Job 19
19
Piritato aꞌpaniton Copo noninsoꞌ
(Copo tonihuachina, naquëranchin Irihuasëri nontaantarin. Ina quëran Copori aꞌpaniantarin. Tonitaantahuachina, naquëranchin Piritatori Copo nontaantarin.)
1Ina quëran Copori aꞌpaniton itapon:
2“¡Tananpitatomaco copi toco huachi!
Nontohuatamacora, cosoraꞌhuaquë
papitërëso pochin nitëramaco.
3Nani naꞌaro noꞌhuiramaco.
Inapoatomaꞌ, aparisitaramaco niꞌton, tapanco huachi.
4Tëhuërahuë nicaiꞌpontaꞌ,
co canpita naꞌinchitënquëmahuëꞌ.
Ca naꞌintarincosoꞌ.
5Parisitërahuësoꞌ nicatomaco
pënënamaco:
‘Quiyasoꞌ Copo quëran
noya noya ninai,’ tënamaꞌ.
6Tëhuënchachin mini Yosë
poꞌtatonco atapaninco.
Maꞌsha pëcotanquë
manëso pochin nitatonco anaꞌintërinco.
7Natanco: ‘Tëpaarinaco mini,’
taꞌto yaitosárahuë.
Napopirahuëꞌ, co insonta aꞌpanirincohuëꞌ.
Noya coisë noꞌtëquën shaꞌhuirinso pochin
canta nichinaco topirahuë.
Co insonta inapotërincohuëꞌ.
8Parisitërahuësoꞌ taꞌananpitë pochin yanitopirahuëꞌ.
Ira paꞌcopitatë pochin Yosë nitërinco.
Co onpo taꞌachináchinhuëꞌ ninahuë.
Iranëhuë, tashiri noyá iꞌcopitërinso pochin acotërinco.
9Yaꞌipi maꞌshanëhuë matërinco.
Piyapiꞌsa noya niꞌpirinacohuëꞌ,
ina nohuanton maꞌsha onporahuë niꞌton,
co huachi tëꞌhuatërinacohuëꞌ.
10Naꞌpi pëi ohuatërëso pochin nitërinco.
Nara itëquën quëran huarëꞌ,
ocoihuachinara co huachi paporinhuëꞌ.
Inapochachin cantaꞌ, co huachi
noya yaꞌhuëcaꞌhuaso ninarahuëꞌ.
11Panpëtë iꞌchinpitërëso pochin
noꞌhuitonco inimicotërinco.
12Yaꞌipi sontaronënpita aꞌpaimaton,
inapita quëran aparisitatë pochin nitërinco.
Tancapitahuatonaco ahuëinacoso marëꞌ
noyá niacopiso pochin nitërinaco.
13Quëmopinëhuëpita, amiconëhuëpita,
inapitanta Yosë poꞌtërinco niꞌton,
taꞌananpirinaco.
Nisha pochin nitatonaco napotërinaco.
14Quëmopinëhuëpita, amiconëhuëpita,
inapitanta aꞌporinaco.
15Yániꞌninacosopitantaꞌ, naniantërinaco.
Piyapinëhuëpita sanapiꞌsa
nipisopitantaꞌ, nishapotërinaco.
Camaihuatora, co huachi natërinacohuëꞌ.
16Piyapinëhuë camaihuatora,
co manta natërincohuëꞌ.
Nontápirahuë tëranta co natërincohuëꞌ.
17Saꞌahuë tëranta yaꞌcarihuatora,
noꞌhuiconinco.
Ina mamaquëranchin ninaisopitanta
amirotërinaco.
18Huaꞌhuaroꞌsa quëran huarëꞌ
tëhuaconinaco.
Huënsërahuë quëran huanihuatora,
noꞌhuirinaco.
19Noyá payarinacosopita, nosororahuësopita,
inapita quëran huarëꞌ imicotërinaco.
20Nansëyaráchin nicato
nani yacanaraꞌpiarinco natanahuë.
Inapoato parisi quëran nanpiárahuë.
21Canpitaso amiconëhuëpitanquëmaꞌ niꞌtomaꞌ,
nosoroco topirahuë.
Ahuëatë niquitërëso pochin Yosë nitatonco,
paꞌpi aparisitërinco niꞌton, naporahuë.
22Yosë aparisitarincosoꞌ, naniꞌin.
¡Ama canpi canpitanta aparisitocosohuëꞌ!
Tananpitoco huachi.
¡Nani naꞌaro quëtëtë pochin nitëramaco! 23-29(-)
Currently Selected:
Job 19: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
