Josué 1
1
Yosëri Cosoi camairinsoꞌ
1Moisësësoꞌ Yosë piyapinën. Non huiꞌnin Cosoi itopisoso nipirinhuëꞌ, Moisësë catahuarin. Ina chiminpachina, Yosëri Cosoi nontaton itapon: 2“Piyapinëhuë Moisësë itëramasoꞌ, nani chiminin. Ina chiminin niꞌton, quëmari yaꞌipi israiroꞌsa Cortaniiꞌ ichipëntontaran. Noꞌpaꞌ quëtaranquëmaquë yaꞌconacamaso marëꞌ napoaramaꞌ. 3Moisësë shaꞌhuitërahuëso chachin nitaranquëmaꞌ. Insëquë huarësona paꞌnamaquë yaꞌipi ina noꞌpaꞌ quëtaranquëmaꞌ. 4Niquipi inotëro parti quëran noꞌpaꞌ quëtaranquëmasoꞌ caniaritarin. Nipano motopiroꞌsa partinta quëtaranquëmaꞌ. Iyopiratisiiꞌ pancaiquë huarëꞌ quëtaranquëmaꞌ. Itiroꞌsa yaꞌipi noꞌpaꞌ mapisoꞌ mataramaꞌ. Marë pancaiꞌ itopiquë huarëꞌ huaꞌanëntaramaꞌ. 5Nanpisënquën, co inso tëranta nanitarinhuëꞌ minsëinquënsoꞌ. Moisësë catahuarahuëso pochachin quëmanta catahuaranquën. Co naniantaranquënhuëꞌ. Co pataranquënhuëꞌ. 6Ama tëꞌhuatonhuëꞌ, chiníquën cancantëquëꞌ. Carinquën catahuaranquën inimicoroꞌsa minsëaran. Inapita minsërahuaton, noꞌpanëna israiroꞌsa patomataran. Nani shimashonënapita quëtaꞌhuasoꞌ shaꞌhuitërahuë niꞌton, inapotaran. 7Napoaton ama tëꞌhuatonhuëꞌ, chiníquën cancantëquëꞌ. Piyapinëhuë Moisësë nani pënëninquëmaꞌ. Yaꞌipi ina pënëntërinsoꞌ natëquëꞌ. Ama manta ina naniantëquësohuëꞌ. Ina pochin nipatan yaꞌipi maꞌpitaso ninanquë noya pipitarinquën. 8Nani tahuëri pënëntërahuësoꞌ quirica nontocoꞌ. Naporahuaton noya natëancoso marëꞌ tahuëri tashirë chachin ina yonquiráquëꞌ. 9Carinquën camaiaranquën ama tëꞌhuatonhuëꞌ, chiníquën cancantacaso marëꞌ. Carinquën catahuaranquën. Insëquësona paꞌpatan caꞌtanaranquën. Napoaton ama paꞌyanquësohuëꞌ,” itërin Yosëri.
Cananoꞌsa ahuëcaiso marëꞌ noya niacopisoꞌ
10Yosëri napotohuachina Cosoisoꞌ, Israiro huaꞌanoꞌsa camairin: 11“Yaꞌipi yaꞌhuëarëhuataëchin paꞌtocoꞌ. Paꞌsahuatoma israiroꞌsa camaico cosharo carahuasoꞌ, niinaꞌ. Cara tahuëri quëran Cortaniiꞌ pëntontarihuaꞌ. Sinioro noꞌpaꞌ quëtarinpoaquë, yaꞌconacaso marëꞌ napoarihuaꞌ. Inaquë naꞌa inimicoroꞌsa yaꞌhuëpirinahuëꞌ, Yosë catahuarinpoa niꞌton, minsëarihuaꞌ. Minsërahuatëhuaꞌ, noꞌpanëna matarihuaꞌ,” itërin.
12Nopino huënton, Caro huënton, Manasisi patoma huënton, inapitanta nontaton itapon:
13—Moisësësoꞌ Sinioro piyapinën. Ina camairinquëmasoꞌ, yonquicoꞌ. Sinioroso Yosënënpoa niꞌton, noya yaꞌhuëcamaso marëꞌ noꞌpaꞌ quëtarinquëmaꞌ. 14Yaꞌipinquëma nito ahuëtëramasopita, ahuëtamarë ohuararamaso macoꞌ. Saꞌamaꞌ, huiꞌnamaꞌ, inapitaso isëranchin quëparitapi. Pëꞌtahuanëmanta isëranchin quëparichin. Moisësë noꞌpaꞌ quëtërinquëmaquë, quëparitapi. Canpitaso nipirinhuëꞌ, yaꞌnatontatoma pacoꞌ. Quëmopinëma iscon huënton patoma yaꞌhuërinsoꞌ, catahuamaso marëꞌ pacoꞌ. Canaan noꞌpaquë yaꞌhuëpisopita minsërahuatomaꞌ, noꞌpanëna matamaso marëꞌ inapocoꞌ. 15Quëmopinëmanta Siniorori catahuapon. Canpita catahuarimaso pochachin inapitanta noꞌpaꞌ quëtohuachina, sano cancantapi huachi. Nani inapitanta noꞌpaꞌ huaꞌanëntohuachinaꞌ, canpitanta yaꞌhuëramaquë chachin huënantapomaꞌ. Noꞌpanëmaquë yaꞌhuëmiatamaso marëꞌ huënantapomaꞌ, itërin.
16Napotohuachina inapitasoꞌ, Cosoi itaponaꞌ:
—Yaꞌipi camairancoisopita nisarai. Intohuaso pacaꞌhuaiso camaihuatancoi, inaquë paꞌsarai. 17Moisësë camaihuachincoira natërai. Inapochachin quëmanta natëarainquën. Isoíchin nohuantëraisoꞌ shaꞌhuichinquën: Sinioroso Yosënënpoa niꞌton, Moisësë caꞌtanaton catahuarin. Inapochachin quëmanta caꞌtanatënquën catahuainquën. 18Insosona tëranta quëma camaitëranso co natëhuachinquënhuëꞌ, chimiin. Isoíchin nohuantërai quëma nicacasoꞌ: Ama tëꞌhuatonhuëꞌ, chiníquën cancantëquëꞌ, itopi.
Currently Selected:
Josué 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
