Jueces 2
2
Sinioro anquëninën Poquimo itopiquë yaꞌnorinsoꞌ
1-2Sinioro anquëninënso Quiricaro quëran pipirahuaton, Poquimo itopiquë pantarin. Inaquë cancontarahuaton, israiroꞌsa itapon: “Carinquëma Iquipito noꞌpaꞌ quëran ocoiranquëmaꞌ. Ocoirahuatënquëmaꞌ, iso noꞌpaquë quënanquëmaꞌ. Iso noꞌpasoꞌ, shimashonëmapita nani shaꞌhuitërahuë quëtaꞌhuanquëmaso marëꞌ: ‘Caso Yosëco niꞌto, iso noꞌpaꞌ shiparimapita quëtarahuë,’ itërahuë. Ina quëran canpitanta shaꞌhuitëranquëmaꞌ: ‘Canpitaroꞌco anoyatërahuësoꞌ co onporonta nishataponhuëꞌ. Canpitanta napoaponahuëꞌ, ama Canaanquë yaꞌhuëpisopitarëꞌquëmaꞌ, anoyatocosohuëꞌ. Mamanshi moshacaiso marëꞌ artaroroꞌsa nipisoꞌ ataꞌhuantocoꞌ,’ itëranquëmaꞌ. Napotopiranquëmahuëꞌ, canpitaso co natëramacohuëꞌ. Co natëtatomahuëꞌ paꞌpi noꞌhuípiro ninamaꞌ. 3Napoaton iporasoꞌ shaꞌhuitaranquëmaꞌ: Nisha nisha piyapiroꞌsa iporahuanta yaꞌhuëapisoꞌ, co huachi aquëtë aꞌpaarahuëꞌ. Inahuaꞌ, mamanshinënaꞌ, inapita anishacancantarinënquëmaꞌ,” itërin. 4Sinioro anquëninëni napotërinsoꞌ natanahuatonaꞌ, yaꞌipi israiroꞌsaso naꞌnëmiatopi. 5Napoaton ina roꞌtësoꞌ aninihuanpi: “Poquimo,” itopi. Naporahuatonaꞌ, inaquë chachin maꞌsha tëparahuatona Sinioro chinotopi. 6-10(-)
Israiroꞌsa Yosë aꞌpopisoꞌ
11Israiroꞌsasoꞌ, Yosë aꞌpoatona paꞌpi co noyahuëꞌ niantapi. Siniorori chachin niꞌsápirinhuëꞌ, mamanshi Paaro itopisoꞌ moshacaiso caniaritopi. 12Sinioro chachin nipirinhuëꞌ, aꞌpopi. Shimashonënpitasoꞌ: “Inaíchin Yosësoꞌ,” taꞌtona imapirinahuëꞌ, inahuaso aꞌpopi. Inari nosoroaton Iquipito quëran ocoipirinhuëꞌ, naniantopi. Ina aꞌporahuatonaꞌ, yaꞌhuëhuanoꞌsa mamanshi moshapisopita moshapatopi. Inapohuachinara Yosëri noꞌhuípiro niꞌnin. 13Inapoatona israiroꞌsasoꞌ, Sinioro aꞌpopi. Mamanshi Paaro itopisoꞌ moshacaiso marëꞌ aꞌpopi. Asotariti mamanshi paya, itopisonta moshapi.
14Napoaton Siniorori israiroꞌsa noꞌhuirin. Noꞌhuiton ihuatëroꞌsa aꞌpatërin maꞌshanëna matacaiso marëꞌ. Naporahuaton yaꞌyoranpisopita inimicoroꞌsari huëcapaipi. Huëcapairahuatona ahuëpachinara, canaipi. Co nanitopihuëꞌ, chinitatona minsëcaisoꞌ. 15Nani ahuëtai marëꞌ paꞌpiquë, Siniorori inimiconëna catahuarin niꞌton, israiroꞌsa canaraꞌpiapi. Inari shaꞌhuitërinso chachin nitopi.
Siniorori maꞌsha onpotaton israiroꞌsa chiníquën aparisitërin. 16Aparisitaponahuëꞌ, ina nohuanton chachin huaꞌanoꞌsa huanipi. Israiroꞌsa catahuacaiso marëꞌ huanipi. Inimicoroꞌsari maꞌshanëna nanquitahuachinara, inapita huaꞌanoꞌsari israiroꞌsa nichaꞌërin. 17Inapotopirinahuëꞌ, israiroꞌsaso co inapita natëantapihuëꞌ. Sinioroíchin chinotacaiso marëꞌ, inapitariso pënënpirinahuëꞌ, israiroꞌsaso co inasáchin cancantopihuëꞌ. Nisha nisha mamanshiroꞌsa moshapi. Shimashonënapitasoꞌ, Sinioro camaitërinsopita natëpi. Inapitaso nipirinhuëꞌ, co inapita pochin nipihuëꞌ.
18Inimiconënpitari aparisitahuachinara, israiroꞌsa tarëtatona naꞌnërápi. Naporoꞌ Siniorori nosororin. Ina nohuanton inapita catahuacaso marëꞌ huaꞌan huanirin. Ina nanpisoꞌ Siniorori catahuarin niꞌton, inimiconënpita quëran israiroꞌsa nichaꞌërin. 19Napoaponahuëꞌ, ina huaꞌan chiminpachina, naquëranchin Sinioro aꞌpoantapi. Ina aꞌporahuatonaꞌ, mamanshiroꞌsa moshaantapi. Shimashonëna quëran aquë aquëtë co noyahuëꞌ nicoantapi. Inapoatonaꞌ, co natantonoꞌsahuë pochin cancantopi.
20Napopiso marëꞌ Siniorori israiroꞌsa noꞌhuiton tapon: “Isopitasoꞌ, shimashonënapitarëꞌco anoyatërahuësoꞌ tapipi. Naporahuaton co yanatërinacohuëꞌ. 21Cosoi nanpisoꞌ, nisha nisha piyapiroꞌsa Canaan parti yaꞌhuëpi. Yaꞌhuëpirinahuëꞌ, co yaꞌipi inari ocoirinhuëꞌ. Israiroꞌsa co natërinacohuëꞌ niꞌton, co huachi inapita piyapiroꞌsa ocoyapohuëꞌ,” tënin. 22Inapotaton Siniorosoꞌ, israiroꞌsa yonquipiso yanitotërin: “¿Shimashonëna pochin taꞌma isopitanta natëtonaco imaponaco to?” taꞌton napotërin. 23Napoaton inapita nisha nisha piyapiroꞌsa co Siniorori yaꞌipi ocoirinhuëꞌ. Inapitasoꞌ co Cosoiri minsëcasoꞌ nohuantërinhuëꞌ niꞌton, inaquëranchin quëparitopi.
Currently Selected:
Jueces 2: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
