Amós 1
1
Onporosona Amosë pënëntërinsoꞌ
1-2Cota huënton israiroꞌsa noꞌpanënaquë aꞌnara ninano yaꞌhuërin. Inasoꞌ, Ticoa itopi. Inaquë aꞌnara quëmapi Amosë itopiso yaꞌhuërin. Inasoꞌ, notohuaroꞌ ohuicaroꞌsa pëꞌtahuarin. Naporoꞌ Cota huëntonquë, Osiasë copirno huaꞌanëntarin. Israiroꞌsantaꞌ, Quiropoamo copirnori huaꞌanëntarin. Ina Quiropoamosoꞌ, Coasë huiꞌnin. Inapita copirnoroꞌsa huaꞌanëntasoꞌ, Yosëri yonquirinso Amosë anitotërin. Israiroꞌsa maꞌsona onpotacasoꞌ yonquirinsoꞌ, anitotërin. Naporoꞌ panca ocohua pacacasoꞌ, cato piꞌipi pahuanarin.
Ina shaꞌhuicaso marëꞌ Amosë tapon:
Quirosarin quëran Sinioro nonpachina,
huira tënëntërinso pochin nisarin.
Ina nohuanton Carmiro motopi huiꞌnimotënquë
pasto yaꞌhuërinsoꞌ, ahuisarin.
Naporahuaton yaꞌipi Israiro noꞌpaquë napoarin.
Yaꞌyorantopisopita nacionoꞌsa Siniorori anaꞌintarinsoꞌ
3Naporin Sinioro: “Tamasco ninanoquë yaꞌhuëpisopitari
Carataquë yaꞌhuëpisopita paꞌpi aparisitopi.
Huaꞌnamia quëran trichoroꞌsa#1.3 Trichoroꞌsa: Maꞌsona ina tapon naporinso nitotacaso marëꞌ, Job 41.30 nota acotopiquë niꞌquëꞌ. nicatona niꞌnoratopiso pochin
tamascoroꞌsari carataroꞌsa aparisitërin.
Napoaton anaꞌintaꞌhuaso yaꞌhuërin.
4Napopiso marëꞌ Asairo copirno huaꞌanëntërinso pëiꞌ,
pënquë ahuiquitarahuë.
Pina-tato copirno noya pëinënpitantaꞌ, ina pëni chachin ahuiquitarin.
5Tamasco ninano yaꞌcoananënpitasoꞌ, oquirahuato iꞌsoatarahuë.
Picata-apinquë#1.5 Picata-apinsoꞌ: Co noyahuëꞌ nipisopita motopiana tapon naporin. huaꞌanëntërinso quëmapi ataꞌhuantarahuë.
Piti-itinquë#1.5 Piti-itinsoꞌ: Capa cancantopiso pëiꞌ, tapon naporin. huaꞌanëntërinso quëmapintaꞌ, inapotarahuë.
Inapotahuato, siriaroꞌsasoꞌ
Quiri parti inimiconënpitari quiquiaponaꞌ,” tënin.
6Ina quëran Sinioro taantarin:
“Casa ninanoquë yaꞌhuëpisopitantaꞌ, paꞌpi co noyahuëꞌ nipi.
Naꞌa ninanoroꞌsaquë yaꞌhuëpisopita minsërahuatonaꞌ,
itomoroꞌsa yaꞌhuëpiquë quëpapi.
Inaquë inapitari asacatacaiso marëꞌ paꞌanconpi.
Napoaton Casaquë yaꞌhuëpisopita anaꞌintaꞌhuaso yaꞌhuërin.
7Casa ninano pairanënpita ahuiquitarahuë.
Noya noya pëiroꞌsanënapitantaꞌ, ina pëni chachin ataꞌhuantarin.
8Asototo ninanoquë quëmapi huaꞌanëntërinsontaꞌ, ataꞌhuantarahuë.
Asocaron ninanoquënta quëmapi huaꞌanëntërinsoꞌ, inapotarahuë.
Yaꞌipi chinirahuë quëran, Icoron ninanoquë yaꞌhuëpisopita ahuëarahuë.
Co aꞌnaya tëranta huiristino quëmapi chaꞌëponhuëꞌ,” tënin.
9Ina quëran Sinioro taantarin:
“Tiro ninanoquë yaꞌhuëpisopitantaꞌ, paꞌpi co noyahuëꞌ nipi.
Inapitasoꞌ, aꞌna noꞌpaquë yaꞌhuëpisopitarëꞌ
iina pochin ninicacaiso marëꞌ nani anoyatopi.
Napoaponaraihuëꞌ inapita chachin masahuatonaꞌ,
itomoroꞌsari asacatacaiso marëꞌ paꞌanconpi.
Napoaton Tiroquë yaꞌhuëpisopita, anaꞌintaꞌhuaso yaꞌhuërin.
10Tiro ninano pairanënpita ahuiquitarahuë.
Noya noya pëiroꞌsanënapitantaꞌ, ina pëni chachin ataꞌhuantarin,” tënin.
11Ina quëran Sinioro taantarin:
“Itomoroꞌsantaꞌ, paꞌpi co noyahuëꞌ nipi.
Israiroꞌsasoꞌ, quëmopinënapita niponaraihuëꞌ, paꞌpi noꞌhuipi.
Noꞌhuitona tëpacaiso marëꞌ
sahuëni siꞌhuitahuatona ima imarantapi.
Noꞌhuiantopisoꞌ nichinapon chachin,
co amasha tëranta nosoropihuëꞌ.
Napoaton inapitantaꞌ, anaꞌintaꞌhuaso yaꞌhuërin.
12Timan, Posora, inapita ninanoroꞌsaꞌ, ahuiquitaꞌhuaso yaꞌhuërin.
Noya noya pëiroꞌsanënapitantaꞌ, yano taranaponaꞌ,” tënin.
13Ina quëran Sinioro taantarin:
“Amonoꞌsantaꞌ, paꞌpi co noyahuëꞌ nipi.
Noꞌpanëna apancanatacaiso marëꞌ ahuëtopi.
Inapoatona Carataquë cayoronoꞌsa yaꞌhuërinsoꞌ, yápoipi.
Napoaton inapitantaꞌ, anaꞌintaꞌhuaso yaꞌhuërin.
14Napa ninano pairanënpita ahuiquitarahuë.
Noya noya pëiroꞌsanënapitanta ina pëni chachin ataꞌhuantarin.
Ihuaitohuachina tënëntërinso pochin
niahuëatona noncaropiso yaꞌcanapon.
15Copirnonënantaꞌ, huaꞌanoꞌsarë chachin
aꞌna noꞌpaꞌpaꞌ inimicoroꞌsari quëpapon,” tënin.
Currently Selected:
Amós 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
