ninanoquë yaꞌhuëpisopita
co huachi onporo tëranta niantapomahuëꞌ.
Napoaton nontahuatoma patocoꞌ.
Aquisipi ninanoquë yaꞌhuëpisopitantaꞌ,
Israiro copirnoroꞌsa anishacancantaponaꞌ.
15Ina quëran Sinioro taantarin:
“Marisa ninanoquë yaꞌhuëramasopitantaꞌ,
ahuëinquëmaso marëꞌ aꞌnara minsëtonaꞌpi, aꞌpataranquëmaꞌ.
Ina huëꞌpachin, Israiro copirno, huaꞌanoꞌsaꞌ, inapita
Atoramo ninano yaꞌcari nanin yaꞌhuërinquë,
naꞌpicaiso marëꞌ yaꞌconaponaꞌ.
16Canpitanta Quirosarin ninanoquë yaꞌhuëramasopita,
co napion ancantatomaꞌ, noyá niyaꞌitocoꞌ.
Huiꞌnamapita nosoromiatëramasoꞌ yonquiatomaꞌ, inapocoꞌ.
Inapitasoꞌ aꞌna parti inimiconëmapitari quëpapona niꞌton,
motëma tamë moto pochin yaꞌnoamaquë huarëꞌ, niihuimototocoꞌ,” tënin.
Currently Selected:
Miqueas 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
