1 Reyes 18

Iniasëri Acapo nontaantarinsoꞌ

1Cara piꞌipi Israiro noꞌpaquë co manta oꞌnaninhuëꞌ. Ina piquëran Siniorori Iniasë nontaton itapon: “Paaton Acapo nontaantaquëꞌ. Ca nohuanton oꞌnanapon huachi,” itërin.

2Napotohuachina paꞌnin. Samariaquë canquirahuaton niꞌpirinhuëꞌ, piyapiꞌsa tanarotatona paꞌpi chiníquën parisitapi. 3-4Iniasë Samariaquë huëcasoꞌ, Acaponta piyapinën Apitiasë itërinsoꞌ nontacaso marëꞌ përarin. (Apitiasësoꞌ, yaꞌipi cancanën quëran huarëꞌ Sinioro chinotërin. Napoaton pënëntonaꞌpiroꞌsa nosoroaton catahuarin. Iꞌhua chachin Quisapirari sontaroꞌsa camairin inapita tëpacaisoꞌ. Napohuachina Apiasësoꞌ, pasa pënëntonaꞌpi masahuaton poꞌorin. Aꞌnatërápo shonca, aꞌnatërápo shonca acorahuaton, cato motopi naninoꞌsaquë poꞌorin. Inapotahuaton, aꞌcarárin.)

5Apitiasë canquihuachina Acapo copirnori itapon:

—Niquë niquë paatëhua yaꞌhuërëhuaso noꞌpaꞌ, paꞌtahuaꞌ. Iroꞌsaꞌ, huinanoꞌsaꞌ, inapita yaꞌhuërinquë pëꞌtahuaroꞌsa quëpaꞌahuaꞌ. Pasto quënanpatëhuaꞌ, inaquë cahuarioroꞌsaꞌ, moraroꞌsaꞌ, inapita aꞌcaꞌahuaꞌ. Coꞌsoꞌ inapohuatëhuahuëꞌ, yaꞌipi taquiaponaꞌ, itërin. 6Napoatona niquë niquë paꞌpi.

7Apitiasësoꞌ, iraquë Iniasë nacapiaton, paꞌyanin. Ina quëran mónsho tahuaton:

—¿Quëma taꞌma sinioro, Iniasënquën nica? itërin.

8—Ca mini. Paaton Acapo shaꞌhuitëquë yanontërahuë, itërin Iniasëri.

9—¡Acapo napotohuato, co manta onpopirahuëꞌ tëpaponco caso! 10Iꞌhua chachin inasoꞌ, comisionoꞌsa nisha nisha parti aꞌparin yoniinënquënso marëꞌ. Nisha nisha nacionquë paꞌpirinahuëꞌ, co quënaninënhuëꞌ. Huënantatona shaꞌhuihuachinara: “¿Yoscoarëꞌ co quënanamahuëꞌ?” itërin copirnori. Napotohuachina, inapitasoꞌ: “Nonpinpatoisoꞌ, Yosë anaꞌinchincoi” topi. 11-12Poꞌpin yonípirinënhuëꞌ, co quënaninënhuëꞌ. Iporasoꞌ: “Paaton copirno shaꞌhuitonquë yanontërahuë,” itëranco. Paꞌnahuësoꞌ Sinioro ispiritonën niquëꞌpaꞌ quëpaantaponquën. Copirno huëꞌpachin co quënanquiponquënhuëꞌ. Inapohuachin, inaso atëpataponco. Huiꞌnapitapo quëran huarëꞌ Yosëíchin paꞌyatopirahuë, inapotaponco. 13Iꞌhua chachin Quisapirari sontaroꞌsa camairin pënëntonaꞌpiroꞌsa tëpacaisoꞌ. Napohuachina, carisoꞌ pasa pënëntonaꞌpi poꞌorahuë. Aꞌnatërápo shonca, aꞌnatërápo shonca acorahuato, cato motopi naninoꞌsaquë poꞌorahuë. Inapotahuato, aꞌcarárahuë. ¡Co aꞌna ina nitotomaranquënhuëꞌ! 14¡Acapo yanontëranso shaꞌhuitohuato, inaso huëntapon. Napoaponahuëꞌ co quënanpachinquënhuëꞌ, tëpaponco casoꞌ! itërin Apitiasëri.

15—Siniorosoꞌ yaꞌipi nanitaparin. Ina marëꞌ sacatato noꞌtëquën shaꞌhuitaranquën. Ipora tahuëri chachin Acaporoꞌco nonaꞌhuaso yaꞌhuërin, itërin Iniasëri.

16Napotohuachina Apitiasësoꞌ, Acapo yonípon paꞌnin. Quënanconahuaton, Iniasëri yanontërinso shaꞌhuitërin. Ina natanahuaton nicapon paꞌnin.

17Ipora quënanapon chachin Acapori itapon:

—¡Iꞌyan! Israiroꞌsa aparisitápiranhuëꞌ, nani quënananquën huachi, itërin.

18—Quëma tëhuëchinsoꞌ piyapinënpitarëꞌquën chachin Sinioro camaitërinso aꞌporan. Ina aꞌporahuatoma nisha nisha mamanshiroꞌsa Paaro nonanpisoꞌ mosharamaꞌ. Ina naꞌintërinquëma parisitaramaꞌ. 19Iporasoꞌ Carmiro motopiquë israiroꞌsa ayontonquëꞌ. Catapini pasa aꞌnatërápo shonca yaꞌpi Paaro marëꞌ pënëntopisopitantaꞌ, përaquëꞌ. Catapini pasa Asira marëꞌ pënëntopisopitantaꞌ, huëꞌinaꞌ. Inapitasoꞌ Quisapirari pahuërërin, itërin Iniasëri.

Paaro marëꞌ pënëntopisopita Iniasëri canarinsoꞌ

20Iniasëri napotohuachina Acaposoꞌ, israiroꞌsa ayontonacaiso marëꞌ comisionoꞌsa aꞌparin. Yaꞌhuërëꞌ inaora chachinsoꞌ, Paaro marëꞌ pënëntopisopita Carmiro motopiquë ayontonin. 21Naporo Iniasëso israiroꞌsa yaꞌcarirahuaton, itapon:

—Ama huachi cato imatocosohuëꞌ. Sinioro Yosë nipachin inasáchin imacoꞌ. Paaronta Yosë nipachin, ina nipachin imacosoꞌ, itërin. Napotohuachina co aꞌpanitopihuëꞌ. 22Iniasërisoꞌ, naquëranchin itaantapon:

—Casáchin Sinioro marëꞌ pënëntarahuë. Napoaponahuëꞌ Paaro marësoꞌ, catapini pasa aꞌnatërápo shonca yaꞌpi yaꞌhuërapi. 23Inta nipachin, cato toroaꞌhua quëcoꞌ. Aꞌnara Paaro marëꞌ huayonahuatona tëpaꞌinaꞌ. Nani tëpahuachina artaronënquë ihuë aipi acoꞌinaꞌ. Napoaponahuëꞌ, ama aꞌpërapichinasohuëꞌ. Yaꞌhuërëꞌ cantaꞌ, aꞌnara tëparahuato Sinioro artaronën aipi acoarahuë. Napoaporahuëꞌ, co canta aꞌpërapitarahuëꞌ. 24Nani acohuachina Paaro nonchinaꞌ. Tëhuënchachin Yosë nipachin ahuiquitacaso marëꞌ pën aꞌpatimain. Canta inapotahuato, Sinioro nontarahuë. ¡Insosona aꞌpanitaton pën aꞌpaimahuachin, ina tëhuënchachin Yosësoꞌ! itërin. Napotohuachina yaꞌipi israiroꞌsari:

—¡Noꞌtëquën! Ina pochin niin, topi.

25Napohuachinara, Paaro marëꞌ pënëntopisopita Iniasëri itapon:

—Canpitaso naꞌaquëma niꞌquëhuarëꞌ, canpitaꞌton toroaꞌhua huayonahuatoma inapotëricoꞌ. Nani tapahuatamaꞌ, ama aꞌpërapitapomarahuëꞌ, mamanshinëma nontoco ahuiquitacaso marëꞌ, itërin. 26Napotohuachina inahuasoꞌ, aꞌnara toroaꞌhua huayonpi. Ina tëparahuatona artaro aipi acopi. Inapotahuatona tashiramiachin quëran camotëchin huarëꞌ Paaro nontápi: “¡Paaro aꞌpanicoi!” tosápi. Napoapona pochin, artaro conitatona pashi pashitërapi. Napopirinahuëꞌ co aꞌpanitërinhuëꞌ. 27Camotëchin nisapasoꞌ Iniasëri tëhuarin:

—¡Chini chiníquën nontocoꞌ! yosë inanta niꞌquëhuarë aꞌpaniinquëmaꞌ. Maꞌsona nisamara. Chiꞌchiámara aꞌna, iyámara, niꞌtapon paꞌmara, huëꞌësámara. ¡Huëꞌësápachin ochinancoꞌ! itárin. 28Napotápirinhuëꞌ, inapitaso chiníquën: “Yai, yai,” tëcapona pochin conitapi. Cosoroaꞌhuaroꞌsaquë, nahuacaroꞌsaquë, inaquëpita inahuara niohuanpitërapi. Inachintopi niꞌton, huënaiꞌ amaquë huarëꞌ inapopi. 29Napochináchin panca tëhuërënin huachi. Sinioro marëꞌ maꞌsha ahuiquitacaiso ora naꞌhuëpirinhuëꞌ, co macari aꞌpanirinhuëꞌ.

30Naporoꞌ Iniasëri israiroꞌsa itapon:

—Iporasoꞌ, yaꞌipinquëma yacaritocoꞌ, itërin. Napotohuachina, yaꞌipi yacaripi. Iráca chachin inaquë Yosë marëꞌ artaro acopirinahuëꞌ, ohuatopi. Ina chachin Iniasëri anoyatarin. 31Ina marëꞌ shonca cato naꞌpiroꞌsa ohuatopisoꞌ manin. Cacopo huiꞌninpita yaꞌhuërinso napochachin manin. Ina Cacopo chachin iráca Siniorori aninihuanin: “Quëmasoꞌ Israiro itarinën,” itërin. 32Ina naꞌpiroꞌsa quëran Sinioro artaronën niantarin. Ina tahuirinquëntaꞌ, panca casharin. Cato shonca quiro trico yaꞌconinsoꞌ, casharin. 33Inaporahuaton artaro aipi ihuë acorin. Ina quëran toroaꞌhua tëparahuaton yaquirin. Inapotërinsopita ihuë aipi acorin.

34Inaquë acorahuaton israiroꞌsa camairin:

—Catapini orinaꞌhua iꞌsha quëcatomaꞌ, toroaꞌhua yaquirahuëso opotocoꞌ, itërin. Napotohuachina ina inachachin nipi. Naquëranchin inapotaantacaiso camaitaantahuachina, inapotaantapi. Cararo inapotopi. 35Inapotopi niꞌton, iꞌshasoꞌ artaro noyá sëꞌcotërin. Casharinsontaꞌ, noyá mëntaitërin.

36Ahuiquitacaso ora nanihuachina, artaro yaꞌcarirahuaton chiníquën Yosë nontërin: “¡Sinioro, quëmasoꞌ Apraan, Isaco, Cacopo, inapita chinotërinën! Ipora nontëranquënsoꞌ aꞌpanitonco, quëmasáchin Yosënquën ninansoꞌ anitotocoi. Canta piyapinënco niꞌto, camaitëranso chachin nisarahuë. Inanta nitochinaꞌ. 37Aꞌpanico Sinioro. Quëmasáchin Yosënquën nicaton, piyapinënpita noya chinotaantaꞌinënquëso nohuantëran. ¡Ina nitotacaiso marëꞌ aꞌpanico!” itërin. 38Naporo chachin inápa quëran Siniorori pën aꞌpaimarin. Oshanëna marëꞌ artaro aipi acopisoꞌ yaꞌipi ahuiquitërin. Ihuë, naꞌpiroꞌsaꞌ, amocan, iꞌsha mëntairinsoꞌ, inapitanta huiquitërin. 39Ina nicatona yaꞌipi niꞌtërantapisopita isonpi. Noꞌpaquë huarëꞌ monshorahuatonaꞌ: “¡Siniorocha Yosëso paya!” topi. 40Naporoꞌ Iniasëso camaitaton:

—¡Paaro marëꞌ pënëntopisopita yaꞌipi macoꞌ! itërin. Napotohuachina israiroꞌsari yaꞌipi mapi. Nani mapachinara: “Quison iꞌshaquë quëparahuatëhuaꞌ, inaquë tëpaꞌahuaꞌ,” tënin. Napohuachina inaquë quëparahuatona tëpapi.

Oꞌnanacaso marëꞌ Iniasë orarinsoꞌ

41Ina quëran Iniasëri Acapo itapon:

—Paaton coshatëquëꞌ, oꞌoquëꞌ, coꞌhuara oꞌnan huëꞌshatërasohuëꞌ, inapoquëꞌ. Nani oꞌnan yaꞌcaritarin, itërin. 42Napotohuachina paꞌsahuaton, coshatërin, oꞌorin, naporin.

Iniasëso napoaponahuëꞌ, Carmiro motopi huiꞌnimotënꞌpaꞌ pantarin. Inaquë isonahuaton, toꞌtopitënënquë huarëꞌ yaꞌpirin paquëmarin. 43Ina quëran piyapinën itapon:

—Paaton marë parti notëtëquëꞌ, itërin. Napotohuachina, inaso paꞌsahuaton notëontarin. Huënantarahuaton:

—Capa, co manta yaꞌnorinhuëꞌ, itërin. Napotopirinhuëꞌ, Iniasëri naquëranchin camaiantarin:

—Canchisëro paꞌsahuaton notëontaquëꞌ, itërin. 44Canchisëro paꞌninquë, piyapinënsoꞌ shaꞌhuiintarin:

—¡Marë quëran imira napapi chitoro pipiarin quënanahuë! itintarin. Naporoꞌ huaꞌanëni camaiantarin:

—Paaton Acapo shaꞌhuitonquë toronanën cahuarionënpitaquë aꞌtënchin. Inaporahuaton aꞌnaroáchin paꞌin. Coꞌhuara chiníquën oꞌnani yaꞌshopiara, itërin.

45Napotohuachina Acaposoꞌ, toronanënquë huënsërahuaton, Quisiriro ninanoquë paꞌnin. Paasoꞌ, oꞌnan tashirotërin. Ihuanë chachin huëcaton chiníquën oꞌnanarin huachi. 46Iniasësoꞌ, Siniorori achinirin. Aꞌmorinso amotoontarahuaton, sintoronquë noyá huëquëantërin. Inaporahuaton taꞌahuachina, Acapo naꞌhuëtërin. Inaꞌton Quisiriro ninanoquë canconin.

Currently Selected:

1 Reyes 18: cbt

Highlight

Copy

Compare