Jonás 3
3
Ninihuiquë yaꞌhuëpisopita Yosëri nichaꞌërinsoꞌ
1Naquëranchin Siniorori Conasë camaiantarin: 2“Ninihuiso panca ninanoꞌ. Inaquë paꞌsahuaton nanan shaꞌhuitaranquënso shaꞌhuiconquëꞌ,” itërin.
3Napotohuachina, Conasëso Siniorori camairinso chachin ninin. Ninihuiquë canconahuaton niꞌpirinhuëꞌ, inaso panca ninanoꞌ. Cara tahuëri irataihuarëꞌ yaꞌipi áquipi. 4Conasëso inaquë yaꞌconahuaton, aꞌna tahuëriraꞌ iratërin. Papon pochin pënëntërarin: “¡Catapini shonca tahuëriya quëran Yosëri iso ninano ataꞌhuantapon!” tërarin.
5Yaꞌhuëhuanoꞌsaso ina natanahuatonaꞌ, yaꞌipiya quëran natëpi: “Tëhuënchachin Yosë napotarinpoaꞌ. Huëco paꞌahua ayono nicatëhua Yosë nontahuaꞌ. Co noyahuëꞌ nicatëhua oshahuanëhuasoꞌ, aꞌpoaꞌahuaꞌ. Paꞌpi sëtërëhuaso aꞌnocaso marëntaꞌ, saꞌcatën nininso aꞌmoahuaꞌ,” niitopi. 6Copirnonta ina nitotahuaton, huaꞌanëntërinso shiranën quëran huanirin. Copirno niꞌton, noyápiachin aꞌmopirinhuëꞌ. Ina paꞌcoirahuaton, saꞌcatën nininso aꞌmorin. Ina quëran aipiran paꞌsahuaton, huariano aipi huënsëconin. Co noyahuëꞌ nininsopita aꞌporinsoꞌ, aꞌnocaso marëꞌ naporin. 7Ina quëran catahuarinsopita huaꞌanoꞌsapitarë chachin yaꞌipi ninanoquë, maꞌsona onpocaiso camaitërin:
“Ama insonta coshachinsohuëꞌ. Pëꞌtahuanënaꞌ, pëꞌtahua huëntonënaꞌ, inapitanta co aꞌcacaiso yaꞌhuërinhuëꞌ. Co iꞌsha tëranta oꞌshitacaiso yaꞌhuërinhuëꞌ. 8Yaꞌipiya quëran saꞌcatën nininso aꞌmoinaꞌ. Pëꞌtahuanëna quëran huarëꞌ, ina pochin aꞌmochinaꞌ. Co napion ancantërëhuasoꞌ, aꞌnocaso marëꞌ inapoaꞌahuaꞌ. Naporahuatëhua yaꞌipi cancanënpoa quëran Yosë nontahuaꞌ. Yaꞌipi co noyahuëꞌ ninëhuasopita, noꞌhuitërayanpoa nicatëhuaꞌ, co tënorotochináchinhuëꞌ cancantërëhuasopita, inapita yaꞌipi aꞌpoaꞌahuaꞌ. 9Tapona Sinioro nosoroatonpoaꞌ, noꞌhuirinpoaso asanoápirinhuëꞌ. Inapohuachin, co tëpaonpoahuëꞌ,”
tënin. 10Copirno camaitërinso chachin yaꞌipi piyapiꞌsa co noyahuëꞌ nipiso aꞌpopi. Yosësoꞌ, napopiso niꞌnin. Ina nicaton nosororin. Inapoaton ataꞌhuantacaso yonquirinsoꞌ, tananpitërin.
Currently Selected:
Jonás 3: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
