2 Samuel 22
22
Yosë chinotaton Tapi naporinsoꞌ
1-2Siniorori Tapi nichaꞌërin. Copirno Saonocori inimicotaton yatëpapirinhuëꞌ, nichaꞌërin. Aꞌnapitarinta inimicotatona yatëpapirinahuëꞌ, nichaꞌërin. Ina yonquiaton iso pochin cantarin:
“Quëmasáchin Sinioro paꞌpoyaranco.
Naꞌpianaquë naꞌpirahuëso pochin yaꞌcopiranco.
Quëmasáchin yánichaꞌëranco.
3Quëmaso Yosënquën. Quëmasáchin imaranquën.
Panca naꞌpiana noyá yaꞌcopirinco.
Iscotontaꞌ, noya paꞌpoyarinco.
Inapochachin quëmanta noya paꞌpoyaranco.
Chiníquën nanantaton nichaꞌëranco.
Ina inápa natëtëquë noya naꞌpirëꞌ, inapochachin quëmanta noya yaꞌcopiranco.
Inimicoroꞌsa quëran nichaꞌëranco.
Noꞌhuitërayaroꞌsa yatëpapirinacohuëꞌ, nichaꞌëranco.
4Inimicoroꞌsa yaahuëhuachincora, nontëranquën.
Ina natanaton, inapita quëran nichaꞌëranco.
Napoaton chinotaꞌhuanquënso yaꞌhuërin.
5Inimicoroꞌsa imapachinacora: ‘Masarinaco mini.
Marë coꞌsacairi imotërinso pochin tëpaponaco,’ topirahuë.
Huëhuëpiro pama pochin inimicoroꞌsaso niꞌton,
inapita nicato paꞌpi tëꞌhuatërahuë.
6Ohuacaꞌ caporinquë aꞌsonpatëra, co taꞌarinhuëꞌ.
Ina pochachin cantaꞌ, nani chimirin aꞌsoninco topirahuë.
Pëcotanquë maꞌsha mapatëra, tëparëꞌ.
Ina pochachin cantaꞌ, macatonaco tëpaponaco topirahuë.
7Napoaton co napion ancantato Sinioro përaranquën.
‘¡Catahuaco!’ taꞌto nontëranquën.
Napotohuatënquëra, yaꞌhuëran quëran natananco.
Chiníquën nontohuatënquëra, natananco huachi.
8Naporoꞌ quëma nohuanton, chiníquën ocohua paꞌnin.
Motopiroꞌsanta nacon naconchararin.
Quëma Sinioro noꞌhuitëran niꞌton, naporin.
Inimiconëhuëpita noꞌhuiton naporan.
9Paꞌpi noꞌhuitëran niꞌton, nitëquën quëran conai pipirinso pochin yaꞌnoran.
Nanamën quëran panca pën pipirinso pochin yaꞌnoran.
¡Inaran chachin pënayaroꞌsa opororanso pochin yaꞌnoran!
10Piꞌiroꞌtë paꞌshintëransoꞌ paꞌshirëso pochin nitaton, oꞌmaran.
Oꞌmahuatana, panca chitoro nininquë oꞌmaran.
¡Yara yaráchin nininquë oꞌmaran!
11Cahuarioquë yaꞌmitërëso pochin aꞌna quiropinoquë yaꞌmitëran.
Yanponatë paꞌnëso pochin aꞌnaroáchin huëcapairinco.
Panca ihuantaꞌ, anpiantëhuan pochin ninin.
Ina aipi paꞌnëso pochin oꞌmaransoꞌ yaꞌnorin.
12Paꞌpi tëꞌhuatoro yaꞌnocaso marëꞌ yaráton chitoro yaꞌcopirinquën.
Oꞌnan yaꞌhuërinquë chitoro napotërinquën.
13Quëma nisaranquë oꞌcori huënaratërinso pochin huënaratarin.
Pënayaroꞌsanta oꞌnan pochin aꞌpaimaran.
14Chini chiníquën nanantonaꞌpi Sinioronquën nipiranhuëꞌ, anoꞌhuitërinën.
Noꞌhuitaton huira pochin: ‘Sharí,’ tënan.
15Pëꞌchinanquë shinërë tëꞌyatërëso pochin, oꞌcorinënpita aꞌpaimaran.
Inimiconëhuëpita inaquë ohuanëso pochin ayanquëëran.
16Inimiconëhuëpita noꞌhuiton iquianantëran.
Inapita noꞌhuiton pihui pihuiaran.
Naporoꞌ marë anpo nipirinhuëꞌ, noꞌpaꞌ yaꞌno yaꞌnoarin.
Isoroꞌpaꞌ achinipisopitantaꞌ, yaꞌno yaꞌnoarin.
17Panca marëquë paꞌitërëso pochin inimicoroꞌsa nitërinaco.
Quëmasoꞌ imiranën ihuëtatë pochin nitëranco.
Napotohuatancora, inaquë matatë pochin nicato chaꞌërahuë.
18Inimiconëhuëpitasoꞌ, chini chiníquën nanantopi.
Chiníquënoꞌsa niꞌtona noꞌhuipirinacohuëꞌ, inapita quëran nichaꞌëranco.
19Maꞌsha onpoasoco chachin pashitaꞌparinaco.
Quëmasoꞌ Sinioro napoaponahuëꞌ, catahuaranco.
20Inimicoroꞌsa quëran nichaꞌëranco niꞌton, co tëparinacohuëꞌ.
Nosororanco niꞌton, nichaꞌëranco.
21Noya ninahuëso marëꞌ noya catahuaranco.
Co maquë tëranta naꞌinpiro ninahuëꞌ niꞌton, nóya acanaranco.
22Quëma camaitëransopita noꞌtëquën natërahuë.
Pënëntëransopita noꞌtëquënáchin natërahuë.
23Yaꞌipi camaitëransopita natërahuë.
Pënëntëransopitanta yaꞌipi natërahuë.
24Noyasáchin nicato imaranquën.
Co noyahuëꞌ nipatëra, tëhuërëꞌ.
Co caso piꞌpian tëranta inaporahuë.
25Quëma nohuantëransoráchin ninahuë.
Napoaton Sinioro acanaranco.
26Noꞌtëquënáchin natëhuachinën, quëmarinta noꞌtëquënáchin catahuaran.
Noyasáchin nicatona imapachinën, noya nicaton catahuaran.
27Noꞌtëquën nontohuachinën quëmarinta noꞌtëquën nontaran.
Yanonpintohuachinënsoꞌ, quëmarisoꞌ naꞌcon naꞌcon nitotaton monaaran.
28Co manta nanitopisopitahuëꞌ, nichaꞌëran.
‘Cashachaꞌ,’ topisopitaso nipirinhuëꞌ, atapanaran.
29Quëmasoꞌ aꞌpintatë pochin nitatonco noyasha acancantëranco.
Tashinanquë paꞌnëso pochin maꞌsha onpotatonaco yatëparinaco.
Quëmaso nipirinhuëꞌ, aꞌpintatë pochin nitëranco.
Napotohuatancora, co inimicoroꞌsa maꞌsha onpotarinacohuëꞌ.
30Quëma catahuaranco niꞌton, inimicoroꞌsa ahuëarahuë.
Pairahuan ninanoroꞌsaquë yaꞌhuëpirinahuëꞌ, yaꞌcontato minsërahuë.
31Quëmaso Sinioro ninansopita, noyasáchin ninin. Co manta tëhuëranhuëꞌ.
Catahuancoiso shaꞌhuitërancoisopitasoꞌ, natëpiro ninin.
Sontaroꞌsa iscotonëni paꞌpoyarin.
Inapochachin quëmanta natërinënquënsopita paꞌpoyaquëꞌ.
32¡Quëmasáchin Sinioro Yosënquën!
¡Co aꞌna yaꞌhuërinhuëꞌ paꞌpoyaincoisoꞌ!
33Quëma catahuaranco niꞌton, chiníquën ahuëtërahuë.
Quëma catahuaranco niꞌton, noyasáchin nisarahuë.
34Quëma catahuaranco niꞌton, yo pochin taꞌarahuë.
Huëhuëpiro motopiroꞌsa nininquënta míso paꞌnahuë.
Inaporahuë niꞌton, co inimicoroꞌsa icantërinacohuëꞌ.
35Quëma aꞌchintëranco ahuëtaꞌhuasoꞌ.
Achiniranco niꞌton, shaꞌpi huaꞌna pëꞌchinanoꞌsaquë inantërahuë.
36Inimicoroꞌsa quëran paꞌpoyarahuatonco, nichaꞌëranco.
Nosoroatonco catahuaranco noya noya yaꞌhuërahuë.
37Inimicoroꞌsa imapachinacora co sacai quëranhuëꞌ taꞌananpirahuë.
Inapohuatora, co toꞌcoitonahuanhuëꞌ taꞌarahuë.
38Inimicoroꞌsa nitaꞌatohuatora, imato tiquirahuë.
Yaꞌipi tiquiaꞌhuarëꞌ huënantarahuë.
39¡Yaꞌipi tiquiato, paꞌsa paꞌsatërahuë!
Notatohuachinara, inaquëranchin taꞌhuantopi.
40Quëma achiniranco niꞌton, inimicoroꞌsa ahuërahuë.
Co natantochináchinhuëꞌ cancantopisopitanta mosharinaco.
41Quëma nohuanton inimicoroꞌsa taꞌananpirinaco. Taꞌapirinahuë imarahuë.
Inapotato, noꞌhuirinacosopita tiquirahuë.
42Canarahuatora, catahuacaiso marëꞌ: ‘Yai’ topi.
Napopirinahuëꞌ, co incari catahuarinhuëꞌ.
Quëmápita Sinioro përápirinënhuëꞌ, co aꞌpaniranhuëꞌ.
43Amocan paꞌsarëso pochin inimicoroꞌsa canarahuë.
Cachiquë chipiroꞌ iꞌnatërëso pochin inimicoroꞌsa nitërahuë.
44Piyapinëhuëpita chachionta chinitopirinacohuëꞌ, nichaꞌëranco.
Nisha nisha nacionoꞌsa huaꞌanëntërahuë quëran co ocoirancohuëꞌ.
Co nohuitërahuësopitantaꞌ, natërinaco.
45Nisharoꞌsa niponaraihuëꞌ, natëinacoso nohuantopi.
Maꞌsona camaihuatora aꞌnaroáchin natërinaco.
46Nisha piyapiroꞌsanta tëꞌhuatatonaco co huachi chinitërinacohuëꞌ.
Tëꞌhuanënaquë, ropatërëꞌna naꞌpipi quëran pipipi.
47¡Sinioro quëmaso yaꞌhuëmiatëquëꞌ!
¡Ma noyacha quëmasoꞌ paꞌpoyarancoi paya!
Quëmasoꞌ nichaꞌëranco, paꞌpoyaranco, napotëranco.
Napotëranco niꞌton, shaꞌhuihuato naní quëran paꞌyachinën.
48Quëmaso Yosënquën niꞌton, inimiconëhuëpita iꞌhuërëtëran.
Quëma chachin nisha nisha nacionoꞌsa camaicaꞌhuaso marëꞌ acoranco.
49Inimiconëhuëpita quëran nichaꞌëranco.
Aꞌnaquën co natëtatonahuëꞌ yaocoirinaco. Inapita quëraonta nichaꞌëranco.
Sinioro: Noꞌhuitërayaroꞌsa yatëpapirinacohuëꞌ, quëma nichaꞌëranco.
50Nisha nisha nacionoꞌsaquë chinotaranquën.
Quëma yonquiatënquën cantarahuë.
51Quëma catahuaranco niꞌton, naꞌaro inimicoroꞌsa minsërahuë.
Huayonatonco copirno nicaꞌhuaso marëꞌ acoranco.
Nosoroatonco yácatahuaranco.
Cá quëran pipipisopitanta inapotápon,” tënin Tapi Yosë cantanën cantaton.
Currently Selected:
2 Samuel 22: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
