2 Samuel 19
19
1Tapi Copirno huiꞌnin marëꞌ sëtaton naꞌnërinsoꞌ natantatonaꞌ, aꞌnaquëni Coapo shaꞌhuitapona paꞌpi. 2Naporo tahuëri sontaroꞌsasoꞌ, inimicoroꞌsa minsëatona capa cancantacaiso yonquiapirinahuëꞌ, Tapi naporinso marëꞌ inahuanta sëtopi. 3Napoatonaꞌ, tapainpichin Maanainquë huënantapi. Inimicoroꞌsari minsëaton nitaꞌatopiso pochin, taꞌtatona ninanoquë yaꞌcoinpi. 4Napoasoi copirnosoꞌ, sëtaton niimorayatërin. Naporin quëran chiníquën yaitárin: “Apësaron, huiꞌnahuë taꞌa. Apësaron conpaaꞌhua taꞌa,” tosárin.
5Napohuachina, Coaposo copirno pëinënquë paꞌsahuaton itapon:
—Quëmasoꞌ sinioro copirno piyapinënpita atapanan. Inimiconënpita ahuëatënën tëpainënquënso nipirinhuëꞌ, inapitaso paꞌpoyarinën. Huiꞌnanpita, saꞌanpita, cosonanënpita, inapitanta paꞌpoyapi. 6Co quëꞌyarinënquënsopitahuëꞌ nosoroaton, nosororinënquënsopitasoꞌ co quëꞌyaranhuëꞌ. Inapoaton quiyasoꞌ huaꞌan acorancoisopita co paꞌtëraihuë pochin niꞌnancoi. Apësaron nanpiárin naporini, yaꞌipicoi chiminpiraihuëntaꞌ, naporo tëhuënchinsoꞌ noya ancanchitonhuëꞌ, tënahuë. 7Iporaso nipirinhuëꞌ, pipiton sontaronënpita noya nontaton achinicancanquëꞌ. Coꞌsoꞌ inapohuatanhuëꞌ, yaꞌipi patarinën. Sinioronta niꞌsárinco niꞌton, noꞌtëquën shaꞌhuitaranquën. Ipora tashi co aꞌnaya tëranta catahuarinënquënso quëparitarinhuëꞌ. Inapotohuachinën naꞌcon naꞌcon parisitaran. Huiꞌnapitapon quëran huarëꞌ maꞌsha onpoaton parisitëran nipirinhuëꞌ, co inayátërahuë iporasoꞌ nisaran, itërin. 8Napotohuachina copirnosoꞌ, ninano yaꞌcoanaquë paꞌsahuaton huënsëconin. Naporinso yaꞌipiya quëran natantohuachinara, nontacaiso marëꞌ paapapi.
Tapi Quirosarinquë paantarinsoꞌ
Apësaroncoꞌ sontaronënpitaso tronpita pihuipiso natanahuatonaꞌ, yaꞌipiya yaꞌhuëpiꞌpaꞌ taꞌapi. Nani ina shaꞌhuitëranquëmaꞌ. 9Ina piquëran yaꞌipi Israiro huëntonoꞌsaquë pochin nonatona napopi: “Tapi copirno huiristinoroꞌsa quëran nichaꞌërinpoaꞌ. Inaso nipirinhuëꞌ, Apësaronco tëꞌhuataton iso noꞌpa quëran taꞌarin. 10Ina huachi copirnonënpoa nicacaso marëꞌ acopirëhuahuëꞌ, nani chimimin. Aꞌnaroáchin paꞌahua Tapi huaꞌanëntaantainpoaso marëꞌ Quirosarinquë quëpantaꞌahuaꞌ,” niitopi.
11-12Ina pochin nonpisoꞌ, yacapatërinso ninanoquë Tapi nataantërin. Ina natantaton, corto huaꞌanoꞌsaꞌ, Satoco, Apiataro, inapita nanan aꞌpatërin. Iso pochin taꞌcaso aꞌpatërin: “Cota huënton ansianoꞌsa nontooncoꞌ. Naporin Tapi: ‘Manóton pëinëhuëquë panantato, huaꞌanëntaantaꞌhuaso catahuainaco. Aꞌnapita israiroꞌsasoꞌ, nani yonquiapi Quirosarinquë quëpanantainacosoꞌ. Canpoasoꞌ, ina huënton quëransáchin nicarihuarahuëꞌ, co inapita pochin yonquiramahuë niꞌton, tapanamaso yaꞌhuërin, tënin,’ itocoꞌ,” itërin. 13Naporahuaton apin Amasa itopisonta shaꞌhuitacaiso marëꞌ nanan aꞌpatërin: “Copirno naporin: ‘Quëmasoꞌ quëmopinëhuënquën. Napoaton ipora quëran huarëꞌ yaꞌipi sontaronëhuëpita quëmari camaiapon. Coapo yaꞌhuërënamën napoaran. Coꞌsoꞌ inapotohuatënquënhuëꞌ, Yosë chiníquën anaꞌinchinco, tënin copirno,’ itocoꞌ,” itërin.
14Napotaton copirnosoꞌ, Cota huënton quëmapiꞌsa catahuacaiso marëꞌ anohuantërin. Napohuachinara, napopináchin yonquiatonaꞌ, Tapi nanan aꞌpatopi: “Sontaro huaꞌanoꞌsarë chachin Quirosarinquë huënantaton, huaꞌanëntaantacoi,” itoonpi.
15Napotohuachinara, copirnoso piyapinënpitarë chachin huënantatonaꞌ, Cortaniiquë canquipi. Cota huënton quëmapiꞌsasoꞌ, nacapiatona nontacaiso marëꞌ Quiricaroquë paꞌmapi. Naporahuaton Cortaniiꞌ pëntontohuachinara catahuatacaiso marëꞌ paꞌmapi. 16Simii Paorinquë yaꞌhuërinsontaꞌ, manorahuaton Copirno nacapicaso marëꞌ paꞌmarin. Mincamin huënton quëmapi niponahuëꞌ, Cota huënton quëmapiꞌsarë chachin paꞌmarin. 17Simiisoꞌ huaranca quëmapiꞌsari caꞌtanin. Inapitasoꞌ Mincamin huënton quëmapiꞌsaꞌ. Inapitarë chachin Saonocoꞌ piyapinën Sipantaꞌ, shonca aꞌnatërápo huiꞌninpitarë oꞌmarin. Cato shonca piyapinënpitanta quëmarin. Yaꞌipi inapitasoꞌ, coꞌhuara Tapi Cortaniiquë canquimayátërasohuëꞌ, camapi. 18Pëntoinantaquëchin pëntonatonaꞌ, aquëtëran Tapi ninapi. Saꞌinpita, huiꞌninpita, inapitarë chachin huëꞌpachina catahuacaiso marëꞌ napopi. Canquihuachinara, copirnori noya niꞌcaso marëꞌ pëntoinanquë catahuamiatopi. Inaora chachin yapëntonahuasoꞌ, Simiiri noya nicaton, noꞌpaquë huarëꞌ monshorin quëran mosharin. 19Ina quëran itapon:
—Caso piyapinënco nipirahuëꞌ, iꞌhua Quirosarin quëran pipisënquën noꞌhuiranquën. Napoaponahuëꞌ ina naniantaton, ama anaꞌintocosohuëꞌ. Naporahuaton ama huachi ina yonquiquësohuëꞌ. 20Tëhuënchachin tëhuëato naꞌinpiro ninahuë. Inapopirahuëꞌ, quiyaꞌton nacapiaponquën oꞌmarai. Cota huënton quëmapiꞌsarëꞌcoi naporai. Aꞌnapita Israiro huënton quëmapiꞌsasoꞌ, co nacapiaponën huëꞌshamátërapihuëꞌ, itërin. 21Naporoꞌ Apisaisoꞌ, tapon:
—Quëmasoꞌ sinioro copirno Sinioro chachin huayoninquën. Ina nipiranhuëꞌ, Simii noꞌhuitënquën naꞌinpiro ninin. ¡Chiminacaso yaꞌhuërin tënahuë casoꞌ! tënin. 22Apisai napopirinhuëꞌ, Tapisoꞌ Coaponta itapon:
—Canpitaso Sirohuia huaꞌhuinpitanquëmaꞌ. Catonquëma chachin yaiꞌhuërëtatoma naporamaꞌ. Caso nipirinhuëꞌ, co ina pochin yonquirahuëꞌ. Ca mini Israiro copirnocosoꞌ. ¡Napoaton canpitasoꞌ, co nisha camaitamaso yaꞌhuërinhuëꞌ! Co nohuantërahuëꞌ ipora tahuëri aꞌna Israiro quëmapi tëranta chiminacasoꞌ, itërin. 23Ina quëran Simii tahuërëtahuaton itapon: “Yoscoarëꞌ co carinquën atëpataranquënhuëꞌ,” itërin.
24Saonocoꞌ shiin Mihui-posi itopisonta copirno ninapon paꞌmarin. Apia nipirinhuëꞌ, catahuapi niꞌton, Quirosarin quëran paꞌmaton Cortaniiꞌ aquëtëran copirno ninarin. Tapi Quirosarin quëran pipirin quëran huarëꞌ sëtaton co manta nitaparinhuëꞌ. Co nantën tëranta paꞌmorinhuëꞌ. Co shinoratëontaꞌ, yaquirinhuëꞌ. Co aꞌmorinso tëranta pëꞌsarinhuëꞌ. Naporin. 25Copirno nontacaso marëꞌ yaꞌcaritohuachina, inariso quënanahuaton itapon:
—¿Onpoatonta co imarancohuëꞌ? itërin.
26—Piyapinëhuë Sipa itërahuësoꞌ nonpintërinco sinioro copirno. Apiaco niꞌto, imaꞌhuanquënso marëꞌ mora tapatiincosoꞌ ina camaipirahuëꞌ. Inaso co natërincohuëꞌ. 27Naporahuaton, quëmaquë nonpinapirinco: “Iporacha tëhuënchinsoꞌ tata mashoco Saono pochin israiroꞌsa copirnonëna nicaꞌhuaso marëꞌ acoaponaco, tënin” taꞌton nonpinapirinco. Nonpinapipirincohuëꞌ, co tëꞌhuatërahuëꞌ. Quëmasoꞌ Yosë anquëninën pochinquën niꞌton, nitotaran insosona noꞌtëquën noninsoꞌ. Ina nitotaton maꞌsona onpotaancoisoꞌ, yonquiaran. 28Yaꞌipi Saonocoꞌ quëmopinënpitacoi tiquirancointa naporini, noꞌtëquën niitonhuëꞌ. Napopirinhuëꞌ, nosoroatonco quëmarëꞌco chachin coshataꞌhuaso quëtëranco. Napoaton: ¡Co huachi nanitërahuë aquëtë huarëꞌ natanaꞌhuanquënsoꞌ! itërin Mihui-posiri.
29—Nani natananquën. Co huachi aquëtë nonacaso yaꞌhuërinhuëꞌ. Nani Sipa yaꞌipi Saonocoꞌ noꞌpanën quëtërahuë. Quëtopirahuëꞌ, iporasoꞌ camaitaantapo quëmarë nipatomatacasoꞌ, itërin copirnori.
30—Yaꞌipi inari machaꞌin. Co ina naꞌcon naꞌcon yonquirahuëꞌ. Noya huënantaton, huaꞌanëntaantarancoi niꞌton, ina marëꞌ tëhuënchinsoꞌ noya noya cancantërahuë, itërin Mihui-posiri.
31Carataquë yaꞌhuërinso Parsirai itopisontaꞌ, Noquirin ninano quëran copirno chiꞌyaimarin. Cortaniiꞌ apëntontacaso marëꞌ chiꞌyaimarin. Naporahuaton inaquë nontaton panantacaso marëꞌ naporin. 32Tapi imarinsopitarë chachin Maanainquë yaꞌhuasoiꞌ, inari catahuarin. Nani mashoya, posa shonca piꞌipitaponahuëꞌ, yaꞌipiya capacaiso inari quëtërin. Paꞌpi maꞌhuan niꞌton, ina nápo nipirinhuëꞌ, ananitërin. 33Panantacaso marëꞌ nontahuachina, copirnori itapon:
—Huëquë Quirosarinquë paꞌa. Inaquë carinquën niꞌsaranquën huachi, itërin. 34Inariso napoaponahuëꞌ, itapon:
—Caso co huachi huaꞌqui tahuëri nicapohuëꞌ. Napoaton ¿Maꞌmarëta inatohua imacontaꞌinquën? 35Nani posa shonca piꞌipitërahuë. Caꞌpatora, oꞌopatora co huachi yátërahuëꞌ. Cantapisontaꞌ, co huachi ina inahuë natanahuëꞌ. Imapatënquën sacai nisaran. Napoaton co nohuantërahuëꞌ imaꞌhuanquënsoꞌ. 36Cortaniiꞌ pëntontacamaso marëíchin caꞌtanaranquën. Inaíchin niꞌquëhuarëꞌ, co aquëtë huarëꞌ acanaancoso yaꞌhuërinhuëꞌ. 37Iso tëhuënchinso natainquën. Yaꞌhuërahuë ninanoquë panantaꞌhuaso quëtoco. Inaquë chiminpato, quëmopinëhuëpita paꞌpichinaco. Shimashonëhuëpita poꞌmopiquë cantaꞌ, poꞌmoinaco. Huiꞌnahuë Quiman itërahuësoꞌ tëhuënchinsoꞌ yaꞌhuëarin. Inantaꞌ, carinquën natëranquënso pochin natëarinquën. Ina tëhuënchinsoꞌ imainquën. Imapachinquën nosoroaton catahuahuatan, noya nisarin topirahuë, itërin.
38—Noyapaꞌ. Quëpaarahuë. Maꞌsona onpotaꞌhuasoꞌ shaꞌhuitohuatanco, ina chachin nitarahuë. Quëmanta maꞌsona natanpatanco, quëchinquën, itërin copirnori.
39Yaꞌipiya quëran Cortaniiꞌ pëntontopi huachi. Copirnonta pëntonpachina, Parsirairi noya pacacaso marëꞌ apinorin. Napotahuaton yaꞌhuërinꞌpaꞌ panantarin. 40Copirnontaꞌ, Quimanë chachin Quiricaroquë paꞌnin. Cota huënton sontaroꞌsari imapi. Patoma pochin aꞌnapita Israiro sontaroꞌsanta oꞌmapisoꞌ, Tapi imapi.
41Co huaꞌquiya quëranhuëꞌ Israiro sontaroꞌsasoꞌ copirno paaparahuatona itaponaꞌ:
—Cota huënton sontaroꞌsaráchin huaꞌanëntatë pochin nitarinën. Inapotahuatënën quëmopinënpita, sontaronënpita, inapita Cortaniiꞌ ichipëntontërinën. ¿Onpoatonta napopi? itopi. 42Napotohuachinara, Cota huënton sontaroꞌsari itaponaꞌ:
—Copirnosoꞌ quëmopinëhuëi chachin niꞌton, napotarai. Napoaponahuëꞌ, ama ina marëꞌ noꞌhuitocosohuëꞌ. ¡Co copirno cosharo caꞌparaihuëꞌ! Co maꞌshanën tëranta matatoi napotaraihuëꞌ, itopi. 43Napotohuachinara, inahuaso taantaponaꞌ:
—Canpitaso aꞌna huëntoínchinquëmaꞌ. Quiyaso nipirinhuëꞌ, shonca huëntoncoi niꞌtoi, copirno caꞌtanaꞌhuaiso yaꞌhuërin antaꞌ. Naꞌcon naꞌconcoi nichinapon chachin ama nocancosoihuëꞌ. ¡Quiyariꞌton copirno Quirosarinquë huënantacasoꞌ, yonquirai! itopi. Ninapotatonaꞌ, ninoꞌhuipi. Cota huënton sontaroꞌsaso napoaponahuëꞌ, naꞌcon naꞌcon noꞌhuitopi.
Currently Selected:
2 Samuel 19: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
