Joel 3
3
Nisha nisha nacionoꞌsa anaꞌintahuaton, israiroꞌsa noya acoantarinsoꞌ
1Ina quëran Sinioro taantarin:
“Ina tahuëri nanihuachin, Cota huëntonquë yaꞌhuëpisopita,
Quirosarin ninanoquë yaꞌhuëpisopita, inapitaso
yaꞌhuëpiquë chachin noya noya yaꞌhuëantaponaꞌ.
2Yaꞌipi nacionoꞌsa ayontonarahuë.
Ayontonahuato, Cosahuato#3.2 Cosahuatosoꞌ: Sinioro Coisë pochin nisarin, tapon naporin. motopiana itopiquë
tëhuëpiso marëꞌ noꞌtëquën shaꞌhuitarahuë.
Israiroꞌsa napotopiso marëꞌ noꞌtëquën shaꞌhuitarahuë.
Inapitasoꞌ piyapinëhuëpita nipirinahuëꞌ,
yaꞌipi isoroꞌpaquë ayanquëpi.
Noꞌpanënantaꞌ, nipatomatatona huaꞌanëntëraꞌpiapi.
3Piyapinëhuëpita, nicanapiso pochin nicatonaꞌ, nipatomatopi.
Quëmapiaꞌhuaroꞌsaꞌ, sanapiaꞌhuaroꞌsaꞌ, inapitanta paꞌanaꞌpiapi.
Ina marëꞌ coriqui mapisopitasoꞌ, huino paꞌanatona iꞌquipi.
Monshihuantë sanapiꞌsarëꞌ pocatonaꞌ, iꞌquipi,” tënin.
4Naquëranchin Sinioro taantarin:
“Tiro, Siton, Huiristia, inaquëpita yaꞌhuëramasoꞌ,
co carinquëma manta onpotëranquëmahuëꞌ.
Napoaton co piyapinëhuëpita ahuëamaso marëꞌ huëcacamaso yaꞌhuërinhuëꞌ.
Yaiꞌhuërëtatomaco napohuatamaꞌ, taꞌchatoma yaꞌhuëcoꞌ.
Nihuihuachinara yamaꞌpatopiso pochin yanitohuatamaco,
co manta quëtaranquëmahuëꞌ.
Ina pochin cancantatoma apipatamaco,
aꞌnaroáchin anaꞌintaranquëmaꞌ.
5Canpitasoꞌ, pratanëhuë, oronëhuë,
maꞌsha paꞌton yaꞌhuëtërincosopita, inapita ihuaramaco.
Inapita matatomaco, mamanshinëma
mosharamaso pëiroꞌsaquë acoramaꞌ.
6Cota huëntonquë yaꞌhuëpisopita,
Quirosarinquë yaꞌhuëpisopita, inapita masahuatomaꞌ,
áquë quëparamaꞌ.
Inaquë cricoroꞌsa paꞌantëramaꞌ.
7Inapotopiramahuëꞌ,
paꞌanatoma intohuaso aꞌparama quëran, cari ocoiantarahuë.
Canpitaso nipirinhuëꞌ, anaꞌintatënquëma piyapinëhuëpita
aparisitëramaso pochachin nitaranquëmaꞌ.
8Huiꞌnamanta quëmapiaꞌhuaroꞌsaꞌ, sanapiaꞌhuaroꞌsaꞌ,
inapita Cota huënton israiroꞌsa paꞌantatë pochin nitarahuë.
Inapotohuato, inahuarintaꞌ Sapa piyapiroꞌsa paꞌantaponaꞌ.
Inahuasoꞌ, inotëro parti yaꞌhuëpi.
Ca Sinioroco shaꞌhuitaranquëmaꞌ,” tënin.
9Naquëranchin Sinioro taantarin:
“Nisha nisha nacionquë yaꞌhuëpisopita shaꞌhuitocoꞌ.
Sontaroꞌsa huëntonëna shaꞌhuitoco noyá niacoꞌinaꞌ.
Piyapinëhuëpita ahuëcaiso marëꞌ noyá niacoꞌinaꞌ.
Chiníquën cancantopisopita përainaꞌ.
Paꞌpi ahuëton nipisopita huëꞌinaꞌ.
10Nanparoꞌsa quëran, sahuëniroꞌsa ocoiꞌinaꞌ.
Yaquitonanoꞌsantaꞌ, nansaroꞌsa ataranchinaꞌ.
Sanpatënta nipirinhuëꞌ: ‘¡Caso chiníquënco!’ chin.
11Yaꞌipi nacionoꞌsanquëma Cota huënton yaꞌyoranamasopita,
manorahuatoma ahuëtamaso marëꞌ huëcoꞌ.
Sano piyapiroꞌsa quëran huarëꞌ ahuëtonaꞌpi taraꞌin.
12Nisha nisha nacionquë yaꞌhuëramasopita
noyá niacorahuatomaꞌ, Cosahuato motopianaquë paꞌmacoꞌ.
Inaquë yaꞌipi nacionoꞌsanquëma niyontoncoꞌ.
Napohuatamaꞌ, ca Sinioroco coisë pochin nicato
maꞌsona onpotaꞌhuanquëmasoꞌ noꞌtëquën shaꞌhuitaranquëmaꞌ.
13Canpita yonquirapitënquëma napoarahuë: Isopitasoꞌ, paꞌpi co noyahuëꞌ cancantopi.
Ina marëꞌ ca Sinioroco chachin
trico noyá cayahuachina yaquirëso pochin nitarahuë.
Opanta cayahuachina,
toꞌpoirahuatona huino nipiso pochin nitarahuë.
Inapotahuato, yaꞌipi isopita ataꞌhuantarahuë, tosarahuë.
14Paꞌpi notohuaroꞌ piyapiꞌsa ina motopianaquë niyontonaponaꞌ.
Naporoꞌ ca Sinioroco maꞌsona onpotacaisoꞌ shaꞌhuipo.
Nani anaꞌintaꞌhuaso tahuëri naniriarin niꞌton, napoarahuë.
15Ina tahuëri nanihuachin, piꞌi tashiapon.
Yoqui, tayoraroꞌsa, inapitantaꞌ, co huachi aꞌpinaponahuëꞌ.
16Quirosarin quëran ca Sinioroco camaitato,
huira tënëntërinso pochin nisarahuë.
Yaꞌipi isoroꞌpaꞌ nacon nacontapon.
Piꞌiroꞌtënta nacon nacontapon.
Israiroꞌsaso nipirinhuëꞌ, piyapinëhuëpita niꞌton,
cari chachin noya paꞌpoyapo.
17Naporoꞌ canpitaso israiroꞌsanquëmaꞌ:
‘Tëhuënchachin Siniorosoꞌ, Yosënënpoaꞌ,’ tosaramaꞌ.
Quirosarinso huayonahuë niꞌton, inaquë yaꞌhuëapo huachi.
Naporoꞌ inaquësoꞌ, noyasáchin nicaponaꞌ.
Co huachi nisharoꞌsari minsëaponhuëꞌ.
18Cota huënton inimiconënpita anaꞌintërahuëso piquëran,
paꞌpi notohuaroꞌ oparoroꞌsa yaꞌhuëapon.
Napoaton huino sacóshin nicaponaꞌ.
Pastoroꞌsantaꞌ noya noyatapon niꞌton,
ohuacaroꞌsa notohuaroꞌ shoꞌshoiꞌ matapi.
Motopiroꞌsaꞌ, motopiaꞌhuaroꞌsaꞌ,
inaquëpita iꞌsharoꞌsa paꞌirin.
Ina paꞌirinso pochin huino, shoꞌshoiꞌ, inapita yaꞌhuëapon.
Iꞌsharoꞌsanta Cota huënton noꞌpanënquë yaꞌhuërinsoꞌ,
panca pancairoꞌsa nicaponaꞌ.
Chinotërinacoso pëiquë chachin, noꞌpa quëran iꞌsha pipipon.
Inasoꞌ pancaitahuaton, Sitin motopiana itopisoꞌ, paꞌtapon.
19Iquipitoroꞌsa noꞌpanënaso nipirinhuëꞌ, taꞌhuantapon.
Itomoroꞌsa noꞌpanënantaꞌ, inotëro taranapon.
Inapitasoꞌ, Cota huëntonquë yaꞌhuëpisopita ahuëpi niꞌton, napoapi.
Yaꞌhuëpiso noꞌpaquë chachin
co manta onpopirinahuëꞌ, tëpapiso marëꞌ napoapi.
20-21Inapopiso marëꞌ, cari iꞌhuërëtarahuë.
Aꞌnapita maꞌsha onpotatona naꞌinpisopitasoꞌ, co nichaꞌëpohuëꞌ.
Quirosarinquë, Cota huënton ninanoroꞌsaquë,
inaquëpitaso nipirinhuëꞌ, israiroꞌsa yaꞌhuëráponaꞌ.
Caso Sinioroco, Quirosarin ninanoquë yaꞌhuëápo,” tënin.
Currently Selected:
Joel 3: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
