Josué 24
24
Cosoi yachiminaton israiroꞌsa nontërinsoꞌ
1-2Siquimo ninanoquë Cosoi yaꞌipi Israiro huëntonoꞌsa ayontonin. Ansianoroꞌsaꞌ, huaꞌanoꞌsaꞌ, coisëroꞌsaꞌ, sontaro huaꞌanoꞌsaꞌ, inapita ayontonin. Sinioro chinotacaso marëꞌ nëꞌmëtë pëi ótënpisoꞌ notënanquë ayontonaton itapon:
—Sinioro israiroꞌsanpoa chinotërëhuaso naporin: “Iráca shimashonëma Tari itopisoꞌ Iopiratisiiꞌ yonsanquë yaꞌhuërin. Huiꞌninpitasoꞌ: Apraan, Nacoro, inapita. Inaquë yaꞌhuëapona pochin inapitasoꞌ, nisha nisha mamanshiroꞌsa moshapi. 3Apraansoꞌ, ina quëran ocoirahuë. Ocoirahuato, yaꞌipi iso noꞌpaꞌ paꞌtacaso camairahuë niꞌton, yaꞌipi paꞌtërin. Ina quëran ca nohuanton chachin shinpita naꞌamiatërin. Ca nohuanton huiꞌnahuanpachina Isaco itërin. Inaꞌton canpita shimashonëma ninin. 4Isaconta ca nohuanton cato huiꞌnahuanin. Cacopo, Isao, inapita. Isaosoꞌ, Sëir motopiroꞌsa parti noꞌpaꞌ quëtërahuë. Cacoposo napoaponahuëꞌ, huiꞌninpitarë chachin Iquipitoquë paꞌmapi.
5Huaꞌqui quëran shimashonëmapita catahuarahuë. Ina quëran ocoicaꞌhuaso marëꞌ Moisësë, Aaron, inapita aꞌparahuë. Iquipitoroꞌsa chiníquën aparisitato, shimashonëmapita ocoirahuë. 6Iquipito quëran pipihuachinara, ina copirnosoꞌ, sontaronënpitarë chachin imaquirin. Quëhuaiꞌ marëquë huarëꞌ imaquirin. Quira toronaroꞌsaquë, cahuarioroꞌsaquë, inaquëpita imaquipi. 7Napotahuachinara, shimashonëmapitasoꞌ catahuaꞌhuaso marëꞌ nontërinaco. Napoaton inapita catahuaꞌhuaso marëꞌ inapita pinëna quëran, paꞌpi tashiro acorahuë. Cato huëntonoꞌsari chachin ahuancanapirin. Ca nohuanton chachin marërinta imotohuachina, iquipitoroꞌsa taquiitopi. Aꞌnaquëma iquipitoroꞌsa napotërahuësoꞌ niꞌnamaꞌ.
Ina piquëran canpitasoꞌ, huaꞌqui inotëro parti yaꞌhuëramaꞌ. 8Napoyan quëran carima amororoꞌsa yaꞌhuëpiquë quënanquëmaꞌ. Cortaniiꞌ aquëtëran yaꞌhuëpisopitaꞌton chinitërinënquëmaꞌ. Chinitopirinënquëmahuëꞌ, carima catahuaranquëma niꞌton, inapita minsëramaꞌ. Inapotahuatomaꞌ, ina parti noꞌpaꞌ yaꞌhuërinsoꞌ huaꞌanëntëramaꞌ. 9Sipor huiꞌnin Paraco itopisonta piyapinënpitarë chachin chinitërinënquëmaꞌ. Canainënquëmaso marëꞌ, inaso Pioro huiꞌnin Paramo itopiso amatërin: ‘Huëcaton, ama huachi noya yaꞌhuëcaiso marëhuëꞌ shaꞌhuitiiquëꞌ,’ itacaso marëꞌ amatërin. 10Inaso nipirinhuëꞌ, co caso nohuantërahuëꞌ inapotinëmasoꞌ. Co inapotatënquëmarahuëꞌ ca nohuanto noya yaꞌhuëcamaso marëꞌ shaꞌhuitërinquëmaꞌ. Inapotatënquëma nichaꞌëranquëmaꞌ. 11Ina quëran canpitasoꞌ, Cortaniiꞌ pëntontëramaꞌ. Pëntontatoma Quirico ninanoquë canconamaꞌ. Ina ninanoquësoꞌ, nisha nisha piyapiꞌsa yaꞌhuëpi: Amororoꞌsaꞌ, huirisëroꞌsaꞌ, cananoꞌsaꞌ, itiroꞌsaꞌ, quiriquiroꞌsaꞌ, iporoꞌsaꞌ, quiposoroꞌsaꞌ, inapita yaꞌhuëpi. Inapitaso chinitopirinënquëmahuëꞌ, carima catahuaranquëma niꞌton, inapita minsëramaꞌ. 12Cato amoro copirnoroꞌsa aquëtëran yaꞌhuëpisontaꞌ, co canpitari minsëramahuëꞌ. Co sahuëninëmaquë minsëramahuëꞌ. Co pëꞌchinanëmaquë minsëramahuëꞌ. Cari paꞌpi aꞌpayanahuë niꞌton, taꞌananpirinquëmaꞌ. Coꞌhuara canchátërasënquëmahuëꞌ, taꞌananpirinquëmaꞌ. 13Ipora canpitaso co sacaiyátërahuëꞌ, ninanoroꞌsaquë yaꞌhuëramaꞌ. Aꞌnapita sacai ocoirinquë yaꞌhuëramaꞌ. Opa, asitona, inapitanta co canpitari shaꞌpiramahuëꞌ, nitërinsoꞌ caꞌnamaꞌ. Yaꞌipi iso noꞌpaꞌ, maꞌsha yaꞌhuërinsopitarë chachin carima quëtëranquëmaꞌ,” tënin, itërin.
Napotahuaton, taantarin:
14—Yaꞌipi ina shaꞌhuitëranquëmasoꞌ yonquiatomaꞌ, Sinioro tëꞌhuatocoꞌ. Tëꞌhuatatoma noꞌtëquënáchin natëcoꞌ. Iráca shimashonëmapita Iopiratisiiꞌ yonsanquë yaꞌhuëaponaꞌ, nisha nisha mamanshi moshapi. Iquipitoquënta inapopi. Inapita aꞌporahuatoma Sinioroíchin chinotocoꞌ. 15Napoaponahuëꞌ, co Sinioroíchin yachinotohuatamahuëꞌ, ipora tahuëri huayonco insosona yachinotëramasoꞌ: ¿Shimashonëmapita Iopiratisiiꞌ yonsanquë yaꞌhuëaponaꞌ, nisha nisha mamanshi moshapiso nica? ¿Amororoꞌsa mamanshinëna moshapisoꞌ nica? Caso nipirinhuëꞌ, quëmopinëhuëpitarëꞌco chachin Sinioro chinotarai, itërin.
16Napotohuachina israiroꞌsari itaponaꞌ:
—¡Co nohuantëraihuëꞌ nisha nisha mamanshi moshacaꞌhuaisoꞌ! Sinioro catahuaincoi ama ina pochin nicacaꞌhuaiso marëhuëꞌ. 17Quiyasoꞌ, iquipitoroꞌsa chiníquën asacatatonacoi aparisitápirinacoihuëꞌ, ina quëran ocoirincoi. Shimashonëhuëipitanta ocoirin. Aꞌnaquëncoisoꞌ, niꞌtonëhuëiquë chachin paꞌpi huëhuëpiro nininsopita naꞌaro ninin. Huëcasocointaꞌ, nisha nisha piyapi nipisopita yaꞌhuëpiquë naꞌhuëtiirai. Tahuëri tashirë chachin aꞌpairincoi. 18Huëꞌnaitaquëchin nisha nisha piyapiroꞌsa yaꞌhuëpirinahuëꞌ, inari chachin inapita aꞌparin. Amororoꞌsaꞌton isëquë yaꞌhuëpirinahuëꞌ, aꞌparin. Napoaton quiyanta Sinioroíchin chinotarai. Inaíchin Yosënëhuëi niꞌton, chinotarai, itopi.
19Napopirinahuëꞌ, Cosoiriso itapon:
—Yosëso noyasáchin ninin. Naporahuaton, aꞌpitatënquëmaꞌ, co nisha nisha chinotamaso quëtërinquëmahuëꞌ. Co natantochináchinhuëꞌ cancantatoma oshahuanápatamaꞌ, co ahuantarinquëmahuëꞌ. 20Ina aꞌporahuatoma nisha nisha mamanshiroꞌsa moshahuatamaꞌ, Sinioronta iꞌhuërëtarinquëmaꞌ. Naꞌcon catahuapirinquëmahuëꞌ, chiníquën anaꞌintarinquëmaꞌ, itërin. 21Napotohuachina, israiroꞌsaso taantapi:
—Co inapoaraihuëꞌ. Sinioroíchin quiyasoꞌ chinotarai, itopi. 22Naporoꞌ Cosoi taantarin:
—Sinioroíchin chinotarai tënamasoꞌ, canpitaora chachin shaꞌhuiramaꞌ, itërin.
—Quiyaora chachin mini shaꞌhuirai, topi yaꞌipiya quëran. 23—Yaꞌipi mamanshi mosharamasopita nipachin aꞌpocoꞌ. Inapita aꞌporahuatomaꞌ, yaꞌipi cancanëma quëran Sinioroíchin tahuërëtocoꞌ. Inasáchin israiroꞌsanpoasoꞌ chinotërëhuaꞌ, itërin Cosoiri.
24—Sinioroso Yosënënpoa niꞌton, inasáchin chinotarai. Naporahuaton ina camaitërinsoráchin nisarai, topi yaꞌipi israiroꞌsaꞌ.
25-26Naporo tahuëri chachin Cosoisoꞌ, iráca Yosërëꞌ anoyatopisoꞌ, israiroꞌsa shaꞌhuitaantarin. Siquimo ninanoquë naporin. Sinai motopiquë shaꞌhuitaton, pënëntërinsoꞌ, camaitërinsoꞌ, inapita shaꞌhuitërin. Ina quëran yaꞌipi inapita Yosë pënëntërinsoꞌ quiricaquë ninshitopisonta shaꞌhuitërin. Nani yaꞌipi inapita shaꞌhuitohuachina, insina narasoquë panca naꞌpi acocaiso camaitërin. Camaitohuachina, Yosë chinotacaso marëꞌ nëꞌmëtë pëi ótënpiso pirayan acopi. 27Ina quëran yaꞌipi israiroꞌsa shaꞌhuitërin:
—Niꞌcoꞌ. Iso naꞌpi masho aꞌna tahuëri ayonquiarinpoaꞌ. Sinioro ipora tahuëri shaꞌhuitërinpoaso natanatëhua aꞌpanirëhuasoꞌ, ayonquiarinpoaꞌ. “Yoscoarëꞌ inasáchin chinotarai,” tënamasontaꞌ ayonquiarinquëmaꞌ. Iso naꞌpi niꞌpatamaꞌ ina yonquicoꞌ, itërin. 28Ina piquëran Cosoisoꞌ yaꞌipi israiroꞌsaꞌ, yaꞌhuëpiquë yaꞌhuëpiquë aꞌpaantarin.
Cosoi chimininsoꞌ
29Co huaꞌquiya quëranhuëꞌ Cosoisoꞌ chiminin. Pasa shonca piꞌipitapasoꞌ chiminin. Inasoꞌ, Yosë piyapinën ninin. Shaꞌhuitëranquëmaso chachin Non huiꞌnin. 30Nani chiminpachina, noꞌpanënquë paꞌpitopi. Noꞌpanënsoꞌ, Tinato-sëra ninanoquë yaꞌhuërin. Inaso ninanoꞌ, Iprain huënton israiroꞌsa noꞌpaꞌ mapiquë yaꞌhuërin. Caasi motopi itopi quëran, pëtëtë parti quëparitërin. 31Israiroꞌsasoꞌ, Cosoi chiminaquë huarëꞌ Sinioroíchin chinotopi. Ansianoroꞌsa Siniorori catahuarinso niꞌpisopita chiminai huarëꞌ, inaíchin chinotopi.
Cosi nansëquën paꞌpitopisoꞌ
32Cosi nansëquën Iquipito quëran quëpisontaꞌ, Siquimo ninanoquë paꞌpitopi. Ina noꞌpasoꞌ, Cacopori iráca Siquimo paꞌpin Amoro itopisoꞌ huiꞌninpita paꞌantërin. Pasa coriqui marëꞌ paꞌantërin. Ina noꞌpasoꞌ Cosi shinpitanquën quëparitërin.
Iriasaro chimininsoꞌ
33Ina piquëran Aaron huiꞌnin Iriasarontaꞌ, chiminin. Chiminpachina, quëmopinënpitari huiꞌnin Huinisë itopisoꞌ noꞌpanënquë paꞌpitopi. Inaquë aꞌnara motopiaꞌhuayaquë paꞌpitopi. Inasoꞌ noꞌpaꞌ Iprain huënton israiroꞌsa noꞌpaꞌ mapiquë yaꞌhuërin. Inaquë Cosoiri noꞌpaꞌ quëtërin niꞌton, inaquë paꞌpitopi.
Currently Selected:
Josué 24: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
