Éxodo 34

Nasha quëran ninshitaantarinsoꞌ

1Siniorori, Moisësë itaantapon:

—Cato naꞌpitëaꞌhuaroꞌsa iꞌhua paꞌpaaransopita pochachin tapaquëꞌ. Inaquë iꞌhua ninshitërahuëso pochachin ninshitaantarahuë. 2Nani tapahuatan, iso Sinai motopiquë chachin, tashiraya tashíramiachin huënantaquëꞌ. Huiꞌnimotënquë carinquën ninaranquën. 3Napoaponahuëꞌ, quëmaoraíchin huëntaquëꞌ. Naporahuaton ama insonta isëquë huëntainsohuëꞌ. Ohuacaroꞌsaꞌ, ohuicaroꞌsaꞌ, co inapita tëranta coshatai marëꞌ huëntacaiso yaꞌhuërinhuëꞌ, itërin. 4Siniorori napotohuachina, Moisësëso cato naꞌpitëaꞌhua taparin. Iꞌhua paꞌpaarinsopita pochachin acorin.

Inapita masahuaton, tahuëririnquë tashíramiachin Sinai motopiꞌpaꞌ nanpëontarin. Siniorori camairinso chachin ninin. 5Nani pomosontahuachina, Sinioroso chitoroquë yaporitiimarin. Inaquë Moisësërëꞌ niquënanpi. Naporo Siniorosoꞌ, onpopinsona nininso shaꞌhuirarin. 6Moisësë naꞌhuëtapon pochin chiníquën nonsarin:

—¡Caso Sinioroco! ¡Caso Sinioroco! Caso Yosëco noyápiachin cancantërahuë. Aꞌnaroáchin yanosorotërahuë. Co aꞌnaroáchin noꞌhuitërahuëꞌ. Piyapinëhuëpita nosoromiatërahuë. Noꞌtëquënáchin nonahuë. 7Piyapinëhuëpita nosoroato, huaranca shinpita huënton yaꞌhuëaquë huarëntaꞌ, co nisha cancantarahuëꞌ. Co noyahuëꞌ nipirinahuëꞌ, oshanën inquitato nanan anoyatërahuë. Co natëtochináchinhuëꞌ cancantatona oshahuanpachinarantaꞌ, inapotërahuë. Napoaponahuëꞌ, insosona tëhuëhuachin, onpopionta anaꞌintarahuë. Huiꞌninpita, shinpita, inapitanta anaꞌintarahuë. Shinpita huiꞌninaquë huarënta anaꞌintarahuë, tënin. 8-9Ina natanaton, Moisësëso isonin quëran noꞌpaquë huarëꞌ monshorin. Monshorahuaton, Sinioro chinotërin. Napotahuaton itapon:

—¡Ai Sinioro! Tëhuënchachin nosorohuatancosoꞌ, caꞌtancoi. Tëhuënchachin piyapinënpita co natantochináchinhuëꞌ cancantopi. Napoaponahuëꞌ, yaꞌipi co noyahuëꞌ nicatoi oshahuanaisoꞌ, inquitatoncoi nanan anoyatocoi. Nanan anoyatatoncoi piyapinënpita pochin niꞌcoi huachi, itërin.

Naquëranchin anoyatopisoꞌ

(Deuteronomio 7.1-5)

10Ina quëran Siniorori napotaantarin:

“Noya natanquë shaꞌhuichinquën. Yaꞌipi israiroꞌsanta noya natainaꞌ: Naquëranchin canpitarëꞌco anoyatarahuë. Catahuatënquëmaꞌ, maꞌsha paꞌpi huëhuëpiro nininsopita aꞌnoarahuë. Co inso nacionquë tërantaꞌ, isoroꞌpaquë ina pochin niꞌchinpihuëꞌ. Yaꞌipi piyapiꞌsa insëquësona paꞌnamaquë, ca Sinioroco nanitaparahuësoꞌ niꞌsapi. Canpita catahuatënquëmaꞌ, paꞌpi huëhuëpiro nininsopita aꞌnoarahuësoꞌ, niꞌsaramaꞌ.

11Yaꞌipi ipora camairanquëmasopita natëcoꞌ. Inapohuatamaꞌ, amororoꞌsaꞌ, cananoꞌsaꞌ, itiroꞌsaꞌ, huirisëroꞌsaꞌ, iporoꞌsaꞌ, quiposoroꞌsaꞌ, inapita tëꞌyatarahuë. Noꞌpanëna matamaso marëꞌ inapitaso napotarahuë.

12Ama inapitarëꞌquëma anoyatocosohuëꞌ. Inapitarëꞌquëma nipayahuatamasoꞌ, anishacancantarinënquëmaꞌ. 13Artaroroꞌsa mamanshi chinotacaiso marëꞌ nipisoꞌ, ohuatocoꞌ. Naꞌpirosantaꞌ, nararoꞌsanta chinotopisopita, paꞌquiraꞌpiacoꞌ.

14Ama mamanshi chinotocosohuëꞌ. Caso Sinioroco paꞌpi aꞌpitëranquëmaꞌ.

15Inatohua yaꞌhuëpisopitarëꞌquëmaꞌ, ama maꞌsha marëꞌ tëranta anoyatocosohuëꞌ. Mamanshinëna moshacaiso marëꞌ maꞌsha tëpapisoꞌ caꞌpatotamaꞌ. 16Niꞌcona huiꞌnina canpita huiꞌnama acoantohuachinaꞌ. Inapohuachinsoꞌ, inahuaso mamanshinëna moshasoiꞌ, huiꞌnamanta moshapataponaꞌ.

17Ama onporo tëranta huaꞌna asoquirahuatomaꞌ, mamanshi nicosohuëꞌ.

Nani piꞌiquë pitaroꞌsa naꞌhuëcaiso yaꞌhuërinsoꞌ

18Pan co ahuëpocatopinanhuëꞌ capacaiso pita, naꞌhuëcoꞌ. Ina tahuëriꞌsa canquihuachina, shaꞌhuitëranquëmaso chachin nicoꞌ. Canchisë tahuëri pan co ahuëpocatopinanhuë caꞌsaramaꞌ. Ina pitasoꞌ, apipo#34.18 Apipo yoqui canpoa marësoꞌ: Pascoa yoqui tënëhuaꞌ. yoquiquë naꞌhuëaramaꞌ. Naporo yoqui Iquipito quëran pipirama niꞌton, naporo naꞌhuëcoꞌ.

19Huiꞌnama quëmapiaꞌhuaya paninantëramasoꞌ, caquën nisarin. Inapochachin ohuacanëmantaꞌ, ohuicanëmantaꞌ, chiponëmantaꞌ, yaꞌnan huaꞌhuatopisoꞌ, caquën nisarin. Quëmapi nipachin, caquën nisarin. 20Mora yaꞌnan huaꞌhuaninsoꞌ, quëmapi nipachin, ina yaꞌhuërënamën carniroaꞌhua quëtaramaco. Chipoaꞌhuahuë nipon quëtaramaco. Co ina yaꞌhuërënamën quëtohuatamacohuëꞌ, nitohuëconotahuatomaꞌ tëpaaramaꞌ. Huiꞌnama paninantërinsoꞌ yaꞌhuërënamëntaꞌ, maꞌsha quëtamacoso yaꞌhuërin. Co insonta ina pitaquë topinamiáchin huëcacaso yaꞌhuërinhuëꞌ.

21Saota tahuëri sacataramaꞌ. Tahuëririnquëso nipirinhuëꞌ, chinotaramaꞌ. Shaꞌto tahuëri nisapirinhuëꞌ, chinotocoꞌ. Nitërinsoꞌ macamaso tahuëri nisapirinhuë tërantaꞌ, chinotacaso yaꞌhuërin.

22Simanaroꞌsa pita itopisonta naꞌhuëcoꞌ. Naporo tahuëriꞌsa yaꞌnan trico cayarinso manamasoꞌ, quëtaramaco. Naporahuaton nisha nisha nitërinsopita nanquiramasoꞌ pitantaꞌ, naꞌhuëcoꞌ.

23Yaꞌipi Israiro huënton quëmapiꞌsaꞌ, nani piꞌiquë cararo pitanëhuëpita naꞌhuëcaiso marëꞌ yaꞌnoponaꞌ. 24Cari chachin yaꞌyoraninquëmasopita nacionoꞌsa aꞌpararahuë. Napoaton pancana huaꞌanëntaramaꞌ. Ina niꞌton, nani piꞌiquë cararo chinotamacoso marëꞌ huëꞌsaramaꞌ. Huëꞌpatamaꞌ, co insonta noꞌpanëma matiimaso yonquiaponhuëꞌ. 25Chinotamacoso marëꞌ maꞌsha tëpahuatamaꞌ, ama huënainën pan ahuëpocatopinanëꞌ, aꞌnocosohuëꞌ. Naporahuaton pascoa cosharo marëꞌ maꞌsha tëparamasoꞌ, ama tahuëririnquë capacaso marëꞌ tapacosohuëꞌ.

26Aꞌna tahuëri chinotamacoso pëi yaꞌhuëapon. Naporoꞌ sharoꞌsa yaꞌnan nitërinsoꞌ noya noyatërinsopita ca marëꞌ quëpaaramaꞌ.

Chipoaꞌhuaroꞌsa ama aꞌshin shoꞌshoinënquë anpicosohuëꞌ,” itërin Siniorori.

Moisësë, Yosë pënëntërinsopita ninshitërinsoꞌ

27Ina quëran Siniorori Moisësë itaantarin: “Yaꞌipi ipora pënënanquëmasopita ninshitëquëꞌ. Canpitarëꞌco nani anoyatërahuë niꞌton, ina naꞌcon yonquiamaso yaꞌhuërin,” itërin. 28Moisësëso naquëranchin catapini shonca tahuëri tashirë chachin, Siniororëꞌ yaꞌhuërárin. Co manta caꞌninhuëꞌ, co manta oꞌorinhuëꞌ. Naporoꞌ shonca nanan Yosë pënëntërinsoꞌ ninshitërin. Naꞌpitëaꞌhuaroꞌsaquë ninshitërin.

29Ina quëran Moisësësoꞌ, Sinai motopi quëran nohuaraimarin. Cato naꞌpitëaꞌhuaroꞌsaꞌ, Yosë pënëntërinsopita ninshitërinsoꞌ quëmarin. Yosërëꞌ huaꞌqui ninontopi niꞌton, yaꞌipi yaꞌpirin huënaratërin. Napoaponahuëꞌ, co ina nitotërinhuëꞌ. 30Israiroꞌsari yaꞌpirin huënaratërinso niꞌsahuatonaꞌ, panca paꞌyanpi. Aarontaꞌ, paꞌyanin. Napoaton tëꞌhuatatonaꞌ, co yayaꞌcaripihuëꞌ. 31Moisësëso nipirinhuëꞌ, Aaron, Israiro huaꞌanoꞌsaꞌ, inapita përarin. Huënantahuachinara nontërin huachi. 32Ina quëran israiroꞌsanta yaꞌcaritohuachinara, Sinai motopiquë yaꞌipi Yosë camaitërinsopita shaꞌhuitërin. 33Nani shaꞌhuitohuachina, Moisësëso nëꞌmëtërinquë nipaꞌcopirayatërin huachi. 34Napoaponahuëꞌ, Yosë nontacaso nëꞌmëtë pëiquë yaꞌconpachina, nipaꞌcopirayatërinsoꞌ ocoirin. Topinanaya Yosë nontërin. Nani pipihuachina, maꞌsona Sinioro camaitërinsoꞌ, israiroꞌsa shaꞌhuitërin. 35Israiroꞌsari nirayahuachinara, Moisësë huënararayatërinso niꞌpi. Naporoꞌ naquëranchin nëꞌmëtërinquë nipaꞌcopirayatantarin. Ina pochin paꞌsárin. Yosë nontacaso nëꞌmëtë pëiquë yaꞌcontaquë huarëꞌ, Yosë nontacaso marëꞌ ocoiantarin.

Currently Selected:

Éxodo 34: cbt

Highlight

Copy

Compare