Jonás 1
1
Yosëri Conasë Ninihui ninanoquë aꞌparinsoꞌ
1Israiro noꞌpaquë aꞌnara pënëntonaꞌpi yaꞌhuërin, Conasë itopisoꞌ. Paꞌpinsoꞌ, Amitai itopi. Aꞌna tahuëri Conasësoꞌ, Siniorori camairin: 2“Ninihuisoꞌ, panca ninanoꞌ. Napoaponahuë inaquë yaꞌhuëpisopitasoꞌ, co imatonacohuë paꞌpi co noyahuëꞌ nipi. Napoaton inaquë paquëꞌ. Paꞌsahuaton ataꞌhuantaꞌhuaso yonquirahuësoꞌ, shaꞌhuiconquëꞌ,” itërin.
3Napotopirinhuëꞌ, Conasëso co inaquë pacatonhuëꞌ, niquë paꞌnin. Sinioro yataꞌananpiton, Copë ninano nonshinanquë paꞌmarin. Inaquë nipachina, aꞌnara panca nancha Tarsis ninanoquë#1.3 Tarsis ninanosoꞌ: Inaso ninanosoꞌ, Ispania parti yaꞌhuërin topi. yapaꞌsarinsoꞌ, quënanconin. Inanta pahuërëtahuaton, Sinioro taꞌananpicaso marëꞌ imatërin.
4Marë huancoanaiꞌ paꞌsapirinahuëꞌ, Sinioro nohuanton panca ihuaiꞌ paꞌnin. Napohuachina, panca coꞌsacaitërin. Napoaton: “Ipora tëhuënchinso nancha yaꞌquiapon,” topi yonquiatonaꞌ. 5Coꞌhuara inapoyátërasohuëꞌ, Conasëso pëꞌpëto quëpapiquë yaꞌcomarahuaton huëꞌësárin. Nancha quëpanaꞌpiroꞌsantaꞌ, paꞌpi paꞌyanpi. Napoatonaꞌ, mamanshinënapitari nichaꞌëcaiso marëꞌ nontopi. Nontopirinahuëꞌ, co yasanoirinhuëꞌ. Napohuachina, nancha niotëintacaso marëꞌ pëꞌpëto quëparapisoꞌ, tëꞌyaitopi. 6Nancha huaꞌanënsoꞌ, pëꞌpëto quëpapiquë yaꞌcomarahuaton niꞌpirinhuëꞌ, Conasë huëꞌësárin quënamarin. Quënamarahuaton:
—¡Capayatëquë huëꞌëitëꞌ! ¡Paꞌpi huëhuëpiro nisarëhuaꞌ! Huënsëaton Yosëparin nontëquëꞌ. Tapona ina yanichaꞌësápirinpoahuëꞌ, itërin.
7Huaꞌani napotohuachina, Conasënta pipiintarin. Nancha quëpanaꞌpiroꞌsasoꞌ:
—Insosona naꞌinin quëran poꞌsarëhuaso nitotacaso marëꞌ, nicanarëhuaso pochin nicatëhua nitotahuaꞌ, niitopi. Inapohuachinara, Conasë naꞌininsoꞌ, nitotopi. 8Napoatonaꞌ:
—Shaꞌhuitocoi: ¿Maquëta tëhuëran niꞌton, poꞌsarëhuaꞌ? ¿Maquëta sacatëran? ¿Intohuaranta huëꞌsaran? ¿Ma noꞌpaquëta yaꞌhuëran? ¿Ma piyapinquënta ninan? inapita shaꞌhuitocoi nitochi, itopi.
9—Caso iprio piyapico niꞌto, Sinioro chinotërahuë. Inaso Yosë, inápaquë huaꞌanëntërin. Inari chachin isoroꞌpaꞌ, marëꞌ, inapita acorin. 10Sinioro camairincoso co natëtohuëꞌ, taꞌananpiarahuë, itërin Conasëri. Inapitariso paꞌyanatonaꞌ:
—¡Maꞌhuantacha quëmaso ninan paya! ¡Co napoitonhuëꞌ pora! itopi.
11Aquë aquëtë marë coꞌsacaitarinso nicatonaꞌ, naꞌcon naꞌcon paꞌyanpi. Napoatonaꞌ, Conasë nataantapi:
—¿Maꞌta onpotohuatëinquën marë coꞌsacaitërinso copi tapon? itopi.
12—Tëhuënchachin ca naꞌinahuëso marëꞌ poꞌsarëhuaꞌ. Napoaton tëꞌyaitoco. Naporo huarëꞌ marë sanoiarin, itërin Conasëri. 13Inaso napopirinhuëꞌ, inapitaso yonsanꞌpaꞌ yaꞌcaritacaiso marëꞌ chiníquën maitopi. Napopirinahuëꞌ, co nanitopihuëꞌ. Marë aquë aquëtë coꞌsacaitarin niꞌton, co nanitopihuëꞌ. 14Napohuachina, Sinioro nontopi huachi: “Sinioro. Quëmaso nohuantëransoráchin ninan. Iso quëmapi naꞌinin quëran poꞌsarai nipachina, ama yaꞌipicoi taquiitaꞌhuaiso nohuantëquësohuëꞌ. Yaꞌhuërëꞌ inaso co manta tëhuëpirinhuëꞌ tëꞌyaitohuatoi, chimanapon. Napohuachin, ama ina naꞌinchincoisohuëꞌ,” itopi. 15Inapoatona Conasë tëꞌyaitopi. Naporo chachin marë sanoirin. 16Ina nicatonaꞌ, Sinioro chinotopi. Yaꞌipi cancanëna quëran chinotatonaꞌ: “Maꞌsha quëma marëꞌ tëparahuatoi chinotarainquën,” itopi.
Yosëri Conasë nichaꞌërinsoꞌ
17Coꞌhuara tëꞌyaichátërasoihuëꞌ, Sinioroso aꞌnara panca sami Conasë miꞌtacaso marëꞌ camairin. Inapotohuachina, cara tahuëri tashirë chachin ina yoꞌnamënquë yaꞌhuërin.
Currently Selected:
Jonás 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
