Josué 2
2
Quirico ninano nëhuëcaiso marëꞌ catoyaꞌpi aꞌparinsoꞌ
1Israiroꞌsasoꞌ, Sitin itopisoꞌ roꞌtëquë yaꞌhuëantarapi. Ina quëran Cosoisoꞌ catoyaꞌpi nëhuëtacaiso marëꞌ aꞌparin. Coꞌhuara paꞌshátërasoihuëꞌ itapon: “Poꞌoana quëran Canaan parti paatoma niꞌcontacoꞌ. Inaquë paꞌsahuatoma Quirico ninano noya niꞌcoꞌ. Nani niꞌsahuatomaꞌ, shaꞌhuitiimaco,” itërin. Napotohuachina, paꞌpi. Paꞌsápatona Quirico ninanoquë canconpi. Inaquë aꞌnara monshihuantë sanapi yaꞌhuërin. Inasoꞌ, Nacapa itopi. Ina pëinënquë cansahuatonaꞌ, huëꞌëpatacaiso marëꞌ quëparitopi. 2Napoaponahuëꞌ, aꞌna yaꞌhuëhuani quënanahuaton, Quirico copirno shaꞌhuitoonin:
—Cato Israiro quëmapiꞌsa yaꞌhuërëhuasoꞌ, nëhuëcaiso marëꞌ huëꞌpi, itërin. 3Napotohuachina, Nacapa natanacaiso marëꞌ sontaroꞌsa aꞌparin. Inapitasoꞌ cantonahuatona natanpi:
—Cato quëmapiꞌsa huëꞌëpaiarinën, topi natantërai. Inahuaso nëhuëtonaꞌpiroꞌsa niꞌton, ocoiquë quëpaꞌi, itopi. 4Napotopirinahuëꞌ, inariso coꞌhuara sontaroꞌsa huëꞌshátërasoihuëꞌ nani poꞌorin. Napoaton itapon:
—Tëhuënchachin mini cato yaꞌpi niꞌquirinaco. Napoaponahuëꞌ, intohuaranso huëꞌpiso co nitotërahuëꞌ. 5Nani yatashirapasoꞌ paꞌpi. Naporo oraquë, ninano yaꞌcoananta oncotapi. Intohuasona paꞌpisoꞌ, co nitotërahuëꞌ. Napoaponahuëꞌ, aꞌnaroáchin imapatamaꞌ, icantaramaꞌ, itërin. 6Pëinën aipi#2.6 Pëinën aipi topachina: Co canpoa pëi pochin yonquicaso yaꞌhuërinhuëꞌ. Siminto quëran aꞌcanpiso pochin inahuaso aꞌcanpi. ananpërahuaton poꞌoaponahuëꞌ, naporin. Rino#2.6 Rino: Itopi quëran piꞌshi ocoiatona nëꞌmëtë nipi. tonporoꞌsa aꞌhuintacaso marëꞌ acorinso huáncana poꞌorin. 7Nacapa naporinso natanahuatonaꞌ, copirno sontaronënpitaso aꞌnaroáchin imapi. Inapita pipihuachinara, ninano yaꞌcoana oncotaantapi. Sontaroꞌsasoꞌ Cortaniiꞌ ira paꞌtopi. Ina paꞌtatonaꞌ, pëntoinanoꞌsaquë huarëꞌ imapi.
8Nëhuëtonaꞌpiroꞌsa coꞌhuara huëꞌëshátërasoihuëꞌ, Nacaparisoꞌ nanpëontarahuaton itapon:
9—Tëhuënchachin Sinioro yaꞌipi iso noꞌpaꞌ canpita quëtaponquëmaꞌ. Ina nohuanton quiyaso paꞌpi tëꞌhuatërainquëmaꞌ. Yaꞌipi isëquë yaꞌhuëraisoꞌ, naporai. 10Canpita Iquipito quëran pipihuatamara, Yosëri Quëhuai marë ayanirin. Pëntonamaso marëꞌ napotërin. Naporahuaton cato amoro copirnoroꞌsa ataꞌhuantëramaꞌ. Piyapinënapitarë chachin napotëramaꞌ. Inapitasoꞌ Cortaniiꞌ aquëtëran yaꞌhuëpirinahuëꞌ, napotëramaꞌ. 11Inapita nitotatoi, paꞌpi tëꞌhuatërainquëma huachi. Napoaton co incoi tëranta nanitëraihuëꞌ, chinitaꞌhuainquëmasoꞌ. Canpita Sinioro imaramasosoꞌ, Yosë chachin. Inápaquë huaꞌanëntërinso pochachin isoroꞌpaquënta huaꞌanëntërin. 12Napoaton Yoscoarëꞌ taꞌtomaꞌ, quëmopinëhuëpitaroꞌco chachin nichaꞌëco. Carinquëma nosororanquëmaso pochachin canpitanta nosoroco. Naporahuaton noꞌtëquën nontëramacosoꞌ nitotaꞌhuaso marëꞌ maꞌsha tëranta quëtoco. 13Ama tatahuë, mamahuë, inapita tëpatocosohuëꞌ. Yoꞌyohuëpita, caihuëpita, inapitanta nosorocoꞌ. Yaꞌipi maꞌshanënanta ama ataꞌhuantocosohuëꞌ, itërin. 14Napotohuachina aꞌnari itapon:
—Inso Israiro quëmapi tërantaꞌ, maꞌsha onpotohuachinquëmaꞌ, Sinioro chachin catocoi tëpaꞌincoi. Quëmahuë nipon, quëmopinënpitahuë nipon, maꞌsha onpotohuachinënquëmaꞌ, inapochincoi. Coꞌsoꞌ anoyatërëhuaso shaꞌhuihuatanhuëꞌ, inapotarainquën. Sinioro iso noꞌpaꞌ quëtohuachincoi, quiyarinta noꞌtën chachin nosoroarainquëmaꞌ, itërin.
15Ninano pairanënquë chachin Nacapasoꞌ, pëinën paquërin. Ina niꞌton, huintananëntaquëchin noninquë cato chachin chinohuararin. Ama insoari tëranta quënanacaso marëhuëꞌ naporin. 16-17Coꞌhuara chinohuarayátërasohuëꞌ, pënënin:
—Motopiroꞌsa parti paatoma cara tahuëri naꞌpicoꞌ. Ama sontaroꞌsa quënanainëmaso marëhuëꞌ inapocoꞌ. Nani inapita huënantahuachinaꞌ, naporo huarëꞌ yaꞌhuëaramaquë pacoꞌ, itërin. Napotohuachina inapitari itaponaꞌ:
—Yoscoarëꞌ catahuaranquëma itëranquënsoꞌ, noꞌtëquën natëarai. 18Napoaponahuëꞌ, quëmanta iso huintanaquë quëhuan nonin aꞌsonamaso yaꞌhuërin. Iso noꞌpaꞌ macaꞌhuaiso marëꞌ yaꞌipicoi huëntahuatoi, nonin aꞌsonan quëran pëinën nohuitapi. Nani canquihuatoi isëquësáchin niyontoncoꞌ. Tataparin, mamaparin, yoꞌyoparinpita, caiparinpita, inapita isëquësáchin ninachinaꞌ. Yaꞌipi inahua quëmopinënpitanta niyontoinaꞌ. 19Insosona aipiran paꞌsápachin tëpaarai. Inaora tëhuënënquë chiminapon. Co quiya tëhuëaraihuëꞌ. Napoaponahuëꞌ, insoari tëranta iso pëianaquë yaꞌhuëarinso maꞌsha onpotohuachin, naꞌintarincoi. Quiya catocoi naꞌintarincoi. 20Inaso nipirinhuëꞌ, Yoscoarëꞌ taꞌtëhua anoyatërëhuaso shaꞌhuihuatan, co huachi quiyanta shaꞌhuitëranquënsoꞌ nisaraihuëꞌ, itopi. 21Napotohuachina Nacapasoꞌ tapon:
—Noyapaꞌ. Inapoaꞌahua nipachin, tënin. Napotahuaton huintananën quëran chinohuarahuachina paꞌpi huachi. Nani paꞌpachinara quëhuan nonin huintananënquë aꞌsonin. Aipiran quëran aꞌsonin. 22Cato yaꞌpiso motopiroꞌsa parti paꞌpi. Inaquë cara tahuëri naꞌpipi. Sontaroꞌsarisoꞌ yonisápirinahuëꞌ, co quënanpihuëꞌ. Napohuachina huënantapi. 23Naporoꞌ inahuasoꞌ, motopi quëran oꞌmantapi. Cortaniiꞌ pëntontahuatonaꞌ, Cosoi yaꞌhuëarinquë panantapi. Nani camahuachinara yaꞌipi napopisoꞌ Cosoi shaꞌhuitopi:
24—Nani huachi Siniorori yaꞌipi ina noꞌpaquë yaꞌhuëpisopita aꞌpayanin. Napoaton co oshatarihuahuëꞌ, inapita minsëcasoꞌ, itopi.
Currently Selected:
Josué 2: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
