Éxodo 5

Huaraon nontapona paꞌpisoꞌ

1Ina quëran Moisësëso Aaronë chachin, Iquipito copirno nontapona paꞌpi. Quënanconahuatona itaponaꞌ:

—Israiroꞌsacoi Sinioro chinotëraisoꞌ, nanan aꞌpatatënquën naporin: “Israiroꞌsasoꞌ, piyapinëhuëpita. Aꞌpaquë inotëro parti paꞌinaꞌ, inaquë chinotatonaco capa cancanchinaꞌ,” tënin, itopi.

2Napotopirinahuëꞌ:

—¿Ma Siniorocha inaso nicaya? ¿Ina canta natëi topiramahuë ti? ¡Co caso canpita Sinioro chinotëramaso nohuitërahuëꞌ! ¡Naporahuaton co onporonta aꞌpaꞌhuanquëmaso yaꞌhuërinhuëꞌ! itërin copirnori.

3—Ina mini Yosë chinotëraisoꞌ. Catahuaincoiso marëꞌ nani oꞌmarin. Inotëro parti pacaꞌhuaiso yaꞌhuërin cara tahuëri iratëraiꞌpaꞌ. Inaquë maꞌsha tëparahuatoi, ina chinotarai. Coꞌsoꞌ inapohuatoihuëꞌ, canio quëranhuë nipon, quira quëranhuë nipon taquihuatoi, itaantapi.

4-5Napotaantapirinahuëꞌ:

—Iporasoꞌ notohuaroꞌ israiroꞌsa noꞌpanëhuëquë yaꞌhuëpi. ¡Co canpitari sacatopisoꞌ, acopitamaso yaꞌhuërinhuëꞌ! itaantarin copirnori.

6-7Napotahuaton, naporo tahuëri chachin Iquipito sacato huaꞌanoꞌsaꞌ, Israiro sacato huaꞌanoꞌsaꞌ, inapita amatërin. Huëꞌpachinara camairin: “Ama huachi israiroꞌsa shinpitë quëtocosohuëꞌ. Inahuara chachin paatona mainaꞌ. 8-9Napoaponahuëꞌ, onposona natricho nisapisoꞌ, nápo chachin acocaiso yaꞌhuërin. Israiroꞌsaso chirotëroꞌsa niꞌton, Moisësë, Aaron, inapita quëran: ‘Yosë chinotapoi inotëro parti paꞌi,’ taꞌcaiso nanan aꞌpatërinaco. Napoaton canpitari chini chiníquën asacatocoꞌ. Ama nonpintopisoꞌ natëcaiso marëhuëꞌ, inapotocoꞌ,” itërin.

10-11Napotohuachina Iquipito sacato huaꞌanoꞌsaꞌ, Israiro sacato huaꞌanoꞌsa inapitari israiroꞌsa itaponaꞌ: “Iquipito copirno naporin: ‘Ama huachi shinpitë quëtocosohuëꞌ, inahuara chachin mainaꞌ. Napoaponahuëꞌ, onposona natricho nisapisoꞌ, nápo chachin acocaiso yaꞌhuërin,’ tënin,” itopi.

Israiro sacato huaꞌanoꞌsa copirno nontapona paꞌpisoꞌ

12Napoaton israiroꞌsasoꞌ, shinpitë iꞌhua yaquipiso nicosotopi. Ina nicosotacaiso marëꞌ yaꞌipi Iquipito roꞌtë paꞌtopi. Ina huachi, shinpitë yaꞌhuërënamën chipirorëꞌ toꞌcapi. 13Iquipito sacato huaꞌanoꞌsari, itaponaꞌ: “¡Manocoꞌ! Iꞌhua shinpitë quëtáponëma natricho acoramaso nápo chachin, iporanta acoamaso yaꞌhuërin,” itopi.

14Israiroꞌsaso nipirinhuëꞌ, co nanitopihuë nanicaisoꞌ. Napoaton Iquipito sacato huaꞌanoꞌsari, Israiro sacato huaꞌanoꞌsa ahuëpi: “Nani cato tahuëri nisarin co natricho naniramasohuëꞌ,” itopi.

15Napotohuachinara, Israiro sacato huaꞌanoꞌsaso copirno nontapona paꞌpi: “Piyapinënpitacoi nipiraihuëꞌ ¿Onpoatonta ina pochin aparisitaramacoi? 16Piyapinënpita, natricho nicaꞌhuaiso camairinacoi. Napoaponahuëꞌ, co huachi shinpitë quëtërinacoihuëꞌ. Napoaton co naniraiso marëhuëꞌ, ahuërinacoi. Inahua tëhuëpi niꞌton, co naniraiquëyahuëꞌ ahuërinacoi,” itopi.

17Copirnoriso nipirinhuëꞌ, itapon:

—¡Canpitaso chirotënquëmaꞌ! Napoaton nohuantërama paatoma Yosënëma chinotamasoꞌ. Co yasacatatomarahuë naporama tënahuë. 18Napoaton paantatoma sacatantacoꞌ. Iporasoꞌ co huachi shinpitë quëtarinënquëmahuëꞌ. Napoaponahuëꞌ, iꞌhua shinpitë quëtáponëma natricho acoramaso nápo chachin, iporanta acoamaso yaꞌhuërin, itërin.

19Israiro sacato huaꞌanoꞌsaso ina natanahuatonaꞌ, co napion cancantopi. 20Nani copirno nontahuatonaꞌ, Moisësë, Aaron inapita aipiran ninatasoi quënanpi. 21Inaquë quënanatonaꞌ:

—Canpitaso copirno nontatomaꞌ, panca tëhuëramaꞌ. Ipora inasoꞌ, catahuarinsopitarë chachin naꞌcon naꞌcon noꞌhuirinacoi. Naporama aꞌpiquë tëpaponacoi aꞌna nimara. Ina marëꞌ canpitanta Yosë anaꞌinchinquëmaꞌ, itopi.

Moisësë Yosë nontërinsoꞌ

22Napotohuachinara, Moisësë Yosë nontërin:

—Sinioro. ¿Onpoatonta piyapinënpita naꞌcon naꞌcon aparisitaran? Co ipora piyapinënpita naꞌcon naꞌcon aparisitacaso marëꞌ aꞌparancohuëꞌ. 23Isëquë canquirahuato, nanan quëtërancoso copirno shaꞌhuitërahuë. Ina natanaponahuëꞌ, aquë aquëtë chachin piyapinënpita aparisitarin. Quëmarinta ina nicaponahuëꞌ, co yanichaꞌëranhuëꞌ, itërin.

Currently Selected:

Éxodo 5: cbt

Highlight

Copy

Compare