Jonás 2
2
1-2Sami yoꞌnamënquë yaꞌhuëarin quëran chachin, Conasëso Yosë nontaton:
“Sinioro. Quëmaso Yosënëhuënquën.
Yachimiitato co napion ancantasoco, catahuancoso marëꞌ nontëranquën.
Naporoꞌ quëmasoꞌ, aꞌpaniranco.
Marë anpotërinquë yachimiitasoco,
chiníquën nontohuatënquëna, natanatonco catahuaranco.
3-4Quëma nohuanton nancha camayoroꞌsaꞌ,
marë huancoanaiꞌ tëꞌyaitërinaco.
Marë chiniiroꞌsa soꞌnantatë pochin nitërinco.
Panca coꞌsacairoꞌsa aꞌparansopitantaꞌ,
imoto imototërinaco.
Naporoꞌ iso pochin yonquirahuë:
‘Iporasoꞌ, co huachi chinotëranquënso pëiquë
yaꞌconato, chinotaantaponquënhuëꞌ.
Quëma pëinënsoꞌ, noyasáchin ninin,’ tënahuë.
5-6Marë anpotërinquë tëꞌyaitohuachinacora
inaquë oniquin yaꞌhuërinsoꞌ, soꞌquëmototërinco.
Motopiroꞌsa nanimarinꞌpaꞌ huarëꞌ, camarahuë ninatanahuë:
‘Co huachi onporo tëranta isëquëran pipipohuëꞌ,’ topirahuë.
Quëmaso Sinioro, Yosënëhuënquën.
Caso chaꞌëcaꞌhuasoꞌ, co yonquipirahuëꞌ,
panca sami miꞌtiincoso marëꞌ aꞌparahuaton,
chimirin quëran nichaꞌëranco.
7Nani yachiminasoco quëma Sinioro yonquiranquën.
Catahuaancoso marëꞌ nontëranquënsoꞌ,
chinotërainquënso pëi quëran natananco.
Quëma pëinënsoꞌ, noyasáchin ninin.
8-9Aꞌnaquënsoꞌ, mamanshiroꞌsa moshatonaꞌ, aꞌporinën.
Caso nipirinhuëꞌ, ‘Yosparinquën Sinioro,’ itatënquën chinotaranquën.
Quëma marëꞌ maꞌsha tëparahuato chinotaranquën.
Maꞌsona nicacaꞌhuaso shaꞌhuitëranquënsopitantaꞌ, ananiarahuë.
Quëmasáchin Sinioro nanitëran nichaꞌëancoisoꞌ,” itërin.
10Ina quëran Siniorori camaihuachina, panca samisoꞌ, yonsanꞌpaꞌ Conasë imoconin.
Currently Selected:
Jonás 2: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
