Job 1
1
Onpopinsona Copo yaꞌhuërinsoꞌ
1Oso parti itopiquë aꞌnara quëmapi yaꞌhuërin, Copo itopisoꞌ. Inasoꞌ noyasáchin nicaton, co manta tëhuërinhuëꞌ. Yosë noꞌtëquën natëton, co manta piyapiꞌsa maꞌsha onpotërinhuëꞌ. 2-3Shonca huiꞌninpita yaꞌhuëtërin. Canchisë quëmapi, cara sanapi. Notohuaroꞌ pëꞌtahuatërin: Canchisë huaranca ohuicaroꞌsaꞌ, cara huaranca camiyoroꞌsaꞌ, aꞌnatërápo pasa moraroꞌsaꞌ, inapita pëꞌtahuarin. Noꞌpaꞌ ohuërërinsopitanta toronënpitarë chachin aꞌnatërápo pasa yaꞌhuëtërin. Naporahuaton piyapinënpitantaꞌ, huaꞌhuayátërahuë camairin. Napoaton aꞌnapita piꞌi pipirinso parti yaꞌhuëroꞌsa quëran, maꞌhuan maꞌhuan inasoꞌ.
4Huiꞌninpitaso noya ninicatonaꞌ, coshatacaiso marëꞌ yánipërapi. Noya noya cosharo acohuachinara, napopi. Aꞌnaya aꞌnaya pëinënaquë coshatopi. Aꞌnaꞌton përatërin. Ina quëran aꞌna yaꞌhuërëꞌ, përataantarin. Inapopi. Nani napopiquë oshinapitantaꞌ, përapi. 5Nipërapiso tahuëriꞌsa naꞌhuëhuachina, Coposo tashíramiachin huënsëintarin. Yaꞌipi huiꞌninpita amatahuaton aꞌnaya aꞌnaya marëꞌ maꞌsharoꞌsa tëparin. Inapotahuaton oshanëna marëꞌ yaꞌipi ahuiquitërin: “Tapona huiꞌnahuëpitasoꞌ, cancanëna quëran Yosë noꞌhuitonaꞌ, pinoápirinahuëꞌ,” taꞌton naporin. Nani nichicoshatopiquë naporin.
Copo nani maꞌsha onporinsopita
6Aꞌna tahuëri Yosësoꞌ, anquëninënpita ayontonin. Inapitarë chachin shaꞌhuirapirinpoasoꞌ anquëni#1.6 Shaꞌhuirapirinpoasoꞌ anquëni: Iprio nananquësoꞌ, Satanasë itopi. itopisontaꞌ, paꞌnin. 7Ina nicaton Siniorori itapon:
—¿Intohuaranta huëꞌnan? itërin.
—Itohua itohua pasoroꞌpaquë paꞌsárahuë, itërin Satanasëri.
8—¿Piyapinëhuë Copo itopiso niꞌchinan to? Co insonta paso roꞌpaquë ina pochin yaꞌhuërinhuëꞌ. Inaso noꞌtëquën natëtonco, noyasáchin ninin. Napoaton co maꞌmarë tërantaꞌ, pënënacaso yaꞌhuërinhuëꞌ. Naporahuaton co inso tërantaꞌ, maꞌsha onpotërinhuëꞌ, itaantarin Yosëri.
9-10—Co topinan natërinquënhuëꞌ. Nani maꞌsha nipachina quëmari catahuaran. Inapotëran niꞌton, notohuaroꞌ pëꞌtahua yaꞌhuëtërin. Inapoaton maꞌhuanin. Saꞌin, huiꞌninpita, maꞌshanënpita, inapitanta quëmari noya aꞌpairan niꞌton, natërinquën. 11Napoaponahuëꞌ, inta yaꞌipi yaꞌhuëtërinso osërëtëriquëꞌ. Inapotohuatan, aꞌninquëchin noꞌhuiarinquën, itaantarin Satanasëri.
12Naporoꞌ Siniorori itapon:
—Inta nipachin. Nani maꞌsha yaꞌhuëtërinsoꞌ, maꞌsha onpotëriquëꞌ. Inaora chachinso napoaponahuëꞌ, ama manta maꞌsha onpotëquësohuëꞌ, itërin.
Napotohuachina, inaso Sinioro yaꞌhuërin quëran pipirin.
13Aꞌna tahuëri Copo huiꞌninpitasoꞌ, naquëranchin coshatacaiso marëꞌ nipëraantapi. Napoatonaꞌ, paninantërinso pëinënquë noya coshatapi. 14-15Napoasoiꞌ, Copotaquë aꞌnara piyapinën taꞌarëꞌnachin canquirin. Canquirahuaton itapon:
—¡Tororoꞌsaquë noꞌpaꞌ ohuërëasocoi, moraroꞌsasoꞌ, ina pirayan coshatapi! Aꞌnanaya sapioroꞌsa canquirahuatonaꞌ, yaꞌipi pëꞌtahua aꞌpairoꞌsaꞌ, sacatoroꞌsaꞌ, inapita tiquiipi. Inapotahuatonaꞌ, pëꞌtahuanënpita quiquitërinën. ¡Casáchin chaꞌërahuato shaꞌhuitaꞌhuanquënso marëꞌ, taꞌaintarahuë! itiirin.
16Inari shaꞌhuitasoꞌ, aꞌna yaꞌhuërëꞌ piyapinën taꞌainantararin. Canquirahuaton itapon:
—¡Oꞌcori pochin inápa quëran pën anotiimarin! Inapoaton yaꞌipi ohuicanënpita tiquitërinquën. Aꞌpainaꞌpiroꞌsantaꞌ, tiquirin. ¡Casáchin chaꞌërahuato shaꞌhuitaꞌhuanquënso marëꞌ, taꞌaintarahuë! itiintarin.
17Inarinta shaꞌhuitaso chachin, aꞌna yaꞌhuërëꞌ piyapinën taꞌainantararin. Inarinta canquirahuaton itapon:
—¡Camiyoroꞌsa aꞌpairápiraihuëꞌ, cara huënton cartioroꞌsa huëꞌsahuatonaꞌ, ahuëirinacoi! Tiquirahuatonacoi, camiyoroꞌsa quiquitërinën. ¡Casáchin chaꞌërahuato shaꞌhuitaꞌhuanquënso marëꞌ, taꞌaintarahuë! itiintarin.
18-19Inarinta shaꞌhuitaso chachin, aꞌna yaꞌhuërëꞌ piyapinën taꞌainantararin. Canquirahuaton itapon:
—¡Yaꞌipi huiꞌnanpita paninantëranso pëinënquë coshatapirinahuëꞌ, aꞌnanaya panca ihuan huëꞌnin! Inotëro parti quëran huëꞌsahuaton, pëi tëꞌyatërin. Napotohuachina yaꞌipi huiꞌnanpita tiquitërinquën. ¡Caso chaꞌërahuato shaꞌhuitaꞌhuanquënso marëꞌ, taꞌaintarahuë! itiintarin.
20Naporo Coposoꞌ, co napion cancantahuaton huanirin. Aꞌmorinso osharahuaton, noyá niyaꞌirin#1.20 Niyaꞌirin: Ina parti yaꞌhuëpisopitasoꞌ, paꞌpi sëtohuachinara napopi.. Inaporahuaton, Yosë chinotacaso marëꞌ, isonin. Isonin quëran noꞌpaquë huarëꞌ monshomarahuaton:
21—Ipora huaꞌhuatapo, co manta yaꞌhuëtërincohuëꞌ. Chiminpatontaꞌ, co manta quëpapohuëꞌ. Sinioro nohuanton maꞌsha yaꞌhuëtopirincohuëꞌ, ina nohuanton capa niantarin. ¡Ma noyacha Sinioroso paya! tënin. 22Inapoaton Coposoꞌ, nani maꞌsha onpoaponahuëꞌ, co Yosë noꞌhuiton oshahuaninhuëꞌ.
Currently Selected:
Job 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
