Hechos 14

Iconioquë aꞌchinpisoꞌ

1Paono, Pirnapi, inapita Iconioquë canconpachinara, inachachin niantapi. Inaquëntaꞌ chinoto tahuëri nanihuachina, cotio niyontonpiso pëiquë yaꞌconpi. Nóya aꞌchinpi niꞌton, naꞌa cotioroꞌsari natëpi. Naꞌa nisha piyapiꞌsantaꞌ Quisoso imápi. 2Aꞌnaquën cotioroꞌsaso nipirinhuëꞌ, co yanatëpihuëꞌ. Napoaton, nisha piyapiꞌsaꞌ nontatonaꞌ, anishacancantopi. “Quisoso imapisopita co noya piyapisahuëꞌ,” itopi. Napoaton aꞌnaquën co yaimatonahuëꞌ, imapisopita noꞌhuipi. 3Huaꞌquiꞌ inaquë Paono yacapatërin. Pirnapirë chachin inaquë yaꞌhuëpi. Chiníquën cancantatonaꞌ, Siniorori nosororinsoꞌ shaꞌhuirápi. Noꞌtëquën shaꞌhuipi niꞌton, Siniorori catahuarin caniaꞌpiroꞌsaꞌ aꞌnaroáchin anoyatacaisoꞌ. Ina niꞌsahuatonaꞌ, “Tëhuënchachin Yosë catahuarinquëmaꞌ,” itopi. 4Yaꞌhuëhuanoꞌsasoꞌ nisha nisha yonquipi. Aꞌnaquën cotioroꞌsa pochin cancantopi. Aꞌnaquënso nipirinhuëꞌ Paono, Pirnapi, inapita natëpi. 5Cato chachin noya nipirinahuëꞌ, cotioroꞌsasoꞌ nisha piyapiꞌsarëꞌ napopianachin yonquiatonaꞌ, chinotopi ahuëcaisoꞌ. Huaꞌanoꞌsarintaꞌ noꞌhuipi. Naꞌpiquë yatëpapirinahuëꞌ, 6natantahuatonaꞌ, taꞌapi. Niconia parti paꞌpi. Inaquë catoꞌ panca ninanoroꞌsa yaꞌhuërin. Aꞌnaso Nistra, aꞌnantaꞌ Tirpi itopi. 7Inatohuaꞌ paatonaꞌ, noya nanan shaꞌhuiantarapi. Yaꞌcariyantaꞌ aꞌchinapi.

Paono naꞌpiquë tëꞌyarapisoꞌ

8Nistraquë apia yaꞌhuërin. Co nanitërinhuëꞌ iratacasoꞌ. Nasitërin quëran huarëꞌ co onporontaꞌ huanirinhuëꞌ. 9Paonori aꞌchintohuachina, nóya natanarin. Napohuachina, Paonori notëërin. “Iso quëmapi noya natëtërin. ‘Quisocristo nanitërin anoyatiincosoꞌ,’ tëninso marëꞌ anoyatarahuë,” tënin yonquinënquë. 10Napoaton chiníquën itapon:

—Noꞌtëquën huaniquëꞌ iyasha, itërin.

Aꞌnaroáchin huanirahuaton, noya paꞌsarin. 11Piyapiꞌsari niꞌsahuatonaꞌ, Niconia nananquë ninontopi:

—Yosëroꞌsaꞌ isëquë oꞌmatonaꞌ, piyapi taraimapi, topi.

12“Pirnapisoꞌ Sioso chinotërëhuasoꞌ,” nitopi. Paono naꞌcon naꞌcon aꞌchinin niꞌton, “Inasoꞌ Irimisë chinotërëhuasoꞌ,” nitopi. (Inahuara nananquë ninontopi niꞌton, Paono, Pirnapi inapitasoꞌ co natanpihuëꞌ.) 13Ninano intonquë Sioso moshapiso pëiꞌ yaꞌhuërin. Ina huaꞌanënsoꞌ, ohuacaꞌ masahuaton, yancoroꞌsaꞌ sihuirin, apëꞌpëconotacaso marëꞌ. Notohuaroꞌ piyapiꞌsari imasapi. Ninano yaꞌcoanaquë quëparahuaton, inaquë yatëparin moshacaiso marëꞌ. 14Naporo huarëꞌ Pirnapi, Paono, inapita nitotopi. Natanahuatonaꞌ: “Tata Yosëíchin chinotacasoꞌ yaꞌhuërin,” taꞌtonaꞌ, aꞌmopiso oshapi. Huancanachin taꞌarahuatonaꞌ, chiníquën nontopi.

15—¿Onpoaramataꞌ iyaroꞌsaꞌ? Ama moshacoisohuëꞌ. Tëhuënchachin co quiyasoꞌ moshamacoiso yaꞌhuërinhuëꞌ. Quiyantaꞌ piyapicoi, canpita pochachin ninai. Noya nanan shaꞌhuitaꞌhuanquëmaso marëꞌ huëꞌnai. Quisoso nanamën, iyaroꞌsaꞌ, aꞌchinchinquëmaꞌ, natanco. Mamanshi topinan quëran mosharamaꞌ. Yosëso nipirinhuëꞌ nanpirárin. Ama huachi mamanshi moshacosohuëꞌ. Inapita naniantatomaꞌ, Yosë imaco huachi. Isoroꞌpaꞌ, inápaquë yaꞌhuërinsopita, marëroꞌsaꞌ, yaꞌipi maꞌsharoꞌsaꞌ, inapita inari ninin. 16Iráca piyapiꞌsaꞌ co Yosë nohuitopihuëꞌ niꞌton, Yosëri tananpitërin inahuara yonquipisoꞌ imacaiso marëꞌ. 17Nipirinhuëꞌ, nosoroatonpoaꞌ, nani maꞌsha acotërinpoaꞌ ina nohuitacaso marëꞌ. Ina nohuanton, oꞌnanin. Ina nohuanton, maꞌsha papotërin. Ina nohuanton, cosharoꞌ yaꞌhuëtërinpoaꞌ caꞌpatëhuaꞌ noya cancantacaso marëꞌ. Inapoaton, noya yonquirinpoasoꞌ anitotërinpoaꞌ, itopi.

18Napotopirinahuëꞌ, co aꞌnaroáchin natëtopihuëꞌ. Parisi quëran pochin natëtonaꞌ, co huachi ohuacaꞌ tëpatona inapita moshapihuëꞌ.

19Napoaponahuëꞌ, cotioroꞌsari huëcapairahuatonaꞌ, anishacancantopi. Aꞌnaquën Antioquia quëran huëꞌpi. Aꞌnapitantaꞌ Iconio quëran huëꞌpi. Huëꞌsahuatonaꞌ, Paono, Pirnapi, inapita shaꞌhuirapipi niꞌton, noꞌhuipi.

Noꞌhuirahuatonaꞌ, Paono mapi. Masahuatonaꞌ, naꞌpiquë tëꞌyarahuachinara, chiminpirinhuëꞌ. Ohuararahuatonaꞌ, ninano intonquë tëꞌyatonpi. “Nani chiminin,” taꞌtonaꞌ inaquë patopi. 20Quisoso imapisopitari tancapitahuatonaꞌ, nocoasoiꞌ, aꞌnanaya niꞌtiintarahuaton, huaniantarin. Ninanoquë paantarin. Tahuëririnquë Tirpiquë paꞌnin. Pirnapintaꞌ paꞌnin.

21Inaquë noya nanan shaꞌhuitohuachinaꞌ, naꞌa piyapiꞌsaꞌ Quisoso imasapi. Nani aꞌchintohuachinara, Nistraquë ayamantapi. Ina quëran Iconioquëntaꞌ paantarahuatonaꞌ, Antioquiaquë cancoantapi. 22Cara ninanoquë chachin Quisoso imapisopita pënënaꞌpiapi. “Ama iyaroꞌsaꞌ Quisoso aꞌpocosohuëꞌ. Imamiatocoꞌ. Aꞌnapita aparisitarinënpoaꞌ. Parisitacasoꞌ yaꞌhuërin. Parisitatëhuaꞌ, Yosë huaꞌanëntërinquë yaꞌconarëhuaꞌ. Napoaton noya ahuantocoꞌ,” itopi. Pënënpachinara, achinicancanpi. 23Yapaꞌpachinara, aꞌnaya aꞌnaya Quisoso imapisopitaquë ansianoꞌsaꞌ acoraꞌpiapi. Noya nipisopitaráchin acoraꞌpiapi. Co coshatatonaraihuëꞌ, inapita marëꞌ Yosë nontopi: “Yaꞌipi isopita, Sinioro, noya natërinënquën. Noya aꞌpaiquëꞌ,” itopi. Cara ninanoquë chachin napopi.

Huaꞌqui quëran yaꞌhuëpiquë paantapisoꞌ

24Ina quëran paantapi. Pisitia parti naꞌhuëtaantarahuatonaꞌ, Panpiria parti cancoantapi. 25Piriquiquë Yosë nanamën shaꞌhuiantarahuatonaꞌ, Atariaquë paꞌpi huachi. 26-27Ina quëran nanchaquë huëꞌsahuatonaꞌ, Antioquiaquë canquipi. Aꞌpapi quëran chachin canquiantapi. Canquirahuatonaꞌ, Quisoso imapisopita ayontonahuatonaꞌ, yaꞌipi shaꞌhuitopi. “Iꞌhua chachin aꞌparamacoi. ‘Aꞌna parti yaꞌhuëpisopita noya nanan shaꞌhuitoncoꞌ. Insëquësona paꞌpatamaꞌ, Yosë noya catahuainquëmaꞌ,’ itohuatamacoira, paꞌnai. Nani shaꞌhuirai. Yosë nóya catahuarincoi. Ina nohuanton, nisha piyapiꞌsantaꞌ Quisoso natëtonaꞌ, Yosë huëntonënquë yaꞌconpi,” itopi. 28Inaquë huaꞌquiꞌ yaꞌhuëantapi. Imapisopitarëꞌ ninontatonaꞌ, noya yaꞌhuëpi.

Currently Selected:

Hechos 14: cbt

Highlight

Copy

Compare