Job 2
2
Aquë aquëtë maꞌsha onporinsoꞌ
1Naquëranchin Yosësoꞌ, anquëninënpita ayontoantarin. Satanasënta inapitarë paantarin. 2Naporoꞌ Siniorori itaantapon:
—¿Intohuaranta huëantaran? itërin.
—Itohua itohua pasoroꞌpaquë paꞌsárahuë, itërin Satanasëri.
3—¿Piyapinëhuë Copo itopisoꞌ niꞌnan huachi? Co insonta pasoroꞌpaquë ina pochin yaꞌhuërinhuëꞌ. Inasoꞌ, noꞌtëquën natëtonco noyasáchin ninin. Napoaton co maꞌmarë tëranta pënënacaso yaꞌhuërinhuëꞌ. Naporahuaton co inso tëranta maꞌsha onpotërinhuëꞌ. Quëma napotëranco niꞌton, yaꞌipi maꞌshanënpita topinan quëran ayatërahuë. Inapotopirahuëꞌ, inaso co piꞌpisha tëranta nisha cancantërinhuëꞌ, itërin.
4Siniorori napotopirinhuëꞌ, inariso itaantapon:
—Maꞌshanënpita ayatopiranhuëꞌ, inaora chachinso co maꞌsha onpotëranhuë niꞌton, ina pochin cancantarin. 5Inta inaora chachin maꞌsha onpotëriquëꞌ. Inapotohuatansoꞌ, tëhuënchachin noꞌhuitënquën aꞌpoarinquën, itërin. 6Naporoꞌ Siniorori itapon:
—Inta nipachin. Maꞌsha onpotëriquëꞌ. Napoaponahuëꞌ, ama tëpaquësohuëꞌ, itaantarin.
7Napotohuachina, inaso Sinioro yaꞌhuërin quëran pipiantarahuaton Copo yaꞌhuërinquë paantarin.
Ina nohuanton Coposoꞌ, paꞌpi chiníquën caniori manin. Yaꞌipi nonënquë taꞌtasáchin niꞌton, yonito yonito toconin. 8Napohuachina, amoro ahuiquitopiquë paꞌsahuaton huariano aipi huënsëconin. Inaquë socatë masahuaton niitërárin. 9Naporoꞌ saꞌini itapon:
—Noyasáchin nicaponahuëꞌ poꞌsáran niꞌquëhuarëꞌ, Yosë noꞌhuirahuaton aꞌpoquëꞌ. Inaporahuaton, chiminchanquë huachi, itërin.
10—¡Coꞌchi quëmasoꞌ noꞌtëquën yonquiranhuë paya! Noya nininsopita Yosë quëtohuachinpoaꞌ, maꞌparëhuaꞌ. Co noyahuëꞌ nininsopitaso quëtohuachinpoaꞌ: ¿Co maꞌpacaso yaꞌhuërinhuëꞌ ti? ¡Inanta mini maꞌpacaso yaꞌhuërin! itërin. Inapoaton Coposoꞌ, parisitaponahuëꞌ ahuantërin. Co piꞌpian tëranta Yosë noꞌhuiton, oshahuaninhuëꞌ.
Copo amiconënpitari huëcapairinsoꞌ
11Coposoꞌ, cara amiconënpita yaꞌhuëtërin. Aꞌnasoꞌ, Irihuasë itopi. Inasoꞌ, Timan parti yaꞌhuërin. Aꞌnantaꞌ, Piritato itopi. Inantaꞌ, Soa parti yaꞌhuërin. Aꞌnantaꞌ, Sohuaro itopi. Inasoꞌ, Naamato parti yaꞌhuërin. Copo parisitërinsoꞌ inapitanta natantatonaꞌ, achinicancanacaiso marëꞌ paapacaiso yonquipi. Huëcatona niquënanpachinara, napopináchin Copo yaꞌhuërinquë canquipi. 12Aquëranchin notërahuatona niꞌpirinahuëꞌ, inaso nishinahuën yaꞌnorin niꞌton, co nohuitopihuëꞌ. Noya nohuitahuatonaꞌ, chiníquën naꞌnëtopi. Co napion ancantatonaꞌ, aꞌmopiso oshapi. Naporahuatona amocan inápaquë taꞌsapi. Inaquë chachin nisëꞌmomotopi. Napopi. 13Naporahuatonaꞌ, Coporë chachin noꞌpaquë huënsëpi. Canchisë tahuëri tashirë chachin co manta taponaraihuëꞌ napopi. Chiníquën parisitërinsoꞌ nicatonaꞌ, co manta itopihuëꞌ.
Currently Selected:
Job 2: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
