Hechos 13

Pirnapi, Saono inapita aꞌchinacaso marëꞌ aꞌpapisoꞌ

1Antioquiaquë naꞌa Quisoso imapisopita yaꞌhuëpi. Naꞌa niyontonahuatonaꞌ, Yosë chinotopi. Aꞌnatërápo quëmapiꞌsaꞌ ansiano yaꞌconpi. Aꞌnaquënsoꞌ Quisoso nanamën shaꞌhuitonaꞌ, pënëntopi. Aꞌnaquëontaꞌ imapisopita aꞌchintopi noya imacaiso marëꞌ. Inapitasoꞌ: Pirnapi, Simon, Nosio, Manain, Saono, inanapo yaꞌhuëpi. Simonsoꞌ yara piyapi. Nosiosoꞌ Sirini quëran huëꞌnin. Manainsoꞌ, Cariria huaꞌan Irotisë pëinënquë soꞌsorinsoꞌ. 2Aꞌna tahuëri co coshatatonaraihuëꞌ, Sinioro chinotopi. Napohuachinara, Ispirito Santori shaꞌhuitërin: “Pirnapi, Saono inapita nohuantërahuë paatonaꞌ, piyapiꞌsaꞌ aꞌchintacaiso marëꞌ. Ina marëꞌ inapita acorahuatomaꞌ, aꞌpacoꞌ paꞌinaꞌ,” itërin.

3Napoaton co coshatatonaraihuëꞌ, inapita marëꞌ chiníquën Yosë nontopi. Nani Yosë nontohuachinara, sëꞌhuamotorahuatonaꞌ, acopi paatonaꞌ aꞌchinacaiso marëꞌ. Ina quëran aꞌpapi.

Chipri parti aꞌchinpisoꞌ

4Ispirito Santo nohuanton, Siriosiaquë paꞌpi marë paꞌtacaiso marëꞌ. Ina quëran panca nanchaquë paꞌsahuatonaꞌ, Chipri parti canconpi. Panca soꞌton inasoꞌ. Inaquë naꞌa ninanoꞌ yaꞌhuërin. 5Saraminaquë nonshirahuatonaꞌ, cotio niyontonpiso pëiquë pantarahuatonaꞌ, Yosë nanamën shaꞌhuitopi. Nisha nisha niyontonpiso pëiquë shaꞌhuitëraꞌpiapi. Coansha Marcontaꞌ paꞌnin catahuacaso marëꞌ.

6Inaquë shaꞌhuirahuatonaꞌ, yaꞌipi Chipri parti paꞌtopi. Aꞌchintëraꞌpiapi. Inapoatonaꞌ, Paposëquë huarëꞌ canconpi. Inaquë aꞌna pënoton quënanconpi. Inasoꞌ cotio quëmapi, Pariquisoso itopisoꞌ. Inasoꞌ, nonpin nanan pënëntonaꞌpi niꞌton, piyapiꞌsaꞌ nonpintarin. 7Inasoꞌ huaꞌan amiconën. Huaꞌansoꞌ Siriquio Paono itopi. Inasoꞌ noya yonquirin. “Cantaꞌ Yosë nanamën nataꞌin,” taꞌton, Pirnapi, Saono, inapita amatërin. 8Pënotonso nipirinhuëꞌ co nohuantërinhuëꞌ. Inasoꞌ Crico nananquë Irimasë itopi. “Ama natëquësohuëꞌ,” toconin. 9Saonosoꞌ Noma nananquë Paono itopi. Ispirito Santori noyá yaꞌcoancantërin niꞌton, pënoton niꞌsárin quëran itapon:

10—Quëmasoꞌ sopai pochin cancantëran. Yosësoꞌ noya noya nipirinhuëꞌ, yainimicotëran. Tëhuënchachin nonpintënquën, paꞌpi co noya quëmapinquënhuëꞌ. Sinioro noꞌtëquën shaꞌhuitopirinpoahuëꞌ, ¿onpoatontaꞌ quëmari nonpintaton, aꞌnapita anishacancantaran? 11Apiramiachin Yosë nohuanton, co mantaꞌ quënantaranhuëꞌ. Huaꞌquimiachin co piꞌi quënanaranhuëꞌ, itërin.

Napotohuachina, aꞌnaroáchin chitoro pochin niꞌtërin. Somaraya pochin nicaton, co mantaꞌ quënantërinhuëꞌ. Siꞌpinantápirinhuëꞌ, aꞌna piyapi nohuantërin matanparahuaton, quëpacaso marëꞌ. 12Huaꞌani niꞌsahuaton, “Yosëri mini napotërin,” taꞌton, natërin. Sinioro nanamën natanahuaton, paꞌyanin. “Inasoꞌ chiníquën nanan,” tënin.

Pisitia parti pënëntërinsoꞌ

13Ina quëran Paonosoꞌ, caꞌtaninsopitarë chachin aꞌna parti paꞌnin. Nanchaquë yaꞌconahuatonaꞌ, marë paꞌtantapi. Panpiria parti nonshirahuatonaꞌ, aꞌna ninano Piriqui itopiquë paꞌpi. Coansha Marcoso nipirinhuëꞌ, co huachi imátërinhuëꞌ. Quirosarinquë ayamantarin. 14Paonosoꞌ Pirnapirë chachin paantapi. Piriqui naꞌhuëtahuatonaꞌ, aquë iratopi. Paꞌsápatonaꞌ, aꞌna Antioquiaquë canconpi, Pisitia parti yaꞌhuërinsoꞌ. Chinoto tahuëri nipachina, cotio niyontonpiso pëiquë paꞌpi. Inaquë yaꞌconahuatonaꞌ, huënsëpi. 15Cotio ansianoꞌsaꞌ quirica nontapi. Moisësë iráca pënëntërinsoꞌ, pënëntonaꞌpiroꞌsaꞌ ninshitopisoꞌ, inapita nani nontohuachinara, itaponaꞌ:

—Achinicancanamacoiso marëꞌ yapënënpatamacoi iyaroꞌsaꞌ, shaꞌhuitocoi nataꞌin, itërin.

16Napotohuachina:

—Noyapaꞌ, carinquëmantaꞌ pënëinquëmaꞌ, taꞌton Paono huanirin. Huanirahuaton, imirin quëran tasatërin piyapiꞌsari taꞌtatonaꞌ natanacaiso marëꞌ.

—Natanco iyaroꞌsaꞌ. Aꞌnaquëmantaꞌ nisha piyapinquëmaꞌ nipomarahuëꞌ, Yosë chinotëramaꞌ. Canpitantaꞌ natanco. 17Iráca quëran huarëꞌ israiroꞌsanpoaꞌ Yosë chinotërëhuaꞌ. Iráca chachin shimashonënpoapita acorin piyapinënpita nicacaiso marëꞌ. Iquipitoquë yaꞌhuëaponaꞌ, Yosë nohuanton, naꞌapi. Ina quëran Yosëri chachin chiníquën nanantaton, catahuarin inatohua quëran chaꞌëcaiso marëꞌ. 18Catapini shonca piꞌipi inotëro parti paꞌpachinara, Yosëri nosoroaton, co ataꞌhuantërinhuëꞌ. Co yanatëpirinahuëꞌ, naꞌcon catahuarin. 19Ina nohuanton, Canaan parti paꞌpi. Inatohuaꞌ nisha nisha piyapiroꞌsaꞌ yaꞌhuëpi, nisha nisha nananquë nonpisopita. Canchisë huënton yaꞌhuëpirinahuëꞌ, co Yosë natëpihuëꞌ niꞌton, ina nohuanton minsëpi. Inaquë chachin shimashonënpoapita yaꞌhuëpi. Yosëri catahuarin niꞌton, ina noꞌpaꞌ huaꞌanëntopi. 20Yaꞌipi quëran catapini pasa aꞌnatërápo shonca piꞌipi ninin.

Ina piquëran Yosë nohuanton, huaꞌanoꞌsaꞌ yaꞌconaꞌpiapi catahuacaiso marëꞌ. Samoiro yaꞌconaquë huarëꞌ inapopi. 21Inasoꞌ noya pënëntopirinhuëꞌ: “Copirno nohuantërai huachi,” topachinara, Yosëri Saono acorin. Inasoꞌ Mincamin huënton quëmapi, Quisi huiꞌnin. Catapini shonca piꞌipi Saono huaꞌanëntopirinhuëꞌ, 22Yosëri ocoirahuaton, Tapi acorin. Quisi huiꞌnin inasoꞌ. Nóya quëmapi niꞌton, Yosëri noya niꞌnin. “Tapisoꞌ ca pochin cancantërin. Noya niꞌnahuë. Noꞌtëquën natëarinco,” tënin Yosë. 23Iráca chachin Yosëri shaꞌhuitërin: “Aꞌna tahuëri Tapi shiin nichaꞌësarinquëmaꞌ,” itërin shimashonëmapita. Iporasoꞌ iyaroꞌsaꞌ, nani Quisoso aꞌpaimarin nichaꞌëinpoaso marëꞌ. Shaꞌhuitërinso chachin aꞌpaimarin. 24Coꞌhuara Quisoso huëꞌshatërasohuëꞌ, Coansha pënëntarin. Naꞌa israiroꞌsaꞌ pënënarin. “Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. Ina quëran iꞌquë aporintaranquëmaꞌ,” itërin. 25Coansha pënëntërinsoꞌ yatiquihuachina, noꞌtëquën shaꞌhuirin. “ ‘Quëmasoꞌ Cristonquën,’ itopiramacohuëꞌ, co casoꞌ inacohuëꞌ. Nipirinhuëꞌ, ca piquëran huëꞌsarin. Inasoꞌ noya noya. Co casoꞌ maquëyancohuëꞌ niꞌto, co sapatën iꞌquiritaꞌhuaso tërantaꞌ nanitarahuëꞌ,” itërin.

26“Canpoasoꞌ iyaroꞌsaꞌ, Apraan shinpitanpoaꞌ niꞌtëhuaꞌ, Yosë nanan aꞌpatirinpoaꞌ nichaꞌëinpoaso marëꞌ. Nisha piyapinquëmantaꞌ Yosë chinotohuatamaꞌ, nichaꞌësarinquëmaꞌ canpitantaꞌ. Napoaton yaꞌipinquëmaꞌ shaꞌhuitaranquëmaꞌ. 27Quirosarinquë yaꞌhuëpisopitasoꞌ, co Quisoso nohuitopihuëꞌ: ‘Yosëri aꞌpaimarin,’ co topihuëꞌ. Co huaꞌanoꞌsa tërantaꞌ napopihuëꞌ. Pënëntonaꞌpiroꞌsaꞌ ninshitopisoꞌ nani chinoto tahuëri natanpirinahuëꞌ, co yonquipihuëꞌ. ‘Quisoso tëpaquëꞌ,’ itopi. Iráca ninorinso chachin yatëpapi. 28Co maꞌmarë tërantaꞌ tëpacasohuëꞌ nipirinhuëꞌ, Pirato shaꞌhuitopi: ‘Tëpaquëꞌ,’ itopi. 29Ina quëran yaꞌipi Yosë quiricanënquë ninorinsoꞌ nanihuachina, corosë quëran anohuararahuatonaꞌ, naꞌpi naninquë poꞌmopi. 30Inaquë poꞌmopirinahuëꞌ, Yosëri ananpitaantarin. 31Nanpiantarahuaton, aꞌna yoqui miria pochin yaꞌhuantarahuaton, caꞌtanoꞌsanënpita yaꞌnotëraꞌpiarin. Coꞌhuara chimiyantërasohuëꞌ, naꞌa Caririaquë yaꞌhuëpisopitari caꞌtanpi. Quirosarinquë huarëꞌ imapi. Quisoso nanpiantahuachina, inapitarintaꞌ quënanpi. Quënanahuatonaꞌ, yaꞌipi piyapi shaꞌhuitapi: ‘Nanpiantarin mini. Quiyari niꞌnai,’ tosapi.

32Quiyantaꞌ, iyaroꞌsaꞌ, noya nanan shaꞌhuitarainquëmaꞌ. Iráca Yosëri shimashonënpoapita nontaton, shaꞌhuitërin. 33Iporasoꞌ nani Quisoso aꞌpatimarinpoaꞌ. Shinpitanpoaꞌ niꞌtëhuaꞌ, yonquirinpoaꞌ. Quisoso ananpitaantarahuaton, catahuarinpoaꞌ canpoantaꞌ. Yosë quiricanënquë iráca ninshitërin. ‘Quëmasoꞌ huiꞌnahuënquën. Ipora chachin acoaranquën huaꞌanëntamaso marëꞌ,’ tënin Tapi. Sarmo catoquë naporin. 34Yosëri ananpitaantacasoꞌ ninorin. Co nonën chanatarinhuëꞌ. Iráca quiricanën quëran itërin: ‘Tapi noꞌtëquën nontërahuë. Nosoroato, naꞌcon catahuarahuë. Canpitantaꞌ inapochachin catahuaranquëmaꞌ,’ tënin Yosë. 35Napoaton Tapiri ninshitantarin. ‘Quëmasáchin natëranquën niꞌton, co nohuantaranhuëꞌ nonëhuë chanatacasoꞌ,’ itërin, Yosë nontaton. Sarmo quiricaquë chachin naporin. 36Napoaponahuëꞌ, Tapisoꞌ Yosë natëton, piyapiꞌsaꞌ catahuarin. Ina quëran chiminin. Shimashonënpita pirayan paꞌpitopi. Nonën chanatërin. 37Quisososo nipirinhuëꞌ Yosëri ananpitaantarin. Co nonën chanatërinhuëꞌ. Quisoso nonën chachin ninoton, Tapi iráca ninshitërin. 38-39Napoaton iyaroꞌsaꞌ shaꞌhuichinquëmaꞌ. Quisosoíchin nanitaparin oshanëmaꞌ inquitiinquëmasoꞌ. Iráca pënëntërinsoꞌ Moisësëri ninshitopirinhuëꞌ. Ina imapatamaꞌ, co oshanëmaꞌ inquitarinquëmahuëꞌ. Nipirinhuëꞌ, Quisoso natëhuatëhuaꞌ, oshanënpoaꞌ inquitarinpoaꞌ. Oshanënpoa marëꞌ chiminin niꞌton, inquitarinpoaꞌ. Ina quëran Yosë noya niꞌsarinpoaꞌ. 40Nani natanamaco niꞌton, aꞌnaroáchin, iyaroꞌsaꞌ, natëcoꞌ. Niꞌcona anaꞌintochinquëmaꞌ. Iráca Yosë quiricanën quëran pënëntonaꞌpiroꞌsaꞌ itaponaꞌ:

41‘Yosëri itërin: “Canpitasoꞌ naꞌcon tëhuaconamaꞌ.

Iso tahuëriꞌsaꞌ ca nohuanto, naꞌcon maꞌsha onpoaramaꞌ. Yonquirahuësoꞌ shaꞌhuitarinënquëmaꞌ.

Natanapomarahuëꞌ, co natëtaramahuëꞌ. Napoaton paꞌyanatomaꞌ, yonquicoꞌ.

Chiníquën anaꞌintaranquëmaꞌ niꞌton, taꞌhuantaramaꞌ,” tënin Yosë,’ itopi.

Canpitantaꞌ niꞌcona inapochachin anaꞌintochinquëmaꞌ, tënin Paono, pënëntaton.

42Ina quëran niyontonpiso pëi quëran pipihuachinara, ‘aꞌna chinoto tahuërintaꞌ inapochachin aꞌchintaantacoi,’ itopi. 43Piyapiꞌsaꞌ noquitopirinahuëꞌ, naꞌa cotioroꞌsari Paono imasapi. Nisha piyapiꞌsantaꞌ cotioroꞌsa pochin Yosë chinotopisopita imasapi. Imapachinara, Paono, Pirnapi catoari chachin aꞌchintantapi.

‘Yosë inaora nohuanton, nosororinpoaꞌ,’ taꞌtomaꞌ, imamiatocoꞌ,” itopi.

44Aꞌna chinoto tahuëri nanihuachina, yaꞌipi ninanoquë yaꞌhuëpisopita niyontonpi Yosë nanamën natanacaiso marëꞌ. Caraíchin piyapi co paꞌpihuëꞌ. 45Cotioroꞌsaso nipirinhuëꞌ notohuaroꞌ piyapi niꞌsahuatonaꞌ, noꞌhuitonaꞌ, apiratopi. “Isopitasoꞌ nisha piyapiꞌsaꞌ niꞌton, co canpoa pochin iráca pënëntërinsoꞌ natëpihuëꞌ,” taꞌtonaꞌ, noꞌhuitopi.

“Paono co noꞌtëquën aꞌchininhuëꞌ. Inasoꞌ nonpintëꞌ,” itopi. 46Paonoso nipirinhuëꞌ chiníquën cancantaton, co tëꞌhuarinhuëꞌ. Pirnapintaꞌ chiníquën cancantërin.

—Canpitaꞌton Yosë nanamën shaꞌhuitaꞌhuanquëmasoꞌ yaꞌhuëpirinhuëꞌ, aꞌporamaꞌ niꞌton, canpitaora tëhuënëma quëran co nanpimiataramahuëꞌ. Napoaton nisha piyapiꞌsaꞌ aꞌchintarai. 47Sinioro shaꞌhuitërincoi:

“Quëmasoꞌ acoranquën nisha piyapiꞌsaꞌ aꞌchintaton anohuitancoso marëꞌ.

Aꞌpintërëso pochin nanamëhuë anitotaran.

Yaꞌipi parti paaton, piyapiꞌsaꞌ aꞌchintëraꞌpiapon chaꞌëcaiso marëꞌ,” itërincoi, tënin Paono.

48Nisha piyapiꞌsaꞌ natanahuatonaꞌ, paꞌyatopi. “Ma noyacha Yosë shaꞌhuitërinpoa paya,” topi. Aꞌnaquën Yosëri huayonin niꞌton, natëtonaꞌ, Quisoso imasapi ina nohuitatonaꞌ, nanpimiatacaiso marëꞌ. 49Yaꞌipi ina parti Sinioro nanamën nahuinin. 50Cotioroꞌsaso nipirinhuëꞌ ninanoꞌ huaꞌanoꞌsaꞌ nontopi. Sanapiꞌsantaꞌ chiníquën nanantopisopita nontopi, Yosë chinotopisopita nininsoꞌ. “Paono co noya quëmapihuëꞌ. Pirnapintaꞌ co noyahuëꞌ. Co isëquë nohuantëraihuëꞌ,” toconpi. Napotatonaꞌ, aparisitahuatonaꞌ, aꞌpapi. 51“Nani shaꞌhuitopiranquëmahuëꞌ, co nohuantaramahuëꞌ niꞌton, canpitaora tëhuënëmaquë ninaꞌintaramaꞌ,” itahuatonaꞌ, Iconioquë paꞌpi. 52Patopirinahuëꞌ, nani aꞌchintopi niꞌton, Quisoso imapisopitasoꞌ noya cancantopi. Ispirito Santori noyá yaꞌcoancantërin.

Currently Selected:

Hechos 13: cbt

Highlight

Copy

Compare