Éxodo 40

1-15(-)

Yosë chinotacaso marëꞌ nëꞌmëtë pëi ótënpisoꞌ

16Moisësë Yosë chinotacaso marëꞌ nëꞌmëtë pëi nipachina, Siniorori camairinso chachin yaꞌipi ninin. 17Iquipito quëran pipipisoꞌ, nani aꞌna piꞌipi nisahuaton aꞌna tahuëriraꞌ nisarin. Naporoꞌ, Yosë chinotacaso marëꞌ nëꞌmëtë pëi otënpi huachi. 18Moisësësoꞌ, catahuarinsopitarë chachin Yosë chinotacaso marëꞌ nëꞌmëtë pëi otënpi. Iso pochin otënpi: Sënchina huanitiinan nininsopita acoraꞌpiapi. Inaquë sënchinaroꞌsa ahuaniraꞌpiapi. Conëraroꞌsanta acoraꞌpiapi. Ina quëran nontëroꞌsanta achinpiraꞌpiapi. 19Ina quëran pëisoꞌ, nëꞌmëtëquëꞌton aꞌpëtopi. Ina aipi shaꞌhuëtë quëran nipiquë imotaantapi. Siniorori camairinso chachin yaꞌipi ninin.

20-21Ina quëran pënëntërinso nanan naꞌpitëaꞌhuaroꞌsaquë ninshitërinsoꞌ manin. Ina masahuaton Yosërëꞌ anoyatopiso caposonën itopiquë poꞌmorin. Ina aipi aꞌtanamën acotërin. Inapotahuaton quëpacaiso marëntaꞌ, huëratëntaëchin naranënpita patorotopi. Ina quëran nëꞌmëtë pëi acoana huancánachin aquëtë aconpi. Ina yaꞌcopitai marëꞌ tanónën nëꞌmëtëquë pëi patonpi. (Yaꞌnatiirin patoanasoꞌ, noya patoana itopi. Ina aquëtë nininsosoꞌ, noya noya patoana itopi.) Siniorori camairinso chachin yaꞌipi ninin.

22Ina quëran Moisësësoꞌ, yaꞌnatiirinso patoanaquë misanta poꞌmorin. Norti parti quëran acorin. 23Pan Yosë marëꞌ acopisontaꞌ, misa aipi noyasha apanshinin. Siniorori camairinso chachin yaꞌipi ninin.

24Misa notënanquëntaꞌ, sor parti quëran sëꞌparahuan nanparin acorin. Canchisë nanparin yaꞌhuëtërinsoꞌ. 25Inaquë acorahuaton, Yosë marëꞌ nanparinoꞌsa nininsoꞌ iꞌchinpitëraꞌpiarin. Siniorori camairinso chachin yaꞌipi ninin.

26Artaroaꞌhua oro quëran nipisonta acorin. Yaꞌnatiirinso patoana tanónën nëꞌmëtëquë patonpiso yaꞌcariꞌ, acorin. 27Nani acohuachina, ina aipi yonarin pochin pimóchin nininsoꞌ, Sinioro marëꞌ aꞌpërin. Siniorori camairinso chachin yaꞌipi ninin.

28Ina quëran, nëꞌmëtë pëi yaꞌcoananën paꞌshintacaso marëꞌ, nëꞌmëtë ótënin. 29Ina quëran artaro yaꞌhuërëꞌ acorin. Yosë chinotacaso marëꞌ nëꞌmëtë pëi ótënpiso notënanquë acorin. Inasoꞌ artaro, maꞌsha oshanëna marëꞌ tëpahuachinara, inaquë ahuiquitopisoꞌ. Nani acohuachinara, naporo chachin inaquë maꞌsharoꞌsa Yosë marëꞌ yaꞌipi ahuiquitërin. Naporahuaton arosë pochin nininsopitanta inapotërin. Siniorori camairinso chachin yaꞌipi ninin.

30Shaꞌhuitëranquëmaso chachin Yosë chinotacaso marëꞌ nëꞌmëtë pëi ótënpiso notënanquë, artaro acopi. Ina huáncana panca pantica acopi. Nani acohuachinara, inaquë iꞌsha taꞌpanpi. 31-32Inaquë iꞌsha macatonaꞌ, Moisësë, Aaron, Aaron huiꞌninpita, inapita huiꞌsëpi. Nipaꞌmorantëpi, napopi. Yosë chinotacaso marëꞌ nëꞌmëtë pëi ótënpiquë yayaꞌconpachinara, inaporahuatona yaꞌconpi. Artaroquë Sinioro marëꞌ maꞌsha aꞌpëcaiso marënta yaꞌcaritohuachinara, inapopi. Siniorori camairinso chachin yaꞌipi ninin. 33Tiquiapon pochin Moisësësoꞌ, Yosë chinotacaso marëꞌ nëꞌmëtë pëi ótënpiso iꞌiratëꞌ, artarorë chachin pancana pairapirin. Ina pairapirinso yaꞌcoanaquëntaꞌ, paꞌshintacaso marëꞌ nëꞌmëtë ótënin.

Yosë chinotacaso marëꞌ nëꞌmëtë pëi ótënpachinara, chitorori imotërinsoꞌ

34Nani yaꞌipi tënihuachinara, chitorori Yosë chinotacaso marëꞌ nëꞌmëtë pëi ótënpisoꞌ, imotërin huachi. Yosë huënaratërinsontaꞌ, ina acoana noyá aꞌpintërin. 35Inaporin niꞌton, co Moisësë nanitërinhuëꞌ inaquë yaꞌconacasoꞌ.

36Yosë chinotacaso marëꞌ nëꞌmëtë pëi ótënpiso quëran chitoro inápaquë niotëhuachina, yaꞌipi israiroꞌsanta nëꞌmëtë pëinëna soꞌnanpi. Naporahuaton pacacaiso marëꞌ tapatapi huachi. 37Co chitoro inápaquë niotëhuachinahuëꞌ, israiroꞌsanta co nëꞌmëtë pëinëna soꞌnanpihuëꞌ. Inaranchin inápaquë niotëquëcasoꞌ ninapi. 38Israiroꞌsa pipipi quëran chinopiquë canconai huarëꞌ Sinioronta inapitarëꞌ paꞌsarin. Tahuëri nipachina, Yosë chinotacaso marëꞌ nëꞌmëtë pëi ótënpiso aipi, chitoro quënanpi. Tashinta nipachina, ina chachin pën pochin huënaratërin niꞌpi.

Currently Selected:

Éxodo 40: cbt

Highlight

Copy

Compare