Miqueas 3
3
Co noyahuëꞌ huaꞌanoꞌsa Yosëri anaꞌintacaso shaꞌhuitërinsoꞌ
1Aꞌna tahuëri Siniorosoꞌ pënëntaton:
“Israiro huaꞌanoꞌsanquëmaꞌ. Iporasoꞌ canpita pënënaranquëmaꞌ:
¡Canpitaꞌton mini piyapiꞌsa noya nicatoma paꞌpoyamaso yaꞌhuërin!
2-3Canpitaso napoaponahuëꞌ, co noyahuëꞌ nicacasoꞌ paꞌyatatomaꞌ,
noya nicacasosoꞌ, co paꞌyatëramahuëꞌ.
Nosha paꞌanaꞌpisoꞌ, ohuica tëparahuaton iꞌsorin.
Inapotahuaton noshinën nanquitërin.
Nanquitohuachina, nansëquënáchin acorinso pochin
canpitanta piyapinëhuëpita aparisitëramaꞌ.
Ohuica iꞌsorahuatona poꞌmocaiso marëꞌ yaquipiso pochin
piyapinëhuëpita co tënororamahuëꞌ.
4Naporamaso marëꞌ aꞌna tahuëri maꞌsha onpoatoma nontaramaco.
Nontopiramacohuëꞌ, co aꞌpaniaranquëmahuëꞌ.
Paꞌpi co noyahuëꞌ ninamaso marëꞌ
naꞌpitatë pochin nitaranquëmaꞌ,” itërin.
Nonpi nanan pënëntopisopita anaꞌintacaso shaꞌhuitërinsoꞌ
5Naquëranchin Sinioro taantarin:
“Piyapinëhuëpitasoꞌ, chihuëpiso pochin nisha nisha yonquipi.
Nonpi nanan pënëntopisopitari nonpintopi niꞌton, napopi.
Inapitasoꞌ insoari tëranta aꞌcahuachinaꞌ: ‘Quëmasoꞌ noya yaꞌhuëaran,’ itopi.
Yaꞌhuërëꞌ co aꞌcahuachinarahuëꞌ:
‘Quëmaso napoonin yaꞌhuëapon,’ itopi.
Napoaton cari chachin inapita itapo:
6‘Canpitaso tashi nipachina, huaꞌnarëso pochin
yonquirahuëso anitotëranquëmaꞌ.
Iporaso nipirinhuëꞌ, co huachi
yonquirahuësoꞌ anitotaponquëmahuëꞌ.
Aꞌna tahuëri maꞌsona onpocasonta anitotopiranquëmahuëꞌ,
iporasoꞌ co huachi anitotaponquëmahuëꞌ,’ itarahuë.
Piꞌi yaꞌconpachina co huachi quënantërëhuëꞌ.
Inapochachin nonpi nanan pënëntonaꞌpiroꞌsantaꞌ,
co huachi manta anitotapohuëꞌ.
7Ninoton quënanaꞌpiroꞌsaꞌ, ninotonaꞌpiroꞌsaꞌ, inapitaso
co huachi noꞌtëquën shaꞌhuiponahuëꞌ niꞌton, piyapiꞌsari tëhuaponaꞌ.
Napoaton, inapitaso paꞌpi taparo nisapi.
Co huachi anitotapohuë niꞌton, taꞌtápona huachi,” tënin.
8Caso nipirinhuëꞌ, noꞌtëquën Sinioro marëꞌ pënëntarahuë niꞌto,
achinirinco. Catahuarinco noya nicaꞌhuasoꞌ.
Chiníquën cancantato, israiroꞌsa pënënarahuë:
“Canpitaso co Yosë natëtomarahuëꞌ, naꞌcon oshahuanamaꞌ,” itárahuë.
Siniorori Quirosarin ninano ataꞌhuantarinsoꞌ
9Naquëranchin Sinioro pënëntaantarin:
“Israiro huaꞌanoꞌsanquëmaꞌ,
ipora chachin pënëantaꞌinquëma natanco:
‘Canpitaso noya nicacasoꞌ co paꞌyatëramahuëꞌ.
Napoatoma noya nisapisopitantaꞌ, anaꞌintoconamaꞌ.
10Chinotërinacoso pëi yaꞌhuërinquë, Quirosarin ninanoquë,
inaquëpita nitëparápi, niihuarápi, naporápi nipirinhuëꞌ,
canpitaso huaꞌanoꞌsanquëma co manta tënamahuëꞌ.
11Coisëroꞌsa pahuërëhuachinara,
co huachi tëhuënaꞌpiroꞌsa anaꞌintopihuëꞌ.
Corto huaꞌanoꞌsanta pahuërëai huarëꞌ, nanamëhuë aꞌchinpi.
Pënëntonaꞌpiroꞌsanta pahuërëhuachinara:
“Yosë catahuarinpoa canpoasoꞌ.
Niꞌsárinpoa niꞌton, co manta onpoarihuahuëꞌ.
Noya yaꞌhuëáparihuaꞌ,” itopi.
12Naporamaso marëꞌ chinotëramacoso pëi
ohuatapona niꞌton, pantatápon.
Quirosarin ninanontaꞌ, ina pochachin nitapi,’ tënahuë,” tënin.
Currently Selected:
Miqueas 3: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
