Job 31
31
Amiconënpita nontaton Copori tonitërinsoꞌ
(Cara amiconënpitari chachin cara cararo Copo nontopi. Nani nontopiquë inarinta aꞌpaniraꞌpiarin.) Toninamën aꞌpanitaton tapon:
1‘Yoscoarëꞌ co nanoꞌsa tëranta
noyacaꞌhuaso yaꞌhuërinhuëꞌ,’ taꞌto
Yosë shaꞌhuitërahuë.
2Napopirahuë tërantaꞌ, sanapiꞌsa noyarahuë naporini,
Yosë yaꞌipi nanitaparinsoꞌ inápa quëran anaꞌinchitoncohuëꞌ.
3¡Co noyahuëꞌ nicatona oshahuanpisopita,
Yosëri co noyahuëꞌ niꞌnin!
4¡Yosëso yaꞌipi naporahuësoꞌ niꞌsárinco!
¡Iratato onpo achisona paꞌnahuësontaꞌ, nitotërin!
5-6Co noyahuëꞌ yonquiato maꞌsona nipatosoꞌ,
Yosë noya coisë pochin niꞌton, noꞌtëquën shaꞌhuiin.
Insosona yanonpintohuatosoꞌ,
pëꞌtënanquë pëꞌtënëso pochin
nitatonco tantiainco.
Inapotohuachinco,
co manta onporahuësohuëꞌ nitotarin.
7Noyasáchin ninahuë quëran
pëshonahuë, maꞌsharáchin yonquirahuë,
ihuatërahuë, inaporahuë nipachinsoꞌ,
8Yosë chachin anaꞌinchinco.
Aꞌnapitari shaꞌtërahuëso caꞌinaꞌ.
Shaꞌtërahuësopita
itëquën quëran huarëꞌ yaꞌipi huinquichinaꞌ.
9-10Saꞌahuësoꞌ, saꞌahuë niꞌton, noyarahuë.
Soꞌyahuan noyato yamonshitohuatosoꞌ,
Yosë anaꞌinchinco.
Aꞌna quëmapiri saꞌahuënta huaꞌanënchin.
Niyacaparaisoꞌ capini saꞌin nëhuërápatosoꞌ,
nisharoꞌsari saꞌahuënta monshichinaꞌ.
11Ina pochin ninahuë nipatosoꞌ,
paꞌpi co noyahuëꞌ niitohuëꞌ.
Coisëroꞌsantaꞌ, noꞌtëquën anaꞌintiinacoso yaꞌhuëitonhuëꞌ.
12Pënsoꞌ yaꞌipi ahuiquitërin.
Soꞌyahuan monshitërahuë naporini,
ina pochin cantaꞌ,
yaꞌipi maꞌshanëhuëpita
Siniorori ataꞌhuanchitonhuëꞌ.
13-14Piyapinëhuëpita apahuantërahuëso marëꞌ
natanpachinacora,
nohuantopisoꞌ noꞌtëquën acotërahuë.
Coꞌsoꞌ inapotërahuë naporini,
Coisë pochin nicaton
Yosë yaanaꞌintohuachinco,
¡co onporonta chinichitohuëꞌ!
Naporahuëso marëꞌ natanpachincontaꞌ,
¡co onpo aꞌpanicaso nanichitohuëꞌ!
15Ina Yosëráchin nohuanton
mamanpoa huaꞌhuaninpoaꞌ.
Piyapinëhuëpitarëꞌco
napopináchin ananpirinco.
16Popriyaroꞌsa pahuantohuachinara,
catahuarahuë.
Quëyoronoꞌsanta tanarin niꞌpatora,
aꞌcarahuë.
Co tana natanacaisoꞌ nohuantërahuëꞌ.
17Saꞌahuaroꞌsanta nosoroato ichicoshatërahuë.
18Inapitasoꞌ huiꞌnahuëpita
pochin nicato napotërahuë.
Quëyoronoꞌsanta paꞌpoyaꞌhuasoꞌ,
co naniantërahuëꞌ.
19-20Aꞌnaquën aꞌmocaiso pahuantërin niꞌton,
sëhuëni canachináchin nipi.
Aꞌnaquëonta popriyatatonaꞌ, co manta
aꞌmocaiso yaꞌhuëtopihuëꞌ.
Napopisoꞌ niꞌpatora, aꞌmocaiso quëtërahuë.
Ohuicanëhuëpita anporonën quëran
huaita ocoipiquë aꞌmocaiso anitato,
aꞌmotërahuë.
Inapotërahuësopitasoꞌ:
‘Yosparinquën,’ yáitërinaco.
21Co onporo tëranta saꞌahuaroꞌsa noꞌhuito,
maꞌsha onpotaꞌhuasoꞌ shaꞌhuitërahuë.
‘Coisëroꞌsa noya nicatonaco, co anaꞌintaponacohuëꞌ,’
tëcaporahuë tëranta Yosë tëꞌhuatato co inapotërahuëꞌ.
22Inapita naporahuësoꞌ, co noꞌtëquën nipachinsohuëꞌ,
tanpaquëhuëpita yaꞌquiꞌin.
Shorancanëhuëpitahuë nipon, noshitëchin.
23‘Co noyahuëꞌ nipato,
Yosë chini chiníquën nanantaton nanitërin anaꞌintiincosoꞌ.
Inapotohuachinco co ahuantarahuëꞌ,’
taꞌto, noyasáchin ninahuë.
24‘Oro, coriqui, inapita yaꞌhuëtërinco niꞌton,
noya yaꞌhuëápo,’ co tënahuëꞌ.
25Aꞌnaquën notohuaroꞌ maꞌsha
yaꞌhuëtohuachinara, noya cancantopi.
Caso co onporo tëranta ina pochin yonquirahuëꞌ.
Naꞌcon coriqui canapirahuë tërantaꞌ, co naporahuëꞌ.
26Piꞌi noyápiachin aꞌpinin niꞌnahuë.
Yoquinta paꞌyápiro yaꞌnorin.
27Napopirinahuëꞌ,
co poꞌoana quëran tëranta
inapita mosharahuë.
Co imirahuë tëranta apinoto
inapita mosharahuë.
28Inapoato co noyahuëꞌ ninahuë naporini,
noꞌtëquën anaꞌintiincoso yaꞌhuëitonhuëꞌ.
Yosëíchin inápaquë yaꞌhuëpirinhuëꞌ,
‘naꞌa yosëroꞌsa yaꞌhuërin,’
tënëso pochin niitohuëꞌ.
29Inimiconëhuëpita maꞌsha onpohuachinara,
co onporo tëranta noya cancantërahuëꞌ.
Aꞌnapitarihuë nipon maꞌsha onpotohuachinara,
sëtëyarahuë.
30Co onporo tëranta inapita
co noyahuëꞌ yonquirapito noꞌhuirahuëꞌ:
‘Maꞌcha chiminaton copi tochaninhuëꞌ paya,’
co tënahuëꞌ.
31Piyapinëhuëpita nonpachinara, napopi:
‘Copo pëinënquë huëꞌëpatopisopitasoꞌ,
naní quëran noya coshatopi,’ topi.
32Nisharoꞌsantaꞌ,
pëinëhuëquë huëꞌëcaiso marëꞌ përarahuë.
Co cachiquë huëꞌëcaiso nohuantërahuëꞌ.
33Aꞌnaquënsoꞌ, tëhuëaponaraihuëꞌ:
‘Co tëhuëraihuëꞌ,’ toconpi.
Caso nipirinhuëꞌ, tëhuërahuësopita co poꞌorahuëꞌ.
Co onporonta poꞌoana quëran co noyahuëꞌ ninahuëꞌ.
34Aꞌnaquënsoꞌ, piyapiꞌsari noya niꞌcaiso marëꞌ
co noyahuëꞌ nipirinahuëꞌ, co manta itopihuëꞌ.
Caso nipirinhuëꞌ, co naporahuëꞌ.
Quëmopinëhuëpita tëranta co noyahuëꞌ nipachinara,
noꞌtëquën pënënahuë.
35-36¡Maꞌcha naporahuësoꞌ
insha tëranta natërincohuë paya!
Naporahuësopitasoꞌ,
nani ninshitato huirmarahuëso pochin acorahuë.
Napopirahuëꞌ, co natëramacohuëꞌ.
Co natëpiramacohuëꞌ, Yosëso yaꞌipi nanitaparin.
Ina tëhuënchinsoꞌ yaꞌipi nanpirahuësoꞌ nitotaton,
noꞌtëquën shaꞌhuiarin tënahuë.
Canpitasoꞌ: ‘Co noyahuëꞌ ninan,’ itëramaco.
Naporamaso nani ninshitatomaꞌ,
coisëquë aꞌnoramaso pochin nipiramahuëꞌ,
co manta tapanaꞌhuaso yaꞌhuërinhuëꞌ.
Ninshitëramaso
noya nicato yancorëso pochin nitarahuë.
Caso noꞌtëquën nonato napoarahuë.
Canpitaso nipirinhuëꞌ, tëhuë tantiatomaco
naporama niꞌton, napoarahuë.
37Yaꞌipi naporahuësopita, Yosë shaꞌhuitarahuë.
Huaꞌan co tëhuëatonhuëꞌ,
co manta Yosë poꞌotërinhuëꞌ.
Ina pochin cantaꞌ, Yosë yaꞌcariapo.
38Noꞌpanëhuënta
noꞌtëquën achinotërahuë niꞌton,
co naꞌnëton, shaꞌhuirapiatë pochin nitiincoso yaꞌhuërinhuëꞌ.
39-40Napoaporahuëꞌ, iminënaquë shaꞌtopisopita nitërinsoꞌ ihuahuato,
Yosë nohuanton noꞌpanëhuëquë trico yaꞌhuërënamën,
nahuanoꞌsaráchin papoin.
Imin camayoroꞌsanta topinan quëran asacatohuato,
Sipata yaꞌhuërënamëntaꞌ, pacatorora papoꞌin,” tënin Copo.
Inapochin Copo, amiconënpita aꞌpanirinsoꞌ, tiquirin.
Currently Selected:
Job 31: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
