Popular Bible Verses from Job 2

Share

Naporoꞌ saꞌini itapon: —Noyasáchin nicaponahuëꞌ poꞌsáran niꞌquëhuarëꞌ, Yosë noꞌhuirahuaton aꞌpoquëꞌ. Inaporahuaton, chiminchanquë huachi, itërin. —¡Coꞌchi quëmasoꞌ noꞌtëquën yonquiranhuë paya! Noya nininsopita Yosë quëtohuachinpoaꞌ, maꞌparëhuaꞌ. Co noyahuëꞌ nininsopitaso quëtohuachinpoaꞌ: ¿Co maꞌpacaso yaꞌhuërinhuëꞌ ti? ¡Inanta mini maꞌpacaso yaꞌhuërin! itërin. Inapoaton Coposoꞌ, parisitaponahuëꞌ ahuantërin. Co piꞌpian tëranta Yosë noꞌhuiton, oshahuaninhuëꞌ.

—¿Piyapinëhuë Copo itopisoꞌ niꞌnan huachi? Co insonta pasoroꞌpaquë ina pochin yaꞌhuërinhuëꞌ. Inasoꞌ, noꞌtëquën natëtonco noyasáchin ninin. Napoaton co maꞌmarë tëranta pënënacaso yaꞌhuërinhuëꞌ. Naporahuaton co inso tëranta maꞌsha onpotërinhuëꞌ. Quëma napotëranco niꞌton, yaꞌipi maꞌshanënpita topinan quëran ayatërahuë. Inapotopirahuëꞌ, inaso co piꞌpisha tëranta nisha cancantërinhuëꞌ, itërin.

Naporoꞌ Siniorori itapon: —Inta nipachin. Maꞌsha onpotëriquëꞌ. Napoaponahuëꞌ, ama tëpaquësohuëꞌ, itaantarin.

Coposoꞌ, cara amiconënpita yaꞌhuëtërin. Aꞌnasoꞌ, Irihuasë itopi. Inasoꞌ, Timan parti yaꞌhuërin. Aꞌnantaꞌ, Piritato itopi. Inantaꞌ, Soa parti yaꞌhuërin. Aꞌnantaꞌ, Sohuaro itopi. Inasoꞌ, Naamato parti yaꞌhuërin. Copo parisitërinsoꞌ inapitanta natantatonaꞌ, achinicancanacaiso marëꞌ paapacaiso yonquipi. Huëcatona niquënanpachinara, napopináchin Copo yaꞌhuërinquë canquipi. Aquëranchin notërahuatona niꞌpirinahuëꞌ, inaso nishinahuën yaꞌnorin niꞌton, co nohuitopihuëꞌ. Noya nohuitahuatonaꞌ, chiníquën naꞌnëtopi. Co napion ancantatonaꞌ, aꞌmopiso oshapi. Naporahuatona amocan inápaquë taꞌsapi. Inaquë chachin nisëꞌmomotopi. Napopi. Naporahuatonaꞌ, Coporë chachin noꞌpaquë huënsëpi. Canchisë tahuëri tashirë chachin co manta taponaraihuëꞌ napopi. Chiníquën parisitërinsoꞌ nicatonaꞌ, co manta itopihuëꞌ.