Job 3
3
Parisitaton Copo naporinsoꞌ
1-2Canchisë tahuëri nani naꞌhuëhuachina, Coposoꞌ parisitápaton huaꞌhuatërinso tahuëri yonquirin. Ina yonquiaton ina tahuëri noꞌhuirin#3.1-2 Tahuëri noꞌhuirin: Canpo piyapinpoanta parisitohuatëhuara: “¡Maꞌmarëcha nanpito poꞌsárahuë paya!” tënëso pochin inapitanta tahuëri noꞌhuipi.. Napoaton chiníquën tapon:
3“¡Tatahuë huiꞌnarincoso tashi yonquiato,
paꞌpi co noyahuëꞌ niꞌnahuë!
¡Huaꞌhuatërahuëso tahuërinta
inapochachin niꞌnahuë!
4¡Maꞌcha naporo tahuëri
tashi nininhuëꞌ paya!
Co Yosëri nohuaninhuëꞌ naporini,
co tahuëriitonhuëꞌ.
5¡Paꞌpi tashirori imotërin naporini,
noya noya niitonhuëꞌ!
¡Maꞌcha yaráchin chitorori iꞌcopitërinhuë paya!
¡Piꞌihuë nipon chiminaton aꞌpayaninhuë paya!
6¡Maꞌcha tatahuë huiꞌnarincoso tashi
tashinantërinsoari ayatërin naporini,
noya noya niitonhuëꞌ! tënahuë.
Inaporin naporini,
¡co huachi nani piꞌiquë ina tahuëri pichiꞌitonahuëꞌ!
¡Co huachi nani yoquiquë tëranta yonquiꞌitonahuëꞌ!
7¡Maꞌcha naporo tashi mamahuë
co huaꞌhuanincohuëꞌ paya!
Inaporin naporini, co insonta noya cancanchitonhuëꞌ.
8Panca yaꞌhuan marëquë yaꞌhuërin.
Inasoꞌ, Nipiatan itopi.
Pënotonoꞌsari pënoitohuachinara,
ina anocantopi, topi.
¡Maꞌcha inapitari, naporo tashi pënopihuëꞌ paya!
Inapotopi naporini,
co mamahuë huaꞌhuaintoncohuëꞌ.
9¡Maꞌcha naporo tahuëririnquëntaꞌ,
huënio tayora co yaꞌnorinhuëꞌ paya!
¡Tahuëricasonta ninapirinahuëꞌ
co tahuëririnhuë naporini, noyataꞌitonhuëꞌ!
¡Tahuërinta huënihuaninsoꞌ,
co quënanpihuëꞌ naporini,
noya noya niitonhuëꞌ!
10Co inapoatonhuëꞌ, naporo tashi
huaꞌhuataꞌhuaso quëtërinco niꞌton,
paꞌpi co noyahuëꞌ niꞌnahuë.
¡Yaꞌcopirinco naporini,
co poꞌpin nosorochitohuëꞌ!
11¡Yoꞌnanquë chachin
chiminahuë naporini, noya niitonhuëꞌ!
¡Mamahuë huaisonco chachin chiminahuë naporini,
noya noya niitohuëꞌ!
12Mamahuë huairahuatonco
tonainquë acorinco.
Inapotatonco ashoꞌshorinco.
¡Co inapotërincohuëꞌ naporini, noya noya niitohuëꞌ!
13Naporoꞌ chiminahuë naporini,
yashi yashin huëꞌëpiso pochin
sano cancantato chinotaꞌitohuëꞌ.
14-15Iráca copirnoroꞌsaꞌ,
catahuarinsopita huaꞌanoꞌsaꞌ,
inapitasoꞌ, nipaꞌpitacaiso marëꞌ panca noꞌpapiroꞌsa nipi.
Huaꞌanoꞌsa nipisopitanta notohuaroꞌ
oro, prata, inapita
huaꞌanëntopiso pëiroꞌsaquë yontonpi.
Inapitanta nani chiminpi niꞌton,
inapitarëꞌco cantaꞌ, chinotaꞌitohuëꞌ.
16Anaꞌhuayaroꞌsasoꞌ, paꞌpitopi.
Chimipiaꞌhua huaꞌhuatopisontaꞌ, inapotopi.
Canta inapotërinaco naporini,
noya noya cancanchitohuëꞌ.
17Apiroꞌsasoꞌ, piyapiꞌsa yaaparisitopi.
Napoaponaraihuëꞌ chiminpachinara,
copi topi huachi.
Parisitápatona amipisopitantaꞌ,
chiminpachina chinotopi huachi.
18Quiraquë mapisopitantaꞌ,
sacato huaꞌanoꞌsari naꞌcon aparisitopi.
Napoápirinahuë chiminpachinara,
inahuanta copi topi huachi.
19Chimipiroꞌsa yaꞌhuëpiquësoꞌ, maꞌhuanoꞌsa
saꞌahuaroꞌsarëꞌ, napopináchin yaꞌhuërapi.
Aꞌnaquën huaꞌanëhuanpirinahuëntaꞌ,
inaquësoꞌ, co huachi huaꞌanëhuanpihuëꞌ.
20Yosë nohuanton piyapi huaꞌhuatërin.
¡Napoaponahuëꞌ, parisitacaiso marëꞌ
huaꞌhuatopiso yonquiato,
co noyahuëꞌ cancantërahuëꞌ!
Parisitapisopitasoꞌ chiminchinapi naporini,
noya noya niitonahuëꞌ.
21Aꞌnaquën parisitatonaꞌ, yachiminpi huachi.
Oro yonirëso pochin chimirin nohuantopi.
¡Napopirinahuë nanpirápiso marëntaꞌ,
co noyahuëꞌ cancantërahuëꞌ!
22Napoin quëran chiminpachinara, paꞌpitopi.
Naporo huarëꞌ capa cancantopi huachi.
23Piyapinpoa Yosë
nohuanton yaꞌhuëpirëhuahuëꞌ,
maꞌsona onpocasoꞌ co anitotërinpoahuëꞌ.
Oncorapirëso pochin acorinpoaꞌ.
Co onpo taꞌananpichináchinhuëꞌ, ninëhuaꞌ.
24Co napion natanato tarëtárahuë
co capahuaso tëranta yonquirahuëꞌ.
Naꞌnërápato co yamoro manincohuëꞌ.
25Yaꞌipi tëꞌhuatërahuësopita,
huëꞌhuëtërahuësopita,
inapita cantiirinco taꞌa.
26‘Piꞌpian tëranta chinochi,’ topirahuë,
co manta sano cancantërahuëꞌ.
¿Onpoatosoꞌ topinan parisitámarahuë?”
tënahuë yonquiato.
Currently Selected:
Job 3: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
